God se beskouing van die dooies

DIE dood van ’n geliefde bring beslis groot hartseer mee. Die leemte, die eensaamheid en die verlies wat ’n mens voel, is onbeskryflik. Wanneer iemand ’n geliefde aan die dood afstaan, kan dit hom hulpeloos laat voel, want ongeag hoeveel geld, mag of invloed hy besit, niemand wat nou op die aarde lewe, kan ’n afgestorwene weer lewend maak nie.

Ons Skepper beskou dinge egter anders. Aangesien hy die eerste mens uit die stof van die aarde gevorm het, is hy ook in staat om iemand wat dood is, te herskep. Daarom kan God die dooies beskou asof hulle nog lewe. Jesus het aangaande getroue knegte van ouds wat gesterf het, gesê: “Vir [God] lewe hulle almal.”—Lukas 20:38.

Terwyl Jesus op die aarde was, het hy die mag gehad om die dooies op te wek (Johannes 5:21). Hy deel dus sy Vader se beskouing van diegene wat getrou gesterf het. Met die dood van sy vriend Lasarus het Jesus byvoorbeeld vir sy dissipels gesê: “Ek reis daarheen om hom uit die slaap wakker te maak” (Johannes 11:11). Uit ’n menslike oogpunt was Lasarus dood, maar vir Jehovah en Jesus het hy net geslaap.

Onder Jesus se Koninkryksheerskappy sal daar “’n opstanding van die regverdiges sowel as die onregverdiges . . . wees” (Handelinge 24:15). Mettertyd sal die verresenes goddelike onderrigting ontvang en die vooruitsig hê om vir ewig op die aarde te lewe.—Johannes 5:28, 29.

Ja, die dood van ’n geliefde kan baie hartseer en droefheid veroorsaak, wat jare lank kan duur. Nietemin kan dit ons grootliks vertroos en ons met hoop vervul as ons die dooies uit God se standpunt beskou.—2 Korintiërs 1:3, 4.