Gebruik geestelike doelwitte om jou Skepper te verheerlik

“WANNEER ’n man nie weet na watter hawe hy op pad is nie, is geen wind die regte wind nie.” Hierdie woorde, wat aan ’n eerste-eeuse Romeinse filosoof toegeskryf word, bevestig ’n ou bekende waarheid, naamlik dat doelwitte noodsaaklik is om rigting aan die lewe te gee.

Die Bybel voorsien voorbeelde van mense wat doelgerig was. Noag het sowat 50 jaar lank gewerk om “’n ark [te bou] tot redding van sy huisgesin”. Die profeet Moses “het sy blik stip op die beloning gerig gehou” (Hebreërs 11:7, 26). Moses se opvolger, Josua, het die godgegewe doelwit gehad om die land Kanaän te verower.—Deuteronomium 3:21, 22, 28; Josua 12:7-24.

In die eerste eeu G.J. is die apostel Paulus se geestelike doelwitte ongetwyfeld grootliks beïnvloed deur Jesus se woorde dat “hierdie goeie nuus van die koninkryk . . . in die hele bewoonde aarde verkondig [sal] word” (Matteus 24:14). Paulus is aangespoor deur persoonlike boodskappe en visioene van die Here Jesus, waaronder die toewysing om Jesus se “naam na die nasies . . . te dra”, en gevolglik het hy ’n belangrike rol gespeel in die stigting van ’n reeks Christengemeentes regoor Klein-Asië en tot in Europa.—Handelinge 9:15; Kolossense 1:23.

Ja, Jehovah se knegte het deur die eeue heen verhewe doelwitte gestel en dit bereik, tot eer van God. Hoe kan ons vandag geestelike doelwitte stel? Watter doelwitte kan ons nastreef, en watter praktiese stappe kan ons doen om dit te bereik?

Regte beweegredes is noodsaaklik

Doelwitte kan in feitlik alle aspekte van die lewe gestel word, en daar is talle doelgerigte mense in hierdie wêreld. Teokratiese doelwitte is egter nie dieselfde as wêreldse ambisies nie. Die vernaamste beweegredes vir baie doelwitte in die wêreld is ’n oorheersende begeerte na rykdom en ’n onversadigbare honger na posisie en mag. Hoe verkeerd sal dit tog wees om mag en vernaamheid na te streef! Doelwitte wat Jehovah God verheerlik, hou direk verband met ons aanbidding van hom en met Koninkryksbelange (Matteus 6:33). Dit spruit voort uit liefde vir God en medemens en het godvrugtige toegewydheid as doel.—Matteus 22:37-39; 1 Timoteus 4:7.

Mag ons beweegredes suiwer wees wanneer ons geestelike doelwitte stel en nastreef, of dit nou groter diensvoorregte of persoonlike geestelike vooruitgang is. Maar selfs doelwitte wat met die regte beweegredes gestel word, word soms nie bereik nie. Hoe kan ons doelwitte stel en die kanse vergroot dat ons dit sal bereik?

’n Sterk begeerte is noodsaaklik

Dink aan hoe Jehovah te werk gegaan het om die heelal te skep. Met die woorde “dit was aand en dit was oggend”, het Jehovah die opeenvolgende skeppingstydperke afgebaken (Genesis 1:5, 8, 13, 19, 23, 31). Aan die begin van elke skeppingstydperk het hy presies geweet wat sy doelwit, of oogmerk, vir daardie dag was. En God het sy voorneme om dinge te skep, uitgevoer (Openbaring 4:11). “[Jehovah se] siel het ’n begeerte, en hy sal dit volbring”, het die aartsvader Job gesê (Job 23:13). Hoe bevredigend moes dit tog vir Jehovah gewees het om “alles [te sien] wat hy gemaak het” en te verklaar dat dit “baie goed” is!—Genesis 1:31.

As ons wil hê dat ons doelwitte ’n werklikheid moet word, moet ons ook ’n sterk begeerte hê om dit te bereik. Wat sal ons help om so ’n intense begeerte te ontwikkel? Selfs toe die aarde vormloos en woes was, kon Jehovah die eindresultaat vooruitsien—’n pragtige juweel in die ruimte, tot sy eer en heerlikheid. Net so kan ons die begeerte aankweek om die dinge uit te voer wat ons beplan, deur te peins oor die resultate en die voordele wat dit sal meebring wanneer ons die doelwit bereik. Dit was die geval met die 19-jarige Tony. Hy het nooit sy eerste indrukke vergeet nadat hy ’n takkantoor van Jehovah se Getuies in Wes-Europa besoek het nie. Van toe af het Tony voortdurend gewonder: ‘Hoe sal dit wees om in so ’n plek te woon en te dien?’ Tony het gedurig aan die moontlikheid gedink, en hy het dit altyddeur nagestreef. Hoe bly was hy tog toe sy aansoek om by die takkantoor te dien, ’n paar jaar later goedgekeur is!

Ons omgang met ander wat reeds ’n sekere doelwit bereik het, kan ook by ons ’n begeerte wek om dit te doen. Jayson, wat 30 jaar oud is, het dit nie geniet om aan die veldbediening deel te neem toe hy in sy vroeë tienerjare was nie. Maar nadat hy sy hoërskoolloopbaan voltooi het, het hy ywerig die pionierdiens betree en sodoende ’n voltydse Koninkryksverkondiger geword. Wat het Jayson gehelp om die begeerte aan te kweek om ’n pionier te word? Hy antwoord: “Ek het met ander pioniers gepraat en saam met hulle in die bediening gewerk, en dit het ’n groot invloed op my gehad.”

Dit kan help om ons doelwitte neer te skryf

’n Abstrakte idee word duideliker en realistieser wanneer ons dit in woorde probeer uitdruk. Salomo het gesê dat die regte woorde so kragtig soos osprikkels kan wees om ons lewe te rig (Prediker 12:11). Wanneer daardie woorde neergeskryf word, maak dit ’n groot indruk op die verstand en hart. Waarom anders het Jehovah die konings van Israel dan beveel om self ’n afskrif van die Wet te maak? (Deuteronomium 17:18). Ons kan dus ons doelwitte en hoe ons dit wil bereik, neerskryf en ’n lys maak van struikelblokke wat ons kan verwag, asook maniere om dit te oorkom. Dit kan ook nuttig wees om te identifiseer watter onderwerpe ons moet bestudeer, watter vaardighede ons moet aanleer en watter mense ons kan help en ondersteun.

Geestelike doelwitte het Geoffrey, wat al lank as ’n spesiale pionier in ’n afgesonderde gebied in ’n Asiatiese land dien, gehelp om sy ewewig te behou. Dit was vir hom ’n groot tragedie toe sy vrou onverwags oorlede is. Ná ’n aanpassingstydperk het Geoffrey besluit om hom in sy pionierbediening te verdiep deur doelwitte te stel. Nadat hy sy planne neergeskryf het, het hy hom biddend daarop toegelê om teen die einde van die maand drie nuwe Bybelstudies te begin. Hy het elke dag sy bedrywighede hersien, en elke tien dae het hy gekyk hoe hy gevorder het. Het hy sy doelwit bereik? Met vier nuwe Bybelstudies op sy rapport is sy vreugdevolle antwoord, ja!

Stel korttermyndoelwitte

Sommige doelwitte lyk miskien aanvanklik onbereikbaar. Vir Tony, wat vroeër gemeld is, het dit na ’n droom gelyk om eendag by ’n takkantoor van Jehovah se Getuies te dien. Dit was omdat hy op daardie stadium nie juis ’n goeie lewe gelei nie, en hy het hom nog nie eers aan God toegewy nie. Maar Tony het besluit om sy lewe in ooreenstemming te bring met Jehovah se weë en hom dit ten doel gestel om aan die vereistes te voldoen om gedoop te word. Nadat hy daardie doelwit bereik het, het hy hom voorgeneem om hulp- en gewone pionierdiens te doen en die begindatums daarvoor op sy kalender aangebring. Nadat hy ’n ruk lank as pionier gedien het, het diens by die takkantoor nie meer na ’n onrealistiese doelwit gelyk nie.

Dit sal moontlik ook vir ons goed wees om ons langtermyndoelwitte in ’n paar korttermyndoelwitte te verdeel. Hierdie tussentydse doelwitte kan dit vir ons makliker maak om ’n langtermyndoelwit te bereik. Indien ons ons vordering gereeld aan hierdie kleiner doelwitte meet, kan dit ons help om gefokus te bly. As ons herhaaldelik tot Jehovah bid oor ons planne, sal dit ons ook help om op koers te bly. “Bid onophoudelik”, het die apostel Paulus gemaan.—1 Tessalonisense 5:17.

Vasbeslotenheid en volharding is nodig

Ondanks noukeurige planne en ’n sterk begeerte om dit uit te voer, bly sommige doelwitte onbereikbaar. Die dissipel Johannes Markus was sekerlik baie teleurgesteld toe die apostel Paulus hom nie op sy tweede sendingreis wou saamneem nie! (Handelinge 15:37-40). Markus moes uit hierdie teleurstelling leer en sy doelwit om sy diens uit te brei, aanpas. Hy het dit blykbaar gedoen. Markus is later gunstig deur Paulus vermeld, en hy het noue omgang met die apostel Petrus in Babilon geniet (2 Timoteus 4:11; 1 Petrus 5:13). Sy grootste voorreg was moontlik om ’n geïnspireerde verslag van Jesus se lewe en bediening te skryf.

In ons strewe na geestelike doelwitte kan ons ook terugslae ondervind. Ons moenie moed opgee nie, maar moet eerder ons doelwitte hersien, heroorweeg en aanpas. Wanneer ons struikelblokke teëkom, moet ons met vasbeslotenheid en volharding voortbeur. “Laat jou werke aan Jehovah oor en jou planne sal stewig bevestig word”, verseker die wyse koning Salomo ons.—Spreuke 16:3.

Tog maak omstandighede sekere doelwitte soms onrealisties. Swak gesondheid of gesinsverantwoordelikhede kan byvoorbeeld sekere doelwitte buite ons bereik stel. Ons moet nooit uit die oog verloor nie dat die uiteindelike prys die ewige lewe is—in die hemel of in die Paradys op aarde (Lukas 23:43; Filippense 3:13, 14). Hoe word dit verkry? “Hy wat die wil van God doen, bly vir ewig”, het die apostel Johannes geskryf (1 Johannes 2:17). Hoewel ons situasie dit dalk vir ons onmoontlik maak om ’n sekere doelwit te bereik, kan ons steeds ‘die ware God vrees en sy gebooie onderhou’ (Prediker 12:13). Geestelike doelwitte help ons om ons oë gevestig te hou op die uitvoering van God se wil. Laat ons dit derhalwe gebruik om ons Skepper te verheerlik.

[Venster op bladsy 22]

Stel geestelike doelwitte, soos om:

○ Die Bybel elke dag te lees

○ Elke nommer van Die Wagtoring en Ontwaak! te lees

○ Die gehalte van ons gebede te verbeter

○ Die vrugte van die gees te openbaar

○ Ons diens uit te brei

○ Bekwamer te word in die predikings- en onderrigtingswerk

○ Vaardiger te word in die telefoon-, informele en sakegetuieniswerk