Wat ander van ons dink—Maak dit saak?
BYNA almal hou daarvan om geprys te word. Komplimente kan ons goed laat voel en ons ’n gevoel van voldoening gee. Die goedkeuring van ander kan ons selfs aanspoor om ons nog meer in te span. Die teenoorgestelde is die geval wanneer ons agterkom dat party mense ’n ongunstige opinie van ons het. ’n Kil reaksie of ’n kritiese opmerking kan ons gees heeltemal verpletter. Wat ander van ons dink, kan ’n groot uitwerking hê op wat ons van onsself dink.
Dit sou ’n fout wees om ander se beskouing van ons te ignoreer. Ons kan eintlik daarby baat vind wanneer ander ons gedrag in oënskou neem. Wanneer die menings van ander op hoë sedelike beginsels gegrond is, kan dit ons ten goede beïnvloed en ons aanspoor om regskape te wees (1 Korintiërs 10:31-33). Maar die openbare mening is dikwels baie onregverdig. Dink aan die verwronge beskouing wat die hoofpriesters en ander van Jesus Christus gehad het toe “hulle begin skreeu [het] en gesê [het]: ‘Hang hom aan die paal! Hang hom aan die paal!’” (Lukas 23:13, 21-25). Beskouings wat op valse inligting gegrond is of wat deur afguns of vooroordeel beïnvloed is, moet dalk eenvoudig verwerp word. Daarom moet ons goeie oordeel aan die dag lê en verstandig reageer op die menings van ander.
Wie se mening maak saak?
Ons wil die goedkeuring hê van diegene wat na aan ons is in ware aanbidding. Dit sluit gelowige gesinslede sowel as ons Christenbroers en -susters in (Romeine 15:2; Kolossense 3:18-21). Die liefde en respek van medegelowiges en die “wedersydse aanmoediging” wat onder hulle gevind word, beteken vir ons baie (Romeine 1:11, 12). ‘Met ootmoed ag ons ander hoër as onsself’ (Filippense 2:2-4). Ook soek en waardeer ons die goedkeuring van “dié wat die leiding onder [ons] neem”—die ouer manne in die gemeente.—Hebreërs 13:17.
“’n Goeie getuienis . . . van die mense wat buite is”, is ook wenslik (1 Timoteus 3:7). Hoe goed is dit tog wanneer ongelowige familielede, werksmaats en bure ons respekteer! En probeer ons nie ’n goeie indruk laat by die mense vir wie ons getuig sodat hulle die Koninkryksboodskap goedgesind sal wees nie? As ons in die gemeenskap bekend staan as mense wat sedelik rein, opreg en eerlik is, verheerlik dit God (1 Petrus 2:12). Maar ons kan nooit Bybelbeginsels prysgee om die guns van ander te verkry nie; ook kan ons ons nie anders voordoen as wat ons werklik is om hulle te beïndruk nie. Ons moet besef dat dit onmoontlik is om almal tevrede te stel. Jesus het gesê: “As julle ’n deel van die wêreld was, sou die wêreld lief wees vir wat syne is. En omdat julle geen deel van die wêreld is nie, maar ek julle uit die wêreld uitgekies het, daarom haat die wêreld julle” (Johannes 15:19). Kan ons enigiets doen om die respek te verkry van diegene wat ons teëstaan?
Verkry die respek van teenstanders
“Julle sal weens my naam vir alle mense voorwerpe van haat wees”, het Jesus gewaarsku, “maar wie tot die einde toe volhard het, hy sal gered word” (Matteus 10:22). Hierdie haat gee soms aanleiding tot kwaadwillige beskuldigings. Bevooroordeelde staatsamptenare bestempel ons dalk as “opruiend” of “ondermynend”. Uitgesproke teenstanders beweer miskien dat ons ’n lastige sekte is wat onderdruk moet word (Handelinge 28:22). Hierdie valse beskuldigings kan soms weerlê word. Hoe? Deur die apostel Petrus se raad te volg: “[Wees] gereed om julle te verdedig voor elkeen wat van julle ’n rede vir die hoop in julle eis, maar doen dit met sagmoedigheid en diep respek” (1 Petrus 3:15). Daarbenewens moet ons “heilsame woorde [gebruik] wat nie veroordeel kan word nie; sodat die man aan die kant van die teenstanders beskaamd kan word, omdat hy niks veragteliks het om van ons te sê nie”.—Titus 2:8.
Terwyl ons ons naam van smaad probeer suiwer, hoef ons nie mismoedig of oorweldig te voel wanneer ons op onregverdige wyse beswadder word nie. Jesus, die volmaakte Seun van God, is beskuldig van laster, sedisie en selfs spiritisme (Matteus 9:3; Markus 3:22; Johannes 19:12). Die apostel Paulus is beswadder (1 Korintiërs 4:13). Jesus sowel as Paulus het sulke kritiek geïgnoreer en besig gebly met hulle werk (Matteus 15:14). Hulle het geweet dat hulle nooit die goedkeuring van hulle vyande sou kon verkry nie, aangesien “die hele wêreld . . . in die mag van die bose [lê]” (1 Johannes 5:19). Vandag kom ons voor dieselfde uitdaging te staan. Ons hoef nie geïntimideer te voel wanneer kwaadwillige teenstanders leuens oor ons versprei nie.—Matteus 5:11.
Menings wat werklik tel
Wat mense van ons dink, wissel grootliks, afhangende van hulle beweegredes en wat hulle van ons gehoor het. Ons word deur sommige geprys en geëer, deur ander sleggemaak en gehaat. Maar solank ons deur Bybelbeginsels gerig word, het ons alle rede om gelukkig te wees en gemoedsrus te hê.
Die apostel Paulus het geskryf: “Die hele Skrif is deur God geïnspireer en is nuttig om te onderrig, om tereg te wys, om dinge reg te stel, om in regverdigheid te dissiplineer, sodat die mens van God volkome bevoeg kan wees, ten volle toegerus vir elke goeie werk” (2 Timoteus 3:16, 17). Ons verwerf die guns van Jehovah God en van sy Seun, Jesus Christus, deur God se Woord met waardering as ons gids in alle dinge te aanvaar. Op die ou end is dit die menings van Jehovah en sy Seun wat die meeste saak maak. Wat hulle van ons dink, weerspieël ons werklike waarde. Ons lewe hang per slot van rekening van hulle goedkeuring af.—Johannes 5:27; Jakobus 1:12.
[Lokteks op bladsy 30]
“Lof laat my beskaamd staan, want ek smeek stilletjies daarvoor.”—INDIESE DIGTER RABINDRANATH TAGORE
[Prente op bladsy 31]
Die mening van ons medegelowiges maak saak
[Foto-erkenning op bladsy 30]
Culver Pictures