Het jy ’n beskermengel?
GLO jy dat jy ’n beskermengel het? Baie mense dink hulle het. Trouens, ’n sekere vrou in westelike Kanada het glo ’n baie spesiale gawe wat engele betref. Sy beweer dat sy jou met jou beskermengel in aanraking kan bring as jy haar jou volle naam asook $200 (R830) gee. Eerstens mediteer sy deur stip na ’n kersvlam te kyk. Daarna sien sy ’n visioen waarin jou engel haar ’n boodskap gee om aan jou oor te dra. Die vrou gee boonop vir jou ’n tekening van hoe jou engel lyk.
Vir party kom dit ooreen met ’n verhaal oor die Franse koning Lodewyk IX. Hy het glo baie duur vere gekoop wat kastig van die vlerke van die aartsengel Migael afgeval het. Baie wat hierdie verhaal in twyfel trek, sal nie vir ’n oomblik die Kanadese vrou se bewerings betwyfel nie.
Beheptheid met engele
In die laaste jare was daar geweldige belangstelling in engele. Op televisie en in rolprente, boeke, tydskrifte en nuusbriewe word daar vir ons vertel van engele wat diegene bemoedig wat ernstig siek is, diegene vertroos wat treur, wysheid bekend maak en mense uit die kloue van die dood red. In die Verenigde State kyk ongeveer 20 miljoen kykers elke week na ’n televisiereeks wat uitbeeld hoe engele mense in hulle lewe help. Een boekwinkel het meer as 400 boeke oor engele.
’n Boek wat onlangs vrygestel is, vertel hoe beskermengele die lewens van soldate in gevegte gered het. Plakkers op motorbuffers sê dat die bestuurders deur beskermengele beskerm word. Organisasies, konferensies en seminare bevorder die bestudering van engele en help mense skynbaar om met hulle te kommunikeer.
Eileen Freeman is die skrywer van drie boeke oor engele en die uitgewer van ’n tydskrif wat uitsluitlik aan hulle gewy is. Sy voer aan: “Ek glo dat daar vir elke engel in die hemel ’n beskermengel op die aarde is, ’n wese wie se pligte nie alleen behels om God in die hemelse ryk te loof nie, maar om in werklikheid na menslike wesens en ander lewensvorme op die aarde om te sien. ’n Beskermengel word oor elkeen van ons aangestel wanneer ons moeder swanger raak en waak oor ons terwyl ons in die baarmoeder groei, gedurende ons geboorte, gedurende ons lewe in hierdie wêreld, totdat die engel ons van hierdie wêreld bevry en ons na die heerlikheid van die hemel lei.” Dit is ’n goeie beskrywing van die gewilde beskouing van beskermengele.
In hierdie spanningsvolle en moeilike tye wil mense graag glo dat ons ons eie beskermengel het, wie se plig dit is om ons te beskerm. Wat sê God se Woord, die Bybel, hieromtrent? Moet ons met engele in aanraking probeer kom? Gee hulle om wat ons sedelike standaarde en godsdiensoortuigings is? Watter soort hulp kan ons van hulle verwag? Hierdie vrae sal in die volgende artikel beantwoord word.