’n Skielike tragedie

OWEN, ’n twee en ’n halfjarige seuntjie, het in die badkamer van sy huis gespeel. Hy het daarin geslaag om hoog genoeg te klim sodat hy ’n medisynekassie kon bykom wat sy ouers gedink het buite sy bereik was. Een van die bottels daarin het sy aandag getrek. Hy het dit oopgemaak en die vloeistof daarin gedrink—met tragiese gevolge.

Die bottel het bytsuur bevat, en ongelukkig het klein Owen gesterf. Sy ouers was ontroosbaar. Sy pa, Percy, het vertroosting by sy kerk gesoek. “Waarom het dit gebeur?” het hy gevra. Die geestelike het geantwoord: “God wou nog ’n engeltjie in die hemel hê.” Die verpletterde en bedroefde ouer het gevoel dat dit heeltemal onregverdig was. Wou God regtig gehad het dat so ’n tragedie moes plaasvind? ’n Ontnugterde Percy het besluit om niks meer met sy kerk te doen te hê nie.

Wanneer Percy gedink het aan wat gebeur het, het hy gewonder: ‘Verduur my seuntjie nog pyn? Sal ek hom ooit weer sien?’

Jy het dalk ook al gewonder wat by die dood gebeur en of dit in die toekoms moontlik sal wees om met afgestorwe dierbares herenig te word. God se Woord, die Bybel, werp lig op hierdie vrae. Dit bevat duidelike en vertroostende antwoorde vir almal wat deur soortgelyke tragedies getref is. Wat meer is, dit openbaar ’n wonderlike vooruitsig wat God belowe het—die opstanding.

Lees asseblief die volgende artikel om meer van hierdie wonderlike hoop te leer.