Wat is God se Koninkryk?

WAT was die tema van Jesus se predikingsboodskap? Volgens Jesus self was dit God se Koninkryk (Lukas 4:43). Toe mense na hom geluister het, het hulle sekerlik gehoor dat hy baie na hierdie Koninkryk verwys. Was hulle verward of uit die veld geslaan? Het hulle hom gevra wat hierdie Koninkryk is? Nee. Daar is geen verslag in die Evangelies van sulke vrae nie. Was God se Koninkryk dan ’n bekende begrip vir daardie mense?

Die feit is dat die eertydse Geskrifte wat die Jode as heilig geag het, hierdie Koninkryk beskryf het en in duidelike en spesifieke terme geopenbaar het wat dit is en wat dit tot stand sal bring. Vandag kan ons op ’n baie soortgelyke manier selfs meer oor die Koninkryk leer—deur na die Bybel te gaan. Kom ons kyk na sewe waarhede wat die Bybel ons oor die Koninkryk leer. Die eerste drie was geredelik beskikbaar vir die Jode van Jesus se dag en vroeër. Die volgende drie is gedurende die eerste eeu deur Christus of deur sy apostels geopenbaar. Die laaste een het in óns tyd duidelik geword.

1. God se Koninkryk is ’n werklike regering, een wat vir ewig sal bestaan. Die eerste profesie in die Bybel het geopenbaar dat God vir die getroue mensdom ’n redder sou stuur. Hy is die “saad” genoem en sou die verskriklike euwels wat deur die opstand van Adam, Eva en Satan veroorsaak is, ongedaan maak (Genesis 3:15). Veel later is daar vir die getroue koning Dawid iets opwindends oor hierdie “saad”, of Messias, gesê. Hy sou oor ’n Koninkryk regeer. Hierdie regering sou van alle ander verskil. Dit sou vir ewig bestaan.—2 Samuel 7:12-14.

2. God se Koninkryk sal ’n einde maak aan alle menseregerings. Die profeet Daniël is ’n visioen gegee waarin hy ’n opeenvolging van wêreldmoondhede gesien het, wat deur die geskiedenis heen gestrek het tot in ons tyd. Let op die opwindende klimaks van hierdie visioen: “In die dae van dié [laaste mense]konings sal die God van die hemel ’n koninkryk oprig wat nooit vernietig sal word nie. En die koninkryk sal aan geen ander volk oorgedra word nie. Dit sal al hierdie koninkryke verbrysel en daar ’n einde aan maak, en self sal dit tot onbepaalde tye bly staan.” Al die koninkryke, of regerings, van hierdie wêreld—met hulle oorloë, onderdrukking en korrupsie—sal dus vir ewig vernietig word. En soos Daniël se profesie toon, sal God se Koninkryk binnekort oor die hele aarde heers (Daniël 2:44, 45). Dit is ’n konkrete werklikheid en sal vir altyd die enigste regering wees.a

3. God se Koninkryk sal ’n einde maak aan oorloë, siekte, hongersnood en selfs die dood. Opwindende Bybelprofesieë toon wat God se Koninkryk hier op die aarde sal doen. Hierdie regering sal doen wat geen mense-instelling ooit gedoen het of ooit kan doen nie. Stel jou voor—alle oorlogswapens word vir ewig vernietig! “Hy laat oorloë ophou tot aan die einde van die aarde” (Psalm 46:9). Geen dokters, hospitale of enige siektes meer nie. “Geen inwoner sal sê: ‘Ek is siek’ nie” (Jesaja 33:24). Geen hongersnood, voedseltekorte, ondervoeding of verhongering meer nie. “Daar sal volop graan op die aarde wees” (Psalm 72:16). Geen begrafnisse, lykwake, begraafplase of lykshuise meer nie, en ook nie die droefheid wat daarmee gepaardgaan nie. Die dood, ons meedoënlose vyand, sal uiteindelik oorwin wees. God “sal die dood vir ewig verswelg, en die Soewereine Heer Jehovah sal beslis die trane van alle gesigte afvee”.—Jesaja 25:8.

4. God se Koninkryk het ’n Heerser wat deur God gekies is. Die Messias het homself nie aangestel nie, en hy is ook nie deur onvolmaakte mense gekies nie. Hy is persoonlik deur Jehovah God gekies. Die titels Messias en Christus dui ook hierop. Albei woorde beteken “Gesalfde”. Hierdie Koning is dus deur Jehovah gesalf, of vir sy spesiale amp benoem. God sê van hom: “Kyk! My kneg, wat ek ondersteun! My uitverkorene, wat my siel goedgekeur het! Ek het my gees in hom geplaas. Hy sal geregtigheid vir die nasies voortbring” (Jesaja 42:1; Matteus 12:17, 18). Wie weet beter as ons Skepper watter soort Heerser ons nodig het?

5. Die Heerser van God se Koninkryk het voor die hele mensdom getoon dat hy sy posisie waardig is. Jesus van Nasaret was die voorspelde Messias. Hy is in die geslagslyn gebore wat deur God bepaal is (Genesis 22:18; 1 Kronieke 17:11; Matteus 1:1). Toe hy op aarde was, het hy talle profesieë oor die Messias vervul wat eeue vroeër opgeteken is. Hy is ook uit die hemel as die Messias geïdentifiseer. Hoe so? Wel, God het uit die hemel gepraat en hom as Sy eie Seun geïdentifiseer; engele het Jesus as die voorspelde Messias uitgewys; en Jesus het wonderwerke verrig—dikwels voor honderde of selfs duisende ooggetuies—wat beslis deur middel van God se krag gedoen is.b Jesus het oor en oor getoon watter soort Heerser hy sou wees. Hy het nie net die krag gehad om mense te help nie, maar ook die begeerte (Matteus 8:1-3). Hy was onselfsugtig, medelydend, moedig en nederig. Die verslag van sy lewe op aarde is in die Bybel vir almal om te lees.

6. God se Koninkryk het 144 000 medeheersers saam met die Christus. Jesus het gesê dat ander, met inbegrip van sy apostels, saam met hom in die hemel sou heers. Hy het hierdie groep die “klein kuddetjie” genoem (Lukas 12:32). Later is daar vir die apostel Johannes gesê dat hierdie klein kuddetjie 144 000 sou tel. Hulle sou ’n opwindende werkstoewysing in die hemel hê, naamlik om saam met Christus as konings te heers en as priesters te dien.—Openbaring 5:9, 10; 14:1, 3.

7. God se Koninkryk, wat nou in die hemel heers, is gereed om oor die hele aarde te begin heers. Hierdie laaste waarheid is een van die opwindendste wat ons kan leer. Die Bybel voorsien voldoende bewyse dat Jesus reeds sy gesag as Koning in die hemel ontvang het. Hy heers nou, in óns tyd, in die hemel en sal binnekort sy heerskappy uitbrei om die hele aarde in te sluit en die wonderlike profesieë wat ons reeds genoem het, te vervul. Maar hoe kan ons seker wees dat God se Koninkryk nou reeds heers? En wanneer sal dit oor die aarde begin heers?

[Voetnote]