Vrae van lesers

Waarom het die dissipels, toe hulle hoor dat die gevange Petrus by die poortdeur is, gesê: “Dit is sy engel”?—Handelinge 12:15.

Die dissipels het dalk verkeerdelik aangeneem dat ’n engeleboodskapper wat Petrus verteenwoordig, by die poort gestaan het. Kyk na die konteks van hierdie Skrifgedeelte.

Petrus is gearresteer deur Herodes, wat Jakobus laat doodmaak het. Die dissipels het dus goeie rede gehad om te glo dat Petrus ook om die lewe gebring sou word. In die tronk is Petrus, geboei met kettings, deur vier groepe van vier soldate elk bewaak. Toe is hy een nag wonderdadig vrygelaat en deur ’n engel uit die tronk gelei. Toe Petrus uiteindelik besef wat gebeur, het hy gesê: “Nou weet ek inderdaad dat Jehovah sy engel uitgestuur en my verlos het uit Herodes se hand.”—Handelinge 12:1-11.

Petrus het onmiddellik na die huis van Maria gegaan, die moeder van Johannes Markus, waar ’n hele paar dissipels bymekaar was. Toe hy aan die poortdeur klop, het ’n diensmeisie met die naam Rode gaan kyk wie daar is. Toe sy Petrus se stem herken, het sy gehardloop om die ander te gaan vertel sonder om die deur vir hom oop te maak! Eers kon die dissipels nie glo dat Petrus by die poort is nie. Hulle het eerder verkeerdelik aangeneem: “Dit is sy engel.”—Handelinge 12:12-15.

Het die dissipels geglo dat Petrus alreeds doodgemaak is en dat sy liggaamlose gees by die poort was? Dit kon nouliks die geval wees, want Jesus se volgelinge het die skriftuurlike waarheid aangaande die dooies geken—dat hulle “bewus van hoegenaamd niks” is nie (Prediker 9:5, 10). Wat kon die dissipels dan bedoel het toe hulle gesê het: “Dit is sy engel”?

Jesus se dissipels het geweet dat engele deur die geskiedenis heen persoonlike hulp aan God se volk verleen het. Jakob het byvoorbeeld gepraat van “die engel wat my uit alle rampspoed verlos het” (Genesis 48:16). En Jesus het vir sy volgelinge aangaande ’n jong kind in hulle midde gesê: “Sorg dat julle nie een van hierdie kleintjies verag nie; want ek sê vir julle dat hulle engele in die hemel altyd die aangesig aanskou van my Vader wat in die hemel is.”—Matteus 18:10.

Dit is interessant dat Young’s Literal Translation of the Holy Bible die woord agʹge·los (“engel”) as “boodskapper” weergee. Dit lyk asof daar ’n opvatting onder sommige Jode bestaan het dat elke kneg van God sy eie engel het—as ’t ware ’n “beskermengel”. Hierdie opvatting word natuurlik nie regstreeks in God se Woord geleer nie. Dit is nietemin moontlik dat die dissipels, toe hulle gesê het: “Dit is sy engel”, aangeneem het dat ’n engeleboodskapper wat Petrus verteenwoordig, by die poort gestaan het.