Hoe ons ons liefde vir God toon
OM LIEFDE vir God aan te kweek, beteken nie net om kennis in te neem nie. Soos God se knegte uit alle wêrelddele kan getuig, neem ware liefde vir God toe wanneer ’n mens sy persoonlikheid leer ken, en dit word selfs sterker wanneer ’n mens leer wat hy liefhet, wat hy haat en wat sy voorkeure en sy vereistes is.
Weens sy liefde het Jehovah sy Woord, die Bybel, vir ons gegee, waarin hy hom openbaar. Daaruit leer ons hoe Jehovah in verskillende situasies opgetree het. Net soos ’n brief van ’n geliefde vir ons groot genot verskaf, so verskaf die Bybel vir ons groot vreugde wanneer ons sien hoe nuwe aspekte van Jehovah se persoonlikheid geopenbaar word.
Maar soos ons soms in ons openbare bediening sien, lei dit nie altyd tot liefde vir God as iemand kennis van hom opdoen nie. Jesus het vir sekere Jode van sy dag wat geen waardering gehad het nie, gesê: “Julle ondersoek die Skrif, want julle dink dat julle die ewige lewe deur middel daarvan sal hê; . . . maar ek weet goed dat julle nie die liefde vir God in julle het nie” (Johannes 5:39, 42). Party leer jare lank van Jehovah se liefdevolle dade en tog het hulle hom nie werklik lief nie. Waarom nie? Hulle dink nie na oor die implikasies van wat hulle leer nie. Daarteenoor vind miljoene opregte mense met wie ons die Bybel studeer, dat hulle liefde vir God voortdurend toeneem. Waarom? Omdat hulle Asaf se voorbeeld volg, soos ons ook gedoen het. In watter opsig?
Peins met waardering
Asaf het hom voorgeneem om liefde vir Jehovah in sy hart aan te kweek. Hy het geskryf: “Met my hart sal ek besorgdheid toon. . . . Ek sal aan die handelinge van Jah dink; want ek sal aan u wonderdade van lank gelede dink. En ek sal beslis oor al u dade peins, en u handelinge sal ek oordink” (Psalm 77:6, 11, 12). Liefde vir God sal groei in die hart van iemand wat soos die psalmis oor Jehovah se weë peins.
Dit versterk ook ons verhouding met Jehovah as ons terugdink aan ondervindinge wat ons in ons diens aan hom gehad het. Die apostel Paulus het gesê dat ons God se “medewerkers” is, en die vriendskap wat tussen medewerkers kan ontwikkel, is baie spesiaal (1 Korintiërs 3:9). Wanneer ons toon dat ons Jehovah liefhet, waardeer hy dit, en dit maak sy hart bly (Spreuke 27:11). Wanneer ons dan Jehovah se hulp vra en hy ons deur die een of ander moeilike situasie lei, weet ons dat hy met ons is, en ons liefde vir hom neem toe.
’n Vriendskap tussen twee mense verdiep wanneer hulle vir mekaar vertel hoe hulle voel. Net so neem ons liefde vir Jehovah toe wanneer ons vir hom sê waarom ons toegewyd is aan hom. Ons sal vind dat ons nadink oor Jesus se woorde: “Jy moet Jehovah jou God liefhê met jou hele hart en met jou hele siel en met jou hele verstand en met al jou krag” (Markus 12:30). Wat kan ons doen om te verseker dat ons sal voortgaan om Jehovah lief te hê met ons hele hart, ons hele siel, ons hele verstand en met al ons krag?
Hoe om Jehovah met ons hele hart lief te hê
Die Skrif verwys na die figuurlike hart, wat die innerlike mens is—ons begeertes, gesindhede en gevoelens. Om Jehovah dan met ons hele hart lief te hê, beteken dat dit ons grootste begeerte is om God te behaag (Psalm 86:11). Ons toon dat ons hierdie liefde het deur ons persoonlikheid vir hom aanneemlik te maak. Ons streef daarna om God na te volg deur ‘te verafsku wat goddeloos is en vas te hou aan wat goed is’.—Romeine 12:9.
Ons liefde vir God beïnvloed ons gevoelens oor alles. Byvoorbeeld, ons vind ons werk dalk stimulerend of interessant, maar is dit waar ons hart is? Nee. Aangesien ons Jehovah met ons hele hart liefhet, is ons allereers bedienaars van God. Ons wil ook ons ouers, ons huweliksmaat en ons werkgewer behaag, maar ons bewys ons heelhartige liefde vir Jehovah deur hom bowenal te probeer behaag. Hy verdien immers die vernaamste plek in ons hart.—Matteus 6:24; 10:37.
Hoe om Jehovah met ons hele siel lief te hê
In die Skrif verwys die woord “siel” na ons hele persoon asook na die lewe wat ons het. Om Jehovah met ons hele siel lief te hê, beteken dus dat ons ons lewe gebruik om hom te loof en om ons liefde vir hom te bewys.
Dit spreek vanself dat ons moontlik ander belange in die lewe het, soos om te leer hoe om ’n nuwe werk te doen, ’n onderneming te bestuur of ’n gesin groot te maak. Maar ons bewys nietemin dat ons Jehovah met ons hele siel liefhet deur dinge op sý manier te doen en deur ander dinge op hulle regte plek in ons lewe te hou en sodoende “eers die koninkryk en sy regverdigheid te soek” (Matteus 6:33). Om met ons hele siel te aanbid, beteken ook dat ons ywerig moet wees. Ons wys vir Jehovah dat ons hom liefhet deur die Koninkryksboodskap ywerig te verkondig, opbouende kommentare by die vergaderinge te lewer of ons Christenbroers en -susters te help. Ons hou aan om in alles ‘die wil van God met ons hele siel te doen’.—Efesiërs 6:6.
Jesus het getoon dat hy God met sy hele siel liefhet deur homself te verloën. Hy het God se wil eerste gestel en sy eie behoeftes tweede. Jesus het ons genooi om sy voorbeeld te volg. Hy het gesê: “As iemand agter my aan wil kom, laat hy homself verloën en sy folterpaal opneem en my voortdurend volg” (Matteus 16:24, 25). Om onsself te verloën, beteken dat ons ’n toewyding maak. Dit beteken dat ons God so liefhet dat ons eienaarskap van onsself aan hom gee, soos wanneer ’n Israeliet in Bybeltye sy heer so liefgehad het dat hy hom permanent as ’n slaaf aan hom verbind het (Deuteronomium 15:16, 17). Wanneer ons ons lewe aan Jehovah toewy, lewer dit oortuigende bewys dat ons hom liefhet.
Hoe om Jehovah met ons hele verstand lief te hê
Om Jehovah met ons hele verstand lief te hê, beteken dat ons alles in ons vermoë doen om Jehovah se persoonlikheid, voornemens en vereistes te verstaan (Johannes 17:3; Handelinge 17:11). Ons betoon ons liefde aan Jehovah deur ons verstandelike vermoëns ten volle te gebruik om ander te help om Jehovah ook lief te kry en deur ons onderrigkuns te verbeter. “Versterk . . . julle verstand vir bedrywigheid”, het die apostel Petrus gemaan (1 Petrus 1:13). En ons span ons in om belangstelling in ander te toon, veral in medeknegte van God. Ons is bewus van hulle omstandighede en merk op wanneer lof gepas of vertroosting nodig is.
Ons wys vir Jehovah dat ons hom met ons hele verstand liefhet deur ons verstandelik aan hom te onderwerp. Ons probeer om sy beskouing van dinge te kry, slaan ag op hom wanneer ons besluite neem en vertrou dat sy weg die beste is (Spreuke 3:5, 6; Jesaja 55:9; Filippense 2:3-7). Maar hoe kan ons ons krag gebruik terwyl ons ons liefde vir God toon?
Hoe om Jehovah met al ons krag lief te hê
Baie jongmense in die Christengemeente gebruik hulle krag om Jehovah te loof (Spreuke 20:29; Prediker 12:1). Een manier waarop talle jong Christene wys dat hulle Jehovah met al hulle krag liefhet, is deur aan die pionierdiens, die voltydse bediening, deel te neem. Baie moeders neem aan hierdie aspek van die bediening deel terwyl hulle kinders by die skool is. Getroue ouer manne wat herdersbesoeke doen en ook nog na die welsyn van hulle eie gesinne omsien, toon dat hulle Jehovah met al hulle krag liefhet (2 Korintiërs 12:15). Jehovah versterk diegene wat op hom hoop, sodat hulle hulle liefde kan bewys deur hom met al hulle krag te loof.—Jesaja 40:29; Hebreërs 6:11, 12.
Liefde sal groei as dit reg gekweek word. Daarom sit ons voortdurend tyd opsy om te peins. Ons dink aan wat Jehovah vir ons gedoen het en waarom hy ons toegewydheid verdien. As onvolmaakte nakomelinge van Adam kan ons nooit die dinge waardig wees “wat God berei het vir dié wat hom liefhet” nie, maar ons kan toon dat ons Jehovah met ons hele wese liefhet. Laat ons voortgaan om dit te doen!—1 Korintiërs 2:9.
[Prent op bladsy 20]
Ons toon ons liefde vir God deur dade