Het jy God se beskouing oor sterk drank?

ONGEVEER 20 jaar gelede het argeoloë ’n ou rousteengebou naby die dorp Oermia, Iran, opgegrawe. Daarin het hulle ’n keramiekfles gevind wat, volgens wetenskaplikes, duisende jare oud is en uit die tyd van die vroegste nedersettings dateer. Onlangs is die jongste tegnologie gebruik om die fles te bestudeer. Wetenskaplikes was verbaas om binne-in die fles die oudste chemiese bewys van wynmakery te vind.

Die Bybel bevestig ook duidelik die feit dat wyn, bier en ander sterk drank van die ou tyd af gedrink is (Genesis 27:25; Prediker 9:7; Nahum 1:10, NW). Soos in die geval van ander voedselsoorte, gee Jehovah ons as individue ’n keuse—om sterk drank te drink of nie. Jesus het dikwels wyn saam met sy maaltye gedrink. Johannes die Doper het hom van alkohol onthou.—Matteus 11:18, 19.

Die Bybel verbied die oormatige gebruik van alkohol. Dronkenskap is ’n sonde teen God (1 Korintiërs 6:9-11). In ooreenstemming hiermee laat Jehovah se Getuies nie toe dat enigiemand wat ’n onberouvolle dronkaard word in die Christengemeente bly nie. Diegene in die gemeente wat besluit om sterk drank te drink, moet dit met matigheid doen.—Titus 2:2, 3.

’n Goddelose beskouing

Vandag het baie mense nie God se beskouing oor sterk drank nie. Dit is maklik om te sien dat Satan die misbruik van hierdie ou produk bevorder. Op sommige eilande in die Stille Suidsee is dit byvoorbeeld gebruiklik vir mans om bymekaar te kom om groot hoeveelhede tuisgemaakte gegiste drank te drink. Hierdie sessies kan etlike ure duur en word dikwels gehou—baie mans gee hulle daagliks hieraan oor. Party beskou dit bloot as deel van die kultuur. Soms word bier en sterk drank gebruik in plaas van—of buiten—die plaaslike tuisgemaakte drank. Dronkenskap is dikwels die gevolg.

In ’n ander Pasifiese land is dit byna ongehoord dat mans alkohol matig gebruik. As ’n algemene reël drink hulle om dronk te word. Dit is nie ongewoon vir ’n groep mans om op hulle betaaldag bymekaar te kom en etlike kratte bier, elk met 24 bottels daarin, te koop nie. Eers wanneer die bier op is, hou hulle op met drink. Gevolglik is dronkenskap in die openbaar baie algemeen.

Gegiste drank, soos palmwyn en ander plaaslike brousels, word tradisioneel in Afrikalande gedrink. In sommige gemeenskappe skryf tradisie voor dat alkohol aangebied word wanneer ’n persoon gaste onthaal. Die gasvrye gasheer voorsien gewoonlik meer as wat sy kuiergas kan drink. In een gebied is dit gebruiklik om 12 bottels bier voor elke kuiergas neer te sit.

Baie Japannese maatskappye reël busritte vir hulle werknemers. Groot hoeveelhede sterk drank word saamgeneem en dronkenskap word vergoelik. Party van hierdie maatskappy-uitstappies duur twee of drie dae. In Japan, sê die tydskrif Asiaweek, “word ’n man, van rysboere tot ryk politici, tradisioneel gemeet aan die hoeveelheid drank wat hy kan drink”. Soortgelyke neigings word in ander Asiatiese lande opgemerk. Asiaweek sê dat “Suid-Koreane nou meer sterk drank per persoon drink as enige ander drinkers in die wêreld”.

Drinkfuiwery het ’n baie algemene gebruik op universiteitskampusse in die Verenigde State geword. Volgens The Journal of the American Medical Association, “beskou die meeste fuiwers hulleself nie as probleemdrinkers nie”.a Dit behoort ons nie te verbaas nie, want in baie lande bevorder die media drinkery as ’n avontuurlike, aanvaarbare en gesofistikeerde aktiwiteit. Hierdie propaganda is dikwels spesifiek op die jeug gerig.

In Brittanje het die inname van bier gedurende ’n 20-jaar periode verdubbel en die drink van sterk drank verdriedubbel. Mense begin op ’n jonger ouderdom drink en al hoe meer vroue drink. Soortgelyke neigings word in Oos-Europese en Latyns-Amerikaanse lande opgemerk. Dit word beklemtoon deur ’n ooreenstemmende toename in alkoholisme en alkoholverwante padsterftes. Dit is duidelik dat daar wêreldwyd ’n onmiskenbare toename in alkoholmisbruik is.

Hoeveel is te veel?

Die Bybel se beskouing oor sterk drank is gebalanseerd. Aan die een kant sê die Skrif dat wyn ’n gawe van Jehovah God is wat “die mens se hart kan bly maak” (Psalm 104:1, 15). Wanneer die Bybel aan die ander kant die oormatige gebruik daarvan veroordeel, gebruik dit uitdrukkings soos “strawwe drinkery”, “oordadighede met wyn, swelgerye, drinkpartye”, ‘oorgegee aan baie wyn’ en “aan baie wyn verslaaf wees” (Lukas 21:34; 1 Petrus 4:3; 1 Timoteus 3:8; Titus 2:3). Maar hoeveel is “baie wyn”? Hoe kan ’n Christen vasstel wat God se beskouing oor sterk drank is?

Dit is nie moeilik om dronkenskap te herken nie. Die gevolge daarvan word in die Bybel met hierdie woorde beskryf: “By wie is ‘Ag!’; by wie is ‘Wee my!’; by wie is getwis; by wie is geklaag; by wie is wonde sonder oorsaak; by wie is dofheid van oë? By die wat láát opbly by die wyn, by die wat ingaan om gemengde drank te proe. . . . Jou oë sal vreemde dinge sien en jou hart verkeerde dinge spreek.”—Spreuke 23:29-33.

Te veel alkohol kan verwarring, hallusinasies, bewusteloosheid en ander verstandelike en liggaamlike versteurings veroorsaak. Onder die invloed van alkohol kan iemand beheer oor sy gedrag verloor en homself of ander beseer. Dronkaards is daarvoor bekend dat hulle hulle aan belaglike, aanstootlike of onsedelike gedrag skuldig maak.

Om soveel te drink dat jy dronk word, met die bogenoemde gevolge, is beslis te veel. ’n Persoon kan egter ’n gebrek aan matigheid openbaar sonder om al die tipiese tekens van dronkenskap te toon. Daarom is die vraag of iemand te veel gedrink het dikwels betwisbaar. Waar is die lyn tussen matigheid en oormatige gebruik?

Bewaar jou denkvermoë

Die Bybel stel nie perke deur persentasies vir bloedalkoholkonsenstrasies of ’n ander soort maatstaf te voorsien nie. Alkoholtoleransie verskil van persoon tot persoon. Tog is Bybelbeginsels op alle Christene van toepassing en kan dit ons help om God se beskouing oor sterk drank te ontwikkel.

Die eerste gebod, het Jesus gesê, is om “Jehovah jou God [lief te hê] met jou hele hart en met jou hele siel en met jou hele verstand” (Matteus 22:37, 38). Alkohol het ’n regstreekse uitwerking op die verstand, en die oormatige gebruik daarvan sal verhinder dat jy hierdie allergrootste gebod gehoorsaam. Dit kan goeie oordeel, die vermoë om probleme op te los, die beoefening van selfbeheersing en ander belangrike funksies van die verstand ernstig aantas. Die Skrif vermaan ons: “Bewaar praktiese wysheid en denkvermoë, en hulle sal lewe wees vir jou siel en bekoorlikheid vir jou hals.”—Spreuke 3:21, 22, NW.

Die apostel Paulus versoek Christene dringend: “[Bied] julle liggame aan . . . as ’n offerande wat lewend, heilig en vir God aanneemlik is, ’n heilige diens met julle denkvermoë” (Romeine 12:1). Sou ’n Christen “vir God aanneemlik” wees as hy soveel alkohol drink dat hy sy “denkvermoë” inboet? Gewoonlik bou ’n oormatige drinker geleidelik ’n toleransie vir alkohol op. Hy meen dalk dat sy strawwe drinkery—vir hom—nie die grens van dronkenskap oorskry nie. Maar hy is heel moontlik besig om ’n ongesonde afhanklikheid van alkohol te ontwikkel. Kan so ’n persoon sy liggaam aanbied as “’n offerande wat lewend, heilig” is?

Enige hoeveelheid alkohol wat jou “praktiese wysheid en denkvermoë” as ’n Christen belemmer, is te veel vir jou.

Wat vorm jou beskouing oor alkohol?

’n Christen moet bepaal of sy gesindheid teenoor drank deur huidige neigings of tradisies beïnvloed word. Wat sterk drank betref, wil jy tog sekerlik nie hê jou keuses moet op kulturele neigings of mediapropaganda gebaseer wees nie. Wanneer jy jou eie gesindheid ondersoek, moet jy jou afvra: ‘Word my gesindheid beïnvloed deur wat in die gemeenskap aanvaarbaar is? Of word my gebruik van alkohol deur Bybelbeginsels bepaal?’

Hoewel Jehovah se Getuies nie alle kulturele gebruike verwerp nie, besef hulle dat Jehovah baie gebruike haat wat vandag algemeen aanvaar word. Sommige gemeenskappe vergoelik aborsie, bloedoortappings, homoseksualiteit of veelwywery. Christene tree egter in ooreenstemming op met God se beskouing oor hierdie dinge. Ja, ’n goddelike beskouing sal ’n Christen beweeg om sulke gebruike te haat ongeag of hulle kultureel aanvaarbaar is of nie.—Psalm 97:10.

Die Bybel praat van “die wil van die nasies”, wat “oordadighede met wyn” en “drinkpartye” insluit. Die woord “drinkpartye” dra die gedagte oor van samekomste wat gereël is met die spesifieke doel om groot hoeveelhede alkohol te drink. In Bybeltye was daar blykbaar sommige wat trots was op hulle skynbare vermoë ‘om hulle drank te kan vat’ en wat meer as ander probeer drink het of probeer kyk het wie die meeste kon drink. Die apostel Petrus verwys na hierdie soort gedrag as ’n “lae poel van losbandigheid” waaraan berouvolle Christene geen deel meer het nie.—1 Petrus 4:3, 4.

Sal dit redelik van ’n Christen wees om die beskouing te hê dat solank hy nie dronk word nie dit regtig nie saak maak waar, wanneer of hoeveel hy drink nie? Ons kan ons afvra: Is dit ’n goddelike beskouing? Die Bybel sê: “Hetsy julle eet of drink of enigiets anders doen, doen alles tot heerlikheid van God” (1 Korintiërs 10:31). ’n Groep mans wat bymekaarkom om groot hoeveelhede alkohol in die openbaar te drink, word dalk nie almal dronk nie, maar sal hulle gedrag Jehovah verheerlik? Die Bybel waarsku: “Hou op om na hierdie stelsel van dinge gevorm te word, maar word verander deur julle verstand te hervorm, dat julle julle van die goeie en aanneemlike en volmaakte wil van God kan vergewis.”—Romeine 12:2.

Moenie ander laat struikel nie

Interessant genoeg, dit is dikwels juis daardie kulture wat die oormatige gebruik van alkohol toelaat wat dit afkeur wanneer ’n strawwe drinker beweer dat hy ’n man van God is. In ’n klein gemeenskap in die Stille Suidsee het ’n waarnemer gesê: “Ek bewonder julle mense. Julle verkondig die waarheid. Maar die probleem wat ons sien, is dat julle mans te veel ghrok drink.” Na wat berig word het die individue nie dronk geword nie, maar daardie feit was vir baie in die gemeenskap nie so ooglopend nie. Waarnemers kan maklik die gevolgtrekking maak dat die Getuies, soos die meeste ander mans wat aan drinksessies deelneem, ook dronk word. Kan ’n Christenbedienaar wat aan lang drinksessies deelneem ’n goeie reputasie handhaaf en sy openbare bediening met vrymoedigheid van spraak uitvoer?—Handelinge 28:31.

’n Verslag uit een Europese land meld dat party broers en susters se asems soms sterk na alkohol ruik wanneer hulle by die Koninkryksaal opdaag. Dit het die gewete van ander gepla. Die Bybel waarsku: “Dit is goed om nie vleis te eet of wyn te drink of enigiets te doen waaroor jou broer struikel nie” (Romeine 14:21). ’n Goddelike beskouing oor sterk drank sal ’n ryp Christen aanspoor om ander se gewete in ag te neem, selfs al beteken dit dat jy jou onder sekere omstandighede van alkohol onthou.

Christene is onmiskenbaar anders

Hierdie wêreld het ongelukkig baie dinge gedoen wat Jehovah aanstoot gee deur die goeie dinge wat hy die mensdom gegee het, onder andere sterk drank, te misbruik. Elke toegewyde Christen moet die heersende goddelose beskouings probeer vermy. Sodoende sal mense “die onderskeid sien tussen die regverdige en die goddelose, tussen die wat God dien en die wat Hom nie dien nie”.—Maleagi 3:18.

Wat sterk drank betref, behoort die “onderskeid” tussen Jehovah se Getuies en die wêreld onmiskenbaar te wees. Ware Christene se lewe draai nie om sterk drank nie. Hulle eksperimenteer nie met die hoeveelheid drank wat hulle kan drink sodat hulle gevaarlik na aan dronkenskap kom nie; hulle laat ook nie toe dat sterk drank hulle verhinder om God met hulle hele siel en met ’n helder verstand te dien of dat dit op enige manier daarmee inmeng nie.

As ’n groep het Jehovah se Getuies ’n goddelike beskouing oor sterk drank. Wat van jou? Elkeen van ons kan op Jehovah se seën staatmaak terwyl ons op die Bybel se onderrigting ag slaan “om goddeloosheid en wêreldse begeertes te verwerp en om met gesonde verstand en regverdigheid en godvrugtige toegewydheid te midde van hierdie teenswoordige stelsel van dinge te lewe”.—Titus 2:12.

[Voetnoot]

[Venster/Prent op bladsy 28]

Luister na jou geliefdes

Iemand wat te veel drink, is dikwels die laaste om te besef dat hy ’n probleem het. Familie, vriende en Christen- ouer manne moet nie huiwer om vir geliefdes wat versuim om matigheid voor oë te hou, hulp aan te bied nie. As geliefdes aan die ander kant hulle kommer uitspreek oor jou drinkgewoontes, het hulle waarskynlik goeie rede daarvoor. Gee ag op wat hulle sê.—Spreuke 19:20; 27:6.