Die Bybel—’n handleiding vir die lewe
“DIE woord van God is lewend en oefen krag uit en is skerper as enige tweesnydende swaard . . . en kan gedagtes en bedoelinge van die hart onderskei” (Hebreërs 4:12). Hierdie beskrywing van wat God se Woord kan verrig, toon beslis dat die Bybel meer as net ’n goeie boek is.
“Die boodskap daarin is net so onontbeerlik vir ons lewe as ons volgende asemteug”, het een godsdienskrywer dit kortom gestel. Toe het hy bygevoeg: “Wanneer jy dink aan die feit dat ons vandag genesing begeer en nodig het en dan die Bybel in daardie lig lees, is die resultate verbasend.” Soos ’n lamp wat helder skyn, werp die Bybel lig op al die ingewikkelde kwessies en probleme van die hedendaagse lewe.—Psalm 119:105.
Die wysheid wat die Bybel bevat, het inderdaad die krag om ons denke te vorm, ons te help om probleme op te los, die gehalte van ons lewe te verbeter en ons met die vaardighede toe te rus om die situasies wat ons nie kan verander nie, die hoof te bied. En die belangrikste is dat die Bybel ons in staat stel om God te leer ken en lief te hê.
’n Boek wat jou ’n doel gee
Die Outeur van die Bybel, Jehovah God, ‘is goed bekend met al ons weë’. Hy weet meer omtrent ons fisiese, emosionele en geestelike behoeftes as wat ons self weet (Psalm 139:1-3). Hy stel liefdevol duidelike perke aan menslike gedrag (Miga 6:8). Dit maak sin om daardie perke en riglyne te probeer verstaan en om te leer om daarvolgens te lewe. Gelukkig is die man wie se “behae . . . in die wet van Jehovah” is, sê die psalmis. “Alles wat hy doen, sal slaag” (Psalm 1:1-3, NW). Hierdie vooruitsig behoort ons beslis aan te spoor om dit te ondersoek.
Maurice, ’n afgetrede onderwyser, het nog altyd geglo dat die Bybel geskiedkundige en letterkundige waarde het. En tog het hy daaraan getwyfel dat dit deur God geïnspireer is. Nadat hy geluister het na ’n verduideliking van waarom God sy geskrewe Woord vir mense gegee het, het Maurice verskillende Bybelprofesieë ondersoek. As ’n jong man het hy die Ou Geskiedenis, letterkunde, wetenskap en aardrykskunde bestudeer. Hy erken dat hy in sy eie oë te slim was om die talle voorbeelde ter bevestiging van die Bybel se betroubaarheid te sien. “Ek was vasgevang in die blinde gejaag na gerief, rykdom en die genietinge van die lewe. Ongelukkig het ek oningelig en onkundig gebly omtrent die prag en geloofwaardigheid van die beste boek wat nog geskryf is.”
Maurice is nou in sy sewentigerjare, en hy verwys na die verslag oor Jesus se verskyning aan die apostel Tomas wanneer hy uit dankbaarheid sê: “My hand is gelei na die ‘bloeiende wond’ wat vir ewig alle twyfel uit my verstand sal verdryf dat die Bybel beslis die waarheid is” (Johannes 20:24-29). Soos die apostel Paulus tereg gesê het, lê die Bybel die bedoelinge van die hart bloot, en dit maak die lewe sinvol. Dit is waarlik ’n handleiding vir die lewe.
Dit gee bestendigheid aan ’n lewe vol probleme
Die Bybel gee ook raad wat mense help om van slegte gewoontes ontslae te raak. Daniel kon die onrein rookgewoonte afleer, en hy het opgehou om na wilde partytjies te gaan en alkohol te misbruik (Romeine 13:13; 2 Korintiërs 7:1; Galasiërs 5:19-21). Realisties gesproke verg dit kragtige inspanning om van sulke gewoontes ontslae te raak en jou met “die nuwe persoonlikheid” te beklee (Efesiërs 4:22-24). “Dit was ’n uitdaging”, sê Daniel, “omdat ons so onvolmaak is.” Hy het nietemin daarin geslaag. Nou lees Daniel God se Woord elke dag, en dit help hom om na aan Jehovah te bly.
Terwyl Daniel grootgeword het, het hy altyd diep respek vir die Bybel gehad—alhoewel hy dit nooit gelees het nie—en hy het elke aand tot God gebid. En tog was daar iets wat ontbreek het. Geluk het hom ontwyk. Die keerpunt het gekom toe hy God se naam vir die eerste keer in die Bybel gesien het (Exodus 6:3, NW; Psalm 83:18, NW). Daarna het hy die naam Jehovah gebruik wanneer hy gebid het, en sy gebede het baie persoonliker geword. “Jehovah het die naaste persoon aan my geword, en hy is nog steeds my intiemste vriend.”
Voordat Daniel die Bybel bestudeer het, het die toekoms vir hom maar donker gelyk. “’n Mens hoef nie baie intelligent te wees om te sien wat in die wêreld gebeur nie”, sê hy. “Ek was bang, en ek het besig probeer bly sodat ek nie daaraan sou dink nie.” Toe het hy geleer dat God geregtigheid sal laat geskied vir almal op ’n gereinigde aarde, waar gehoorsame mense ewige vrede en geluk kan geniet (Psalm 37:10, 11; Daniël 2:44; Openbaring 21:3, 4). Nou het Daniel ’n vaste hoop. Hierdie invloed van die Bybel, wat bestendigheid gee, stel hom in staat om ’n positiewe lewensbeskouing te behou.
Hulp om emosionele probleme te bowe te kom
George was sewe toe sy moeder oorlede is. Hy was baie bang om saans te gaan slaap omdat hy nie geweet het of hy die volgende dag wakker sou word nie. Toe het hy gelees wat Jesus oor die dood en die opstanding gesê het: “Die uur kom waarin almal wat in die gedenkgrafte is [Jesus se] stem sal hoor en sal uitkom.” Hy is ook getref deur Jesus se woorde: “Ek is die opstanding en die lewe. Wie geloof in my beoefen, sal lewend word, selfs al sterf hy” (Johannes 5:28, 29; 11:25). Sulke gedagtes het redelik, logies en vertroostend geklink. “Hierdie waarheid”, sê George, “vind nie net ingang by die verstand nie, maar raak ook die hart.”
Daniel, wat vroeër gemeld is, het ook vrese gehad. Sy moeder kon hom nie op haar eie grootmaak nie, en daarom is hy na baie pleeggesinne gestuur. Hy het altyd soos ’n buitestander gevoel en het daarna gesmag om die sekuriteit daarvan te ondervind om aan ’n liefdevolle gesin te behoort. Uiteindelik het hy gevind waarna hy gesoek het deur middel van sy studie van die Bybel. Daniel het met die Christengemeente van Jehovah se Getuies begin omgaan en ’n deel geword van ’n geestelike gesin, waar hy aanvaarding en die liefde van ander ondervind. Die Bybel is beslis op ’n praktiese en emosioneel bevredigende manier voordelig.
Onthou, Jehovah sien wat in ons hart is en weet waarna ons soek. God “toets die harte”, en hy gee “aan elkeen . . . na sy weë”.—Spreuke 21:2; Jeremia 17:10.
Praktiese raad oor die gesinslewe
Die Bybel gee praktiese raad in verband met menseverhoudinge. George sê: “Persoonlikheidsverskille of misverstande is van die spanningsvolste situasies in die lewe.” Hoe bied hy dit die hoof? “As ek voel dat iemand iets teen my het, pas ek die reguit raad in Matteus 5:23, 24 toe: ‘Maak vrede met jou broer.’ Die blote feit dat ek oor die konflik kan praat, het ’n goeie uitwerking. Ek kan die vrede van God voel waarvan die Bybel praat. Dit werk. Dit is so prakties.”—Filippense 4:6, 7.
Wanneer ’n man en vrou nie saamstem nie, moet albei “gou wees om te hoor, stadig om te praat, stadig ten opsigte van gramskap” (Jakobus 1:19). Hierdie raad verbeter kommunikasie. George voeg by: “Wanneer ek die raad toepas om my vrou lief te hê en te behandel soos myself, sien ek onmiddellike resultate. Dit is vir haar makliker om my te respekteer” (Efesiërs 5:28-33). Ja, die Bybel leer ons hoe om ons eie onvolmaakthede te erken en te verwerk en hoe om dié van ander met welslae die hoof te bied.
Raad wat standhou
Die wyse koning Salomo het gesê: “Vertrou op die HERE met jou hele hart en steun nie op jou eie insig nie. Ken Hom in al jou weë, dan sal Hý jou paaie gelykmaak” (Spreuke 3:5, 6). Hoe eenvoudig maar betekenisvol is hierdie woorde tog!
Die Bybel is ’n krag ten goede. Dit stel liefhebbers van God in staat om hulle lewe in ooreenstemming met sy wil te bring en om geluk te vind deur “in die wet van die HERE [te] wandel” (Psalm 119:1). Ongeag wat ons omstandighede is, die Bybel bevat die riglyne en raad wat ons nodig het (Jesaja 48:17, 18). Lees dit daagliks, peins oor wat jy lees en pas dit toe. Dit sal jou verstand helder en toegespits hou op dinge wat suiwer en heilsaam is (Filippense 4:8, 9). Jy sal nie net leer hoe om te lewe en die lewe te geniet nie, maar ook hoe om die Skepper van die lewe lief te hê.
Deur so ’n weg te volg, sal die Bybel vir jou—soos vir miljoene ander—meer as net ’n goeie boek word. Dit sal waarlik ’n handleiding vir die lewe wees!
[Prent op bladsy 6]
Die Bybel kan jou versterk in jou voorneme om skadelike gewoontes af te leer
[Prent op bladsy 7]
Die Bybel leer jou hoe om na aan God te kom