Die regte rede vir geloof

DIE Koreaanse boek 31 Reasons Why Young People Leave the Church beweer dat baie ophou om kerk toe te gaan omdat hulle nie bevredigende antwoorde op hulle vrae kan vind nie. Hulle vra byvoorbeeld: ‘Waarom ly mense wat in God glo?’ en ‘Waarom moet ons alles aanvaar wat die kerke leer terwyl baie van die leerstellings verwarrend en teenstrydig is?’

Omdat baie teleurgestel word deur die antwoorde wat hulle geestelikes voorsien, kom hulle tot die slotsom dat daar nie ’n antwoord in die Bybel is nie. Wanneer ’n geestelike ’n verduideliking gee wat uitsluitlik op sy persoonlike opinie gegrond is, lei dit dikwels tot ’n verkeerde beskouing, selfs ’n verwerping, van God en die Bybel.

Dit was die ondervinding van Abel, wat as ’n Lutheraan in Suid-Afrika grootgeword het. Hy vertel: “Die kerk leer dat elkeen wat sterf, deur God ‘weggeneem’ is. Maar ek kon nie verstaan waarom ’n God van liefde ouers van hulle kinders sou ‘wegneem’ nie. In landelike Afrika waar ek grootgeword het, het ons nie ’n hen geslag voordat die kuikens groot was nie. As ons uitgevind het dat ’n koei dragtig is, het ons haar nie geslag voordat die kalf gebore en gespeen is nie. Ek kon nie verstaan waarom ’n liefdevolle God nie dieselfde bedagsaamheid teenoor mense toon nie.”

Aram, ’n Kanadees, het soortgelyke twyfelgedagtes gehad. “Toe ek 13 jaar oud was, het my pa gesterf”, vertel hy. “Tydens die begrafnisdiens het ’n vooraanstaande geestelike verduidelik dat dit God se wil was dat my pa sterf, sodat hy nader aan God in die hemel kon kom. ‘God neem goeie mense weg’, het hy gesê, ‘want God is lief vir die regverdiges.’ Ek kon nie verstaan hoe God so selfsugtig kon wees nie.”

Abel sowel as Aram het later in aanraking gekom met Jehovah se Getuies, die Bybel saam met hulle gestudeer en oplaas die antwoorde op hulle vrae gevind. Hulle het liefde vir God en ’n sterk geloof in hom opgebou. Hulle het uiteindelik hulle lewe aan Jehovah toegewy en sy lojale knegte geword.

Juiste kennis—’n sleutel tot geloof in God

Wat kan ons uit hierdie ondervindinge leer? Dit toon dat juiste Bybelkennis onontbeerlik is vir geloof in God. Die apostel Paulus het vir die Christene in die eertydse stad Filippi gesê: “Dit is wat ek aanhou bid, dat julle liefde steeds oorvloediger mag word met juiste kennis en volle onderskeidingsvermoë” (Filippense 1:9). Hier verbind Paulus liefde vir God en medegelowiges met juiste kennis van God, asook onderskeidingsvermoë van wat sy wil is.

Dit is redelik, want voordat ’n mens iemand kan vertrou, moet jy hom eers ken—en hoe vollediger en juister ons kennis van hom, hoe beter. Net so is juiste kennis nodig om jou te beweeg om in God te glo. “Geloof is die gewaarborgde verwagting van dinge waarop gehoop word, die duidelike bewys van werklikhede hoewel hulle nie gesien word nie”, het Paulus gesê (Hebreërs 11:1). Geloof in God sonder juiste kennis van die Bybel is soos ’n kaartehuis. Die geringste windjie sal dit inmekaar laat tuimel.

’n Studie van die Bybel kan jou help om antwoorde te vind op vrae soos die een wat Abel en Aram lank verwar het: Waarom sterf mense? Die Bybel verduidelik: “Deur een mens [het] die sonde in die wêreld ingekom . . . en die dood deur die sonde, en die dood [het] só tot alle mense deurgedring . . . omdat hulle almal gesondig het” (Romeine 5:12). Mense word oud en sterf, nie omdat God hulle wegneem om by hom te wees nie, maar omdat Adam gesondig het (Genesis 2:16, 17; 3:6, 17-19). Verder openbaar die Bybel die ware hoop wat Jehovah God bied. Deur sy Seun, Jesus Christus, gee hy die sondige mensdom die hoop op ’n opstanding.—Johannes 5:28, 29; Handelinge 24:15.

Om ons te help om die waarheid oor die opstanding te verstaan, bevat die Bybelverslag verskeie voorbeelde van mense wat Jesus uit die dood opgewek het (Lukas 7:11-17; 8:40-56; Johannes 11:17-45). Terwyl jy hierdie Bybelverslae lees, kan jy gerus let op die blydskap en vreugde wat die vriende en familie van die verresenes ervaar het. Let ook daarop dat dit hulle beweeg het om God te verheerlik en geloof in Jesus te stel.

Juiste kennis van God en sy voornemens kan vandag dieselfde uitwerking op mense hê. Baie het voorheen verward en belas gevoel, en het selfs gestruikel, omdat hulle nie bevredigende antwoorde op belangrike vrae kon kry nie. Maar namate hulle die Bybel bestudeer het, het hulle die antwoorde gevind, en dit het hulle lewe heeltemal verander.

Liefde vir God—die vernaamste rede om hom te dien

Hoewel juiste kennis noodsaaklik is vir geloof in God, is dit nie al wat nodig is om ’n mens aan te spoor om hom te gehoorsaam en te dien nie. Toe Jesus gevra is wat die grootste gebod van God is, het hy gesê: “Jy moet Jehovah jou God liefhê met jou hele hart en met jou hele siel en met jou hele verstand en met al jou krag” (Markus 12:30). As iemand God liefhet op die manier wat Jesus hier meld, sal hy Hom met die grootste gewilligheid gehoorsaam en dien. Is dit waar in jou geval?

Rachel, wat al ’n paar dekades lank as ’n sendeling in Korea dien, gee hierdie rede vir haar geloof: “Ek dink aan Jehovah se vrygewigheid teenoor sy skepsele, sy vergewensgesindheid teenoor sy knegte en sy begeerte dat ons ons moet bevoordeel deur aan ons bekend te maak wat hy van ons verwag. Dit alles laat my liefde vir God toeneem. En hierdie liefde maak dat ek hom wil dien.”

Martha, ’n weduwee in Duitsland, dien Jehovah al 48 jaar. Sy sê: “Waarom dien ek Jehovah? Omdat ek hom liefhet. Elke aand praat ek met Jehovah in gebed en vertel ek hom hoe innig dankbaar ek is vir al sy seëninge, veral vir die losprysoffer.”

Ja, liefde vir God maak dat ons hom uit die hart wil dien. Maar hoe verkry ’n mens hierdie liefde? Die kragtigste dryfveer om liefde vir God te ontwikkel, is diepe waardering vir die liefde wat hy teenoor ons bewys het. Let op hierdie aangrypende herinnering uit die Bybel: “Hy wat nie liefhet nie, het God nie leer ken nie, want God is liefde. Hierdeur is die liefde van God in ons geval openbaar gemaak, want God het sy enigverwekte Seun in die wêreld uitgestuur sodat ons deur hom die lewe kan verkry. Hierin lê die liefde: nie dat ons God liefgehad het nie, maar dat hy ons liefgehad en sy Seun uitgestuur het as ’n soenoffer vir ons sondes.”—1 Johannes 4:8-10.

Besef jy hoe groot hierdie liefde is? Sê nou jy het amper in ’n sterk stroom verdrink, maar ’n man het sy lewe gewaag om jou te red. Sal jy hom vergeet of sal jy eerder baie dankbaar teenoor hom voel? Sal jy nie gewillig wees om alles vir hom te doen wat jy kan nie? Die liefde wat God getoon het deur sy Seun, Jesus Christus, as die losprysoffer te voorsien, is oneindig groter (Johannes 3:16; Romeine 8:38, 39). Wanneer jou hart geraak word deur God se liefde, sal dit jou beweeg om hom met jou hele hart lief te hê en te dien.

Seëninge nou en in die toekoms

Hoewel ons liefde vir God die vernaamste rede moet wees waarom ons sy wil doen, is dit verblydend om te weet dat God diegene beloon wat hom dien. Die apostel Paulus sê duidelik: “Sonder geloof is dit onmoontlik om vir hom welbehaaglik te wees, want hy wat tot God nader, moet glo dat hy is en dat hy die beloner word van dié wat hom ernstig soek.”—Hebreërs 11:6.

Diegene wat God liefhet en gehoorsaam, word waarlik deur hom geseën. Baie geniet beter gesondheid omdat hulle Bybelbeginsels volg (Spreuke 23:20, 21; 2 Korintiërs 7:1). Dié wat Bybelbeginsels oor eerlikheid en vlytigheid toepas, word oor die algemeen deur hulle werkgewers vertrou en het gevolglik groter ekonomiese sekuriteit (Kolossense 3:23). Weens hulle vertroue in Jehovah, geniet God se knegte gemoedsrus, selfs onder moeilike omstandighede (Spreuke 28:25; Filippense 4:6, 7). Bowenal sien hulle met vertroue uit na die seëning van ewige lewe in die komende aardse Paradys.—Psalm 37:11, 29.

Hoe voel diegene wat hierdie seëninge uit Jehovah se hand geniet, oor hom? Jacqueline, ’n Christen in Kanada, spreek haar waardering vir God soos volg uit: “Hy gee ons altyd sulke wonderlike gawes, en hy bied ons die gewisse hoop op die ewige lewe.” Abel, van wie ons vroeër gehoor het, beskryf sy gevoelens so: “Die vooruitsig om vir ewig op ’n paradysaarde te lewe, was iets nuuts vir my, en ek sien daarna uit. Maar selfs al was daar nie die hoop op ’n paradys nie, sou dit my nog steeds gelukkig gemaak het om my liefde vir God te wys deur hom te dien.”

Jy kan ook ware geloof opbou

“Jehovah van die leërs oordeel met regverdigheid; hy ondersoek die niere en die hart”, sê die Bybel (Jeremia 11:20). Ja, Jehovah ondersoek wat in ons diepste wese verskuil is. Elkeen moet sy beweegrede vir geloof in God ondersoek. Verkeerde opvattings en idees oor God het dalk daartoe bygedra dat ons in die verlede verkeerde dinge gedoen het. Maar juiste kennis van die Bybel kan ons help om ’n goeie verhouding met die Skepper, Jehovah God, op te bou.—1 Timoteus 2:3, 4.

Jehovah se Getuies help mense om juiste kennis van God op te doen deur gratis tuisbybelstudies met hulle te hou (Matteus 28:20). Baie wat hierdie hulp aanvaar het, het liefde vir God en ware geloof in hom opgebou. Deur ’n studie van die Bybel het hulle “praktiese wysheid en denkvermoë” verkry, wat hulle help om in hierdie gevaarlike tye “in veiligheid [te] wandel” (Spreuke 3:21-23). Bowenal het hulle nou ’n hoop vir die toekoms wat “seker sowel as vas” is (Hebreërs 6:19). Jy kan ook ware geloof opbou en hierdie seëninge geniet.

[Venster op bladsy 6]

Verwarrende vrae wat beantwoord moes word

“Terwyl ek as ’n mediese student opleiding in ’n hospitaal ontvang het, het ek gesien hoe goeie mense baie pyn verduur weens siektes en rampe. As daar ’n God is, waarom gebeur hierdie dinge dan? Is godsdiens maar net daar om gemoedsrus te verkry?”—’n Voormalige Presbiteriaan in Korea.

“Ek het dikwels gewonder of my pa, wat ’n alkoholis was, in die hemel of in die hel is. Ek was baie bang vir die dooies en vir die idee van ’n helse vuur. Ek kon nie verstaan hoe ’n liefdevolle God iemand hel toe kon stuur om vir ewig daar te ly nie.”—’n Voormalige Katoliek in Brasilië.

“Wat hou die toekoms in vir die aarde en die mens? Hoe sal die mens vir ewig kan lewe? Hoe sal die mensdom ware vrede kan verkry?”—’n Voormalige Katoliek in Duitsland.

“Die leer van reïnkarnasie het nie vir my sin gemaak nie. Diere aanbid nie; hoe kan ’n mens dan, as jy as ’n dier gereïnkarneer word om vir jou sondes te betaal, sake regstel en uit daardie toestand kom?”—’n Voormalige Hindoe in Suid-Afrika.

“Ek het in ’n Konfusiaanse gesin grootgeword, en ek het deelgeneem aan die seremonie om ons voorouers te paai. Wanneer ek die offertafel help dek het en neergebuig het, het ek gewonder of ons afgestorwe voorouers sou kom om die kos te eet en te sien hoe ons voor hulle neerbuig.”—’n Voormalige Konfusiaan in Korea.

Al hierdie persone het antwoorde op hulle vrae gekry toe hulle die Bybel saam met Jehovah se Getuies gestudeer het.