Hulle verkondig die goeie nuus aan die dowes

“HULLE bring vir julle geestelikheid!” Dit is hoe die bestuurder van ’n tehuis vir bejaardes in Navalcarnero, Madrid, Spanje, onlangs die besoeke van Jehovah se Getuies aan sy sentrum beskryf het. Wat het hom beweeg om dit te sê?

Etlike van die inwoners van die Rosas del Camino-sentrum is doof. Maar aangesien die Getuies die moeite gedoen het om Spaanse Gebaretaal te leer, kan hulle met hierdie inwoners kommunikeer. Die bestuurder het die Getuies lof toegeswaai omdat hulle hulle tyd vryelik opoffer om geestelike waardes te leer aan diegene wat hulp nodig het. Hy het gesien dat dit ’n goeie uitwerking op die inwoners het wanneer hulle die goeie nuus van die Koninkryk geleer word. En die inwoners—veral dié met gehoor- of gesigsgebreke—waardeer ook die Getuies se besoeke baie.

Eulogio, een van die inwoners wat blind en doof is, studeer nou die Bybel saam met Jehovah se Getuies. Eendag het ’n bejaarde man die Getuie tydens die studie genader en vir hom ’n gedig gegee wat die inwoners geskryf het as ’n bewys van hulle dankbaarheid. Die titel van die gedig was: “Om ’n Getuie te wees.” Dit het gedeeltelik gesê: “Hulle lewe ’n sinvolle, goed gedissiplineerde lewe, en van Jehovah kry hulle vreugdevolle wysheid. Hulle gaan keer op keer na die huise omdat hulle op Jehovah vertrou.”

Dit is juis hierdie vertroue op Jehovah wat baie Getuies regoor die wêreld beweeg het om die gebaretaal van die dowe mense in hulle land te leer. Sodoende verkondig hulle die aanmoedigende boodskap van hoop uit die Bybel aan die dowes.