Onthou jy?

Het jy dit geniet om die onlangse nommers van Die Wagtoring te lees? Wel, kyk of jy die volgende vrae kan beantwoord:

• Wat kan ’n Christen doen as hy emosioneel en geestelik moeg voel?

Ons moet identifiseer wat die oorsaak van ons moegheid is. Dit kan help as ons ons gewoontes ondersoek en deur ons besittings gaan en elke onnodige gewig aflê. Ons kan realistiese doelwitte volgens ons omstandighede stel. Dit is belangrik dat ons na ons geestelike gesondheid omsien, wat gereelde gebed en bepeinsing moet insluit.—8/15, bladsye 23-6.

• Waarom beskou Jehovah se Getuies die getal 144 000 as letterlik?

Nadat die apostel Johannes vertel is van die 144 000, het hy “’n groot menigte, wat geen mens kon tel nie”, gesien (Openbaring 7:4, 9). As die getal 144 000 simbolies was, sou die trefkrag van die teenstelling verlore gaan. Jesus het dié wat saam met hom sal regeer, ’n “klein kuddetjie” genoem (Lukas 12:32).—9/1, bladsy 30.

• Waarom kon ’n Israeliet ’n dooie dier waarvan die bloed nie uitgeloop het nie, aan ’n uitlander verkoop?

’n Uitlander of ’n inwonende vreemdeling wat nie ’n proseliet geword het nie, was nie onder die Wet nie. ’n Israeliet is dus toegelaat om sulke diere aan hom te gee of te verkoop (Deuteronomium 14:21). ’n Proseliet was egter onder die Wet en sou nie die vleis eet van so ’n dier waarvan die bloed nie uitgeloop het nie (Levitikus 17:10).—9/15, bladsy 26.

• Wat is biomimetika, en waarom is dit vir Christene van belang?

Dit is ’n wetenskaplike veld wat ontwerpe probeer naboots wat in die natuur gevind word. Die Wright-broers het byvoorbeeld ’n vliegtuig ontwerp nadat hulle groot voëls in vlug bestudeer het. Biomimetika kan ’n Christen dus beweeg om heerlikheid aan die Skepper te gee.—10/1, bladsy 9.

• Wie is die mens wat volgens 2 Korintiërs 12:2-4 tot in die paradys weggeruk is?

Hierdie gedeelte volg onmiddellik op die verse waarin Paulus sy apostelskap verdedig het. Aangesien die Bybel van niemand anders praat wat so ’n ondervinding gehad het nie en aangesien Paulus ons daarvan vertel, het Paulus waarskynlik hierdie visioen gehad.—10/15, bladsy 8.

• Wat is van die eienskappe wat Jesus bekwaam maak om te dien as die Leier wat deur God gekies is?

Jesus het volmaakte onkreukbaarheid gehandhaaf en was eerlik en opreg in sy handelinge. Hy was ten volle aan God toegewy. Jesus was baie besorg oor mense en was bereid om te werk.—11/1, bladsye 6-7.

• Waar sal die demone gedurende die Millennium wees?

Ons kan logieserwys tot die gevolgtrekking kom dat hulle gedurende Christus se Duisendjarige Heerskappy saam met Satan in die afgrond sal wees (Openbaring 20:1-3). Genesis 3:15 het die vermorseling van die slang se kop voorspel, wat behels dat hy gedurende die Millennium in die afgrond sal wees. Sy saad sluit die goddelose engele, of demone, in. Die feit dat hulle getoon het dat hulle bang is vir die afgrond, dui aan dat hulle bewus is van hierdie komende opsluiting (Lukas 8:31).—11/15, bladsye 30-1.

• Waarom moet iemand wat alkohol gebruik, versigtig wees, al sorg hy dat hy nie soveel drink dat hy sigbaar dronk is nie?

Party mense toon min tekens van dronkenskap selfs nadat hulle ’n aantal drankies gedrink het. Maar ’n mens kan stadigaan afhanklik raak van alkohol en “aan baie wyn verslaaf” raak (Titus 2:3). Jesus het daarteen gewaarsku dat ons harte “beswaar word met oormatige etery en strawwe drinkery” (Lukas 21:34, 35). ’n Persoon hoef hom nie dronk te drink voordat die drinkery hom lomerig en lui maak nie—fisies sowel as geestelik.—12/1, bladsye 19-21.