Watter erfenis is jy aan jou kinders verskuldig?
PAVLOS, ’n gesinshoof in Suid-Europa, is selde by die huis om tyd saam met sy vrou en kinders—twee dogters, 13 en 11, en ’n 7-jarige seun—deur te bring. Sewe dae per week werk Pavlos twee lang skofte sodat hy genoeg geld kan maak om sy droom te bewaarheid. Hy wil vir elkeen van sy dogters ’n woonstel koop, en hy wil ’n klein onderneming vir sy seun begin. Sy vrou, Sofia, werk hard om linne en kombuis-, porselein- en silwerware vir hierdie ekstra huishoudings bymekaar te maak. Wanneer hulle gevra word waarom hulle so hard werk, antwoord hulle albei: “Ter wille van ons kinders!”
Soos Pavlos en Sofia doen baie ouers regoor die wêreld hulle bes om hulle kinders ’n goeie begin in die lewe te gee. Party spaar geld vir die kinders se toekomstige gebruik. Ander maak seker dat hulle kinders ’n goeie geleerdheid kry en vaardighede aanleer wat later in die lewe nuttig sal wees. Hoewel die meeste ouers sulke geskenke as ’n erfenis van liefde beskou, kan die voorsiening van hierdie dinge ouers dikwels onder groot druk plaas om te voldoen aan die verwagtinge van familielede, vriende en die gemeenskap waarin hulle woon. Daarom vra besorgde ouers tereg: ‘Hoeveel is ons aan ons kinders verskuldig?’
Maak voorsiening vir die toekoms
Dit is nie net natuurlik nie maar ook ’n skriftuurlike vereiste dat Christenouers vir hulle kinders voorsiening maak. Die apostel Paulus het vir Christene in sy dag gesê: “Ouers moet voorsiening maak vir hulle kinders, nie kinders vir hulle ouers nie” (2 Korintiërs 12:14, The New English Bible). Paulus het verder gesê dat ouers die ernstige verantwoordelikheid het om vir hulle kinders te sorg. Hy het geskryf: “As iemand vir sy eie mense, en veral vir dié wat lede van sy huisgesin is, nie sorg nie, het hy die geloof verloën en is hy erger as ’n ongelowige” (1 Timoteus 5:8). Talle Bybelverslae lig toe dat ’n erfenis belangrik was onder God se knegte in Bybeltye.—Rut 2:19, 20; 3:9-13; 4:1-22; Job 42:15.
Maar soms raak ouers behep met die voorsiening van ’n groot erfenis vir hulle kinders. Waarom? Manolis, ’n vader wat van Suid-Europa na die Verenigde State verhuis het, noem een rede: “Ouers wat die verskriklike gruwels van die Tweede Wêreldoorlog, hongersnood en armoede ervaar het, is vasbeslote om hulle kinders se lot te verbeter.” Hy voeg by: “Weens hulle oordrewe verantwoordelikheidsgevoel en ’n begeerte om hulle kinders die beste begin moontlik in die lewe te gee, benadeel ouers soms hulleself.” Trouens, party ouers ontsê hulleself lewensbenodigdhede of lei ’n uiters eenvoudige lewe sodat hulle materiële besittings vir hulle kinders kan versamel. Maar is dit verstandig van ouers om so ’n weg te volg?
“Nietigheid en groot rampspoed”
Koning Salomo van eertydse Israel het ’n waarskuwing in verband met erfenisse gegee. Hy het geskryf: “Ek, ja ek, het al my harde werk gehaat waaraan ek hard gewerk het onder die son, wat ek sal agterlaat vir die mens wat ná my sal kom. En wie weet of hy wys of dwaas sal wees? Tog sal hy die beheer oorneem oor al my harde werk waaraan ek hard gewerk het en waarin ek wysheid getoon het onder die son. Ook dit is nietigheid. . . . Want daar is die mens wie se harde werk met wysheid en met kennis en met bedrewenheid gedoen is, maar sy deel sal aan ’n mens gegee word wat nie hard gewerk het aan so iets nie. Ook dit is nietigheid en groot rampspoed.”—Prediker 2:18-21.
Soos Salomo verduidelik, besef diegene wat ’n erfenis ontvang, moontlik nie die volle waarde daarvan nie omdat hulle nie self hard daarvoor gewerk het nie. Gevolglik gaan erfgename dalk onverstandig te werk met dit wat die ouers geswoeg het om vir hulle bymekaar te maak. Hulle verkwis dalk selfs hierdie swaar verdiende besittings (Lukas 15:11-16). Watter “nietigheid en groot rampspoed” sal dit tog nie wees nie!
Erfenis en gierigheid
Daar is iets anders wat ouers in gedagte moet hou. In kulture wat groot klem lê op erfbesittings en groot trougeskenke deur ouers, kan kinders gierig raak en aandring op vaste eiendom of ’n bruidskat wat meer is as wat die ouers redelikerwys kan gee. “Wee die vader wat twee of drie dogters het”, skerts Loukas, ’n vader in Griekeland. Hy sê: “Dogters vergelyk dalk wat hulle pa kan gee met wat ander ouers ‘uit vrygewigheid’ vir hulle kinders voorsien. Hulle wys miskien daarop dat hulle kanse om te trou, skraler sal wees as hulle bruidskat nie groot genoeg is nie.”
Manolis, wat vroeër genoem is, sê: “’n Jong man kan die hofmakery uitrek totdat die vader van die toekomstige bruid hom iets vir haar beloof, gewoonlik vaste eiendom of ’n aansienlike bedrag geld. Dit kan amper soos afpersing word.”
Die Bybel waarsku teen alle vorme van gierigheid. Salomo het geskryf: “’n Erfenis word aanvanklik deur gierigheid verkry, maar die toekoms daarvan sal nie geseënd wees nie” (Spreuke 20:21). Die apostel Paulus het beklemtoon: “Die liefde vir geld is ’n wortel van allerhande skadelike dinge.”—1 Timoteus 6:10; Efesiërs 5:5.
“Wysheid tesame met ’n erfdeel”
’n Erfenis het weliswaar waarde, maar wysheid is van veel groter waarde as materiële besittings. Koning Salomo het geskryf: “Wysheid tesame met ’n erfdeel is goed en is voordelig . . . Want wysheid dien as ’n beskerming net soos geld as ’n beskerming dien; maar die voordeel van kennis is dat wysheid die besitters daarvan in die lewe hou” (Prediker 7:11, 12; Spreuke 2:7; 3:21). Hoewel geld ’n mate van beskerming bied en die besitter daarvan in staat stel om te bekom wat hy nodig het, kan ’n mens dit nietemin verloor. Daarenteen kan wysheid—die vermoë om kennis te gebruik om probleme op te los of sekere doelwitte te bereik—iemand help om dwase risiko’s te vermy. Wanneer dit op gepaste godvrugtige vrees gegrond is, kan dit hom help om die ewige lewe te beërf in God se nuwe wêreld wat op hande is—inderdaad ’n kosbare erfenis!—2 Petrus 3:13.
Christenouers lê sulke wysheid aan die dag deur behoorlike prioriteite vir hulleself en hulle kinders te stel (Filippense 1:10). Materiële dinge wat vir die kinders se gebruik versamel word, moenie die voorkeur bo geestelike sake geniet nie. Jesus het sy volgelinge aangespoor: “Hou dan aan om eers [God se] koninkryk en sy regverdigheid te soek, en al hierdie ander dinge sal vir julle bygevoeg word” (Matteus 6:33). Ouers wat geestelike doelwitte vir hulle Christengesin stel, kan ryk seëninge te wagte wees. Die wyse koning Salomo het geskryf: “Die vader van ’n regverdige sal vir seker bly wees; wie vader van ’n wyse word, sal hom ook oor hom verbly. Jou vader en jou moeder sal hulle verbly, en sy wat aan jou geboorte gegee het, sal bly wees.”—Spreuke 23:24, 25.
’n Blywende erfenis
Vir die Israeliete van die ou tyd was ’n erfenis baie belangrik (1 Konings 21:2-6). Maar Jehovah het hulle vermaan: “Hierdie woorde wat ek jou vandag beveel, moet in jou hart wees; en jy moet dit by jou kinders inskerp en daaroor praat wanneer jy in jou huis sit en wanneer jy op die pad loop en wanneer jy gaan lê en wanneer jy opstaan” (Deuteronomium 6:6, 7). Christenouers word eweneens beveel: “Hou aan om [julle kinders] in die dissipline en verstandsregulering van Jehovah op te voed.”—Efesiërs 6:4.
Ouers wat geestelikgesind is, besef dat onderrigting uit die Bybel deel vorm van hulle plig om vir hulle gesin te sorg. Andreas, ’n vader van drie, sê: “As kinders leer om godvrugtige beginsels in hulle lewe toe te pas, sal hulle beter toegerus wees vir die toekoms.” Hierdie erfenis sluit ook in dat hulle gehelp word om ’n persoonlike verhouding met hulle Skepper op te bou en te behou.—1 Timoteus 6:19.
Het jy al daaraan gedink om vir jou kind se geestelike toekoms voorsiening te maak? Wat kan ouers byvoorbeeld doen as hulle kind die voltydse bediening nastreef? Hoewel ’n voltydse bedienaar nooit moet aandring op finansiële bystand of dit moet verwag nie, sal liefdevolle ouers dalk besluit om ‘met hom te deel na gelang van sy behoeftes’ om hom te help om in die voltydse diens te bly (Romeine 12:13; 1 Samuel 2:18, 19; Filippense 4:14-18). So ’n ondersteunende gesindheid sal Jehovah beslis behaag.
Wat is ouers dus aan hulle kinders verskuldig? Christenouers sal nie net in hulle kinders se materiële behoeftes voorsien nie, maar hulle sal seker maak dat hulle kinders ’n ryk geestelike erfenis ontvang wat tot hulle ewige voordeel sal wees. Sodoende sal die woorde in Psalm 37:18 bewaarheid word: “Jehovah ken die dae van die onberispelikes, en hulle erfdeel sal tot onbepaalde tyd bly.”
[Prente op bladsy 26, 27]
Watter toekoms het jy vir jou kinders in gedagte?