Jy word hartlik uitgenooi

DIE Here se Aandmaal, wat die Here Jesus Christus sowat 2 000 jaar gelede ingestel het, is nie net ’n gebeurtenis van geskiedkundige belang nie. Dit het sedert die instelling daarvan ’n kragtige uitwerking op mense. Dit het die harte geraak van baie wat die Evangelieverslae oor die gebeure van daardie aand gelees het, sodat hulle die Here se Aandmaal op verskillende maniere probeer vier het.

Dit is verstaanbaar, aangesien Jesus Christus beveel het dat sy volgelinge hierdie gebeurtenis moet vier en dat hulle dit gereeld moet doen. Hy het met soveel woorde vir hulle gesê: “Hou aan om dit tot my gedagtenis te doen.”—Lukas 22:19; 1 Korintiërs 11:23-25.

As ’n mens wil hê dat die viering werklik ’n lonende ondervinding moet wees, moet jy natuurlik ’n juiste begrip van die betekenis daarvan hê, soos dit in God se Woord, die Bybel, uiteengesit word. Daarbenewens is dit belangrik om te weet wat die Bybel sê oor wanneer en hoe die gebeurtenis gevier moet word.

In gehoorsaamheid aan Jesus se bevel sal Jehovah se Getuies regoor die wêreld Woensdagaand, 16 April 2003, bymekaarkom om Jesus se dood te herdenk. Dit sal vir hulle ’n geleentheid wees om die Skrif te ondersoek en hulle geloof in en liefde vir die Here Jesus Christus te versterk, wat gesê het: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Jy word hartlik uitgenooi om daardie aand saam met hulle te vergader sodat jy ook jou geloof in en liefde vir Jesus Christus en die hemelse Vader, Jehovah God, kan versterk.