Hy het goedhartigheid liefgehad

MILTON G. HENSCHEL, wat lank op die Bestuursliggaam van Jehovah se Getuies gedien het, het sy aardse loopbaan op Saterdag, 22 Maart 2003, voltooi. Hy was 82 jaar oud.

Milton Henschel het as ’n jong man ’n lid van die hoofkantoorpersoneel van Jehovah se Getuies geword en meer as 60 jaar lank getrou daar gedien. Hy het gou bekend geword vir sy goeie oordeelsvermoë en sy opregte belangstelling in die Koninkrykspredikingswerk. In 1939 het hy die sekretaris geword van N. H. Knorr, wat destyds die opsiener van die Brooklynse drukkery van Jehovah se Getuies was. Toe broer Knorr in 1942 toesig begin hou het oor die werk van die Getuies regoor die wêreld, het hy broer Henschel as sy assistent behou. Broer Henschel het in 1956 met Lucille Bennett getrou, en saam het hulle die vreugdes en uitdagings van die lewe ervaar.

Tot broer Knorr se dood in 1977 het broer Henschel ten nouste met hom saamgewerk. Broer Henschel, wat broer Knorr dikwels vergesel het, het na meer as 150 lande gereis en Jehovah se Getuies regoor die wêreld besoek en bemoedig, veral sendelinge en diegene by die takkantore. Hierdie reise was soms veeleisend, selfs gevaarlik. In 1963, toe broer Henschel ’n streekbyeenkoms in Liberië bygewoon het, is hy wreed vervolg omdat hy geweier het om aan ’n patriotiese seremonie deel te neem.a Net ’n paar maande later het broer Henschel onbevrees na Liberië teruggekeer om die president van die land te ontmoet en groter vryheid van aanbidding vir Jehovah se Getuies te probeer kry.

Broer Henschel was bekend daarvoor dat hy moeilike probleme en uitdagings op ’n praktiese, inskiklike en redelike manier kon hanteer. Sy medewerkers het veral sy ordelikheid, sy beskeidenheid en sy sin vir humor waardeer. Hy was geseën met ’n merkwaardige geheue en het regoor die wêreld baie sendelinge verras omdat hy hulle name onthou het, ’n frase of twee in die plaaslike taal gebruik het en ’n gevatte sêding kwytgeraak het—met ’n vonkeling in sy oë.

Miga 6:8 herinner ons daaraan dat Jehovah God van ons verwag om “goedhartigheid lief te hê”. Milton Henschel sal onthou word vir sy voorbeeld in hierdie opsig. Ondanks sy groot verantwoordelikhede het hy genaakbaar, vriendelik en goedhartig gebly. Hy het graag gesê: “As jy twyfel, onthou, die goedhartige ding is die regte ding om te doen.” Hoewel ons bedroef is oor die dood van hierdie geliefde broer, is ons verheug dat hy tot die einde toe getrou gebly het, verseker van sy beloning, “die kroon van die lewe”.—Openbaring 2:10.

[Voetnoot]

[Prent op bladsy 31]

M. G. Henschel saam met N. H. Knorr

[Prent op bladsy 31]

Saam met sy vrou, Lucille