Bydraes wat God se hart verbly
DIT is nie ’n mooi verhaal nie. Koningin Atalia het deur middel van bedrog en moord die troon van Juda oorgeneem. Onder die wanindruk dat al die natuurlike erfgename doodgemaak is, het sy haarself koningin gemaak. ’n Ander vrou, die prinses Joseba, wat baie lief was vir Jehovah en vir sy Wet, het een van die koninklike nakomelinge, die baba Joas, moedig weggesteek. Joseba en haar man, die hoëpriester Jojada, het die erfgenaam ses jaar lank in hulle woning op die tempelterrein verborge gehou.—2 Konings 11:1-3.
Teen die tyd dat Joas sewe jaar oud was, was die hoëpriester Jojada gereed om sy plan uit te voer om die koningin te verwyder van die troon wat sy wederregtelik in besit geneem het. Hy het die seun te voorskyn gebring en hom as regmatige erfgenaam van die koninkryk gekroon. Die bose koningin Atalia is toe deur die koninklike wagte tot buite die tempelterrein geneem en tereggestel, tot die verligting en vreugde van die volk. Deur hulle dade het Jojada en Joseba grootliks bygedra tot die herstel van ware aanbidding in die land Juda. Maar nog belangriker, hulle het bygedra tot die behoud van die koninklike lyn van Dawid, wat tot die Messias sou lei.—2 Konings 11:4-21.
Die pas gekroonde koning sou ook ’n bydrae maak wat God se hart sou verbly. Herstelwerk aan Jehovah se huis was dringend nodig. Atalia se onbeteuelde ambisie om alleenheerser van Juda te wees, het nie net daartoe gelei dat die tempel verwaarloos is nie, maar ook dat dit geplunder is. Joas was dus vasbeslote om die tempel te herbou en te herstel. Hy het sonder versuim ’n edik uitgevaardig om die nodige fondse in te samel vir die herstelwerk aan Jehovah se huis. Hy het gesê: “Al die geld vir die heilige offers wat na die huis van Jehovah gebring word, die geld wat vir elkeen vasgestel is, die geld vir die siele volgens elkeen se waardebepaling, al die geld wat elkeen se hart hom beweeg om na die huis van Jehovah te bring, moet die priesters vir hulle neem, elkeen van sy kennisse; en húlle moet die krake van die huis herstel, waar ’n kraak ook al gevind word.”—2 Konings 12:4, 5.
Die volk het gewillig bygedra. Die priesters het egter nie hulle plig om die tempel te herstel, heelhartig nagekom nie. Die koning het dus besluit om self iets daaromtrent te doen en het beveel dat alle bydraes direk in ’n spesiale kis geplaas word. Hy het Jojada oor alles aangestel, en die verslag sê: “Die priester Jojada het toe ’n kis geneem en ’n gat in die deksel daarvan geboor en dit langs die altaar gesit, aan die regterkant as ’n mens in die huis van Jehovah inkom, en daarin het die priesters, die deurwagters, al die geld gegooi wat in die huis van Jehovah ingebring is. En wanneer hulle gesien het dat daar baie geld in die kis was, het die sekretaris van die koning en die hoëpriester opgekom, en hulle het dit dan saamgebind en die geld getel wat in die huis van Jehovah gevind is. En hulle het die afgetelde geld oorgegee in die hande van dié wat die werk gedoen het, wat oor die huis van Jehovah aangestel was. Op hulle beurt het hulle dit uitbetaal aan die bewerkers van hout en aan die bouers wat aan die huis van Jehovah gewerk het, en aan die messelaars en aan die klipkappers, en om balke en gekapte klippe te koop om die krake van die huis van Jehovah te herstel, en vir alles wat uitgegee is aan die huis om dit te herstel.”—2 Konings 12:9-12.
Die volk het heelhartig gereageer. Jehovah se huis van aanbidding is herstel sodat sy aanbidding op ’n waardige wyse kon voortgaan. Alle bydraes is dus vir die regte doel gebruik. Koning Joas het daarvan seker gemaak!
Vandag let Jehovah se organisasie noukeurig daarop dat alle bydraes op die regte manier gebruik word om Jehovah se aanbidding te bevorder, en ware Christene het soos daardie eertydse Israeliete gereageer—heelhartig. Dalk is jy onder diegene wat gedurende die afgelope diensjaar tot die bevordering van Koninkryksbelange bygedra het. Kom ons kyk na ’n paar van die maniere waarop jou bydraes gebruik is.
DRUKWERK
Die volgende publikasies is wêreldwyd vir studie en verspreiding gedruk:
• Boeke: 47 490 247
• Boekies: 6 834 740
• Brosjures: 167 854 462
• Kalenders: 5 405 955
• Tydskrifte: 1 179 266 348
• Traktate: 440 995 740
• Video’s: 3 168 611
Drukwerk word in Afrika, Noord-, Sentraal- en Suid-Amerika, Asië, Europa en eilande van die Stille Oseaan gedoen—altesaam 19 lande.
“My naam is Katelyn May. Ek is agt jaar oud. Ek het $28 [R192] en ek wil dit vir julle gee om vir die drukperse te help betaal. Julle jong suster, Katelyn.”
“Ons het as ’n gesin oor die nuwe perse gepraat. Ons kinders, wat 11 en 9 jaar oud is, het besluit om van hulle spaargeld te neem en ook ’n bydrae te gee. Ons stuur hulle bydrae saam met ons s’n.”
BOUWERK
Die volgende is van die bouprojekte wat onderneem is om die bedrywighede van Jehovah se Getuies te ondersteun:
• Koninkryksale in lande met beperkte middele: 2 180
• Byeenkomssale: 15
• Takkantore: 10
• Internasionale vrywilligers in voltydse diens: 2 342
“Hierdie naweek het ons die eerste vergadering in ons nuwe Koninkryksaal gehou. Ons is so bly dat ons ’n behoorlike plek het waar ons ons Vader, Jehovah God, kan loof. Ons is dankbaar teenoor Jehovah en teenoor julle dat julle in ons behoeftes voorsien deur meer Koninkryksale te bou. Ja, ons Koninkryksaal is werklik ’n aanwins vir die buurt.”—Chili.
“Die broers en susters waardeer werklik die hulp wat Jehovah se organisasie voorsien. Ons praat vandag nog oor die wonderlike tyd wat ons saam met die bouspan geniet het.”—Moldowa.
“Ek en my vrou het onlangs ons 35ste huweliksherdenking gevier. Ons het probeer besluit wat om vir mekaar vir die geleentheid te gee, en ons het besluit om iets aan Jehovah en sy organisasie terug te gee, want sonder hulle hulp sou ons waarskynlik nie ’n sukses van ons huwelik gemaak het nie. Ons wil graag hê dat die geld wat ons stuur, gebruik word om ’n Koninkryksaal in een van die minderbevoorregte lande te help bou.”
“Ek het onlangs geld geërf, en aangesien daar min dinge is wat ek wil hê en nog minder is wat ek nodig het, wil ek graag die ingeslote geld vir julle gee om Koninkryksale te help bou, wat in baie lande so dringend nodig is.”
NOODLENIGING
In hierdie laaste dae vind rampe dikwels sonder waarskuwing plaas. Baie van Jehovah se Getuies gee bykomende bydraes sodat hulle broers in geteisterde gebiede gehelp kan word. Ter herinnering: Bydraes vir noodleniging word as deel van die wêreldwye werk geadministreer. Die volgende is van die plekke waar Jehovah se Getuies rampslagoffers gehelp het:
• Afrika
• Asië
• Karibiese gebied
• Eilande van die Stille Oseaan
“Ek en my man wil julle baie graag bedank vir die noodlenigingsbystand wat julle verleen het nadat orkane skade hier aangerig het. Ons kon ’n nuwe dak op ons huis sit. Ons waardeer dit werklik dat julle so gou gereageer het.”
“My naam is Connor, en ek is 11. Toe ek gesien het hoeveel skade die tsoenami aangerig het, wou ek help. Ek hoop hierdie bydrae sal my broers en susters help.”
SPESIALE VOLTYDSE DIENAARS
’n Aantal Christene dien voltyds in die evangelisasiewerk of in Bethelhuise. Sommige voltydse vrywilligers word deur vrywillige bydraes onderhou. Die volgende val onder hulle:
• Sendelinge: 2 635
• Reisende opsieners: 5 325
• Betheliete: 20 092
“Omdat ek [vyfjarige seuntjie] nog nie by Bethel kan gaan werk nie, wil ek hierdie bydrae met baie liefde stuur. Wanneer ek groot is, gaan ek Bethel toe om hard te gaan werk.”
Bevordering van die Bybelonderrigtingswerk
Jesus Christus het sy volgelinge beveel om “dissipels [te maak] van mense van al die nasies” (Matteus 28:19). In gehoorsaamheid aan sy woorde is Jehovah se Getuies besig om in 235 lande die Bybel se boodskap te verkondig en aan ander te leer. Hulle druk en versprei Bybellektuur in 413 tale.
Ja, die waardevolste bydrae wat ’n Christen kan gee om meer mense te help om van God en Sy voornemens te leer, is sy tyd. Jehovah se Getuies het baie van hulle tyd en krag gebruik om hulle naaste te help. Hulle het ook in finansiële sin mildelik bygedra, en al hulle bydraes, in watter vorm ook al, het gehelp om Jehovah se naam en voornemens regoor die aarde bekend te maak. Mag Jehovah voortgaan om hierdie pogings te seën om ander te help om meer van hom te leer (Spreuke 19:17). Hierdie bereidwilligheid om te help, verbly Jehovah se hart!—Hebreërs 13:15, 16.
[Venster op bladsy 28-30]
Maniere waarop party verkies om te gee
BYDRAES VIR DIE WÊRELDWYE WERK
Baie sit ’n bedrag opsy wat hulle in die bydraebussies gooi wat gemerk is “Bydraes vir die wêreldwye werk—Matteus 24:14”.
Gemeentes stuur hierdie bydraes elke maand na die takkantoor van Jehovah se Getuies in hulle land. Vrywillige geldelike bydraes kan ook regstreeks gestuur word na Watch Tower Bible and Tract Society of Pennsylvania, Aandag: Rekeningafdeling, Privaatsak X2067, Krugersdorp, 1740, Suid-Afrika, of na die takkantoor van Jehovah se Getuies in die land waar jy woon. Tjeks wat na die bogenoemde adres gestuur word, moet uitgemaak word aan “Watch Tower”. Juwele of ander kosbare artikels kan ook geskenk word. ’n Kort brief wat meld dat dit ’n regstreekse skenking is, moet hierdie bydraes vergesel.
BEPLANDE SKENKINGS
Benewens regstreekse geldskenkings is daar ander maniere waarop ’n mens kan gee om Koninkryksdiens in alle wêrelddele te bevorder. Dit sluit in:
Versekering: Watch Tower kan as die begunstigde van ’n lewensversekeringspolis of in ’n aftree-/pensioenskema benoem word.
Aandele en obligasies: Aandele en obligasies kan aan Watch Tower geskenk word as ’n regstreekse skenking.
Vaste eiendom: Verkoopbare vaste eiendom kan regstreeks geskenk word of dit kan, in die geval van residensiële eiendom, geskenk word op voorwaarde dat die skenker lewensreg daarop het. Voordat enige vaste eiendom oorgedra word, moet ’n mens eers in aanraking kom met die takkantoor in die land waar jy woon.
Testamente: Eiendom of geld kan deur ’n wettige testament aan Watch Tower bemaak word.
As jy meer inligting wil hê, kan jy gerus skriftelik of per telefoon in verbinding tree met die Rekeningafdeling by die adres hieronder of met die takkantoor van Jehovah se Getuies in die land waar jy woon.
Rekeningafdeling:
Watch Tower Bible and Tract Society of Pennsylvania
Privaatsak X2067
Krugersdorp, 1740
Suid-Afrika
Telefoon: (011) 761-1000
[Foto-erkenning op bladsy 27]
Faithful-video: Stalin: U.S. Army photo