Bouwerk tot Jehovah se lof
“Ek kan my oë nie glo nie. Ek het nooit gedink dat ons so ’n pragtige plek sal hê waarin ons bymekaar kan kom en Jehovah kan loof nie. Die vreugde wat ek ondervind, kan eenvoudig nie gekoop word nie!”—MARIA, MEXIKO.
JEHOVAH SE GETUIES geniet dit baie om bymekaar te kom om oor God se Woord, die Bybel, te leer (Psalm 27:4; Hebreërs 10:23-25). En dit verskaf vir hulle groot vreugde wanneer hulle kan vergader in waardige plekke van aanbidding. In onlangse jare het hulle duisende nuwe plekke van aanbidding—bekend as Koninkryksale—in tientalle lande wêreldwyd gebou.
Wat het aanleiding gegee tot al hierdie bouwerk? Wie doen die werk? En watter uitwerking het hierdie bouwerk op die mense wat daarby betrokke is? Kyk na wat in Mexiko en Belize gebeur om die antwoorde op hierdie vrae te kry.
Duisende nuwe Koninkryksale nodig!
In die verlede het Jehovah se Getuies in Mexiko vir aanbidding bymekaargekom waar daar ook al plek beskikbaar was—in agterplase, die huise van Getuies, pakhuise, motorhuise of gehuurde sale. Gedurende dié tyd het hierdie lojale Getuies dikwels gedink aan hoe goed dit sou wees as hulle hulle eie Koninkryksale kon bou.
Teen 1994 was daar reeds 388 000 Getuies in Mexiko. ’n Opname wat daardie jaar gedoen is, het getoon dat 3 300 nuwe Koninkryksale gebou moes word sodat almal toegang tot hulle eie plek van aanbidding kon hê. Wat ’n oorweldigende taak!
Plaaslike gemeentes het reeds hulle eie Koninkryksale gebou wanneer hulle kon. Maar oor die daaropvolgende vyf jaar het dit duidelik geword dat meer sale gebou moet word—en vinniger gebou moet word—om tred te hou met die behoefte. Hoe word daar in hierdie behoefte voorsien?
Reisende groepe van vaardige vrywilligers
In 1999 is ’n nuwe bouprogram op die been gebring. Koninkryksaalbougroepe is oral in Mexiko gevorm. Jehovah se Getuies uit alle dele van die land—van wie baie bouvaardighede gehad het—het hulle vrywillig aangebied om aan hierdie opwindende program deel te neem. Daar is tans 35 van hierdie groepe in Mexiko, en een groep is in Belize gevorm.
Hierdie Koninkryksaalbougroepe bestaan gewoonlik uit omtrent agt vrywilligers, mans sowel as vroue, wat voltyds sonder betaling werk. Hierdie vreugdevolle groep vrywilligers gaan van een gebied in die land na die ander om die leiding in die bouprojekte te neem. Elke vrywilliger werk agt uur per dag, van Maandag tot Vrydag sowel as elke tweede Saterdag. Die dag begin om 7:00 vm. met ’n bespreking van ’n Bybelteks, waarna ontbyt bedien word. Almal is gretig om enigiets te doen wat daar van hulle gevra word. Vroue werk byvoorbeeld saam met mans om te pleister, te teël, te verf en ander werk te doen.
Die plaaslike gemeente help deur die reisende vrywilligers van verblyf te voorsien, hulle klere te was en maaltye vir hulle voor te berei. Benewens die feit dat die vrywilligers en plaaslike Getuies saam werk aan die saal, geniet hulle mekaar se geselskap by Christelike vergaderinge en terwyl hulle aan die predikingswerk van deur tot deur deelneem.
Belonings van vrywilligerdiens
Hoe voel hierdie vrywilligers oor die werk wat hulle doen? “Dis waar dat ons in die hitte en in die koue werk, kos eet waaraan ons nie gewoond is nie, gedurig rondtrek, ver van ons families af bly en dikwels sonder talle moderne geriewe moet klaarkom”, sê Daniel, wat al meer as drie jaar lank as ’n vrywilliger werk. “Maar die uitdagings is onbeduidend wanneer ’n mens dit vergelyk met die seëninge wat ons ontvang”, sê hy verder.
Wat is van hierdie seëninge? Baie van die vrywilligers leer nuwe bouvaardighede aan. Maar ’n vrywilliger genaamd Carlos, wat toesig hou oor een van die groter groepe, noem iets wat hy meen ’n belangriker voordeel is. “Ons het soos ’n gesin van 20 lede geword”, sê hy. “Ons eet saam, werk saam, studeer saam, bid saam. Ons het baie hegte vriendskapsbande gesmee.”
Die bougroepe vorm ook sterk vriendskapsbande met die plaaslike gemeentes wat hulle help. José, wat aan meer as 100 projekte deelgeneem het, sê: “Die trane van vreugde en glimlagte van waardering wanneer die plaaslike Getuies sien dat hulle droom van ’n nuwe Koninkryksaal bewaarheid is, is net te wonderlik om te aanskou.” Hy voeg by: “Ons put vreugde uit die wete dat die geloof van ander versterk is, al het ons net ’n klein rol gespeel in die suksesvolle oprigting van nog ’n huis van ware aanbidding.”
’n Verstommende prestasie!
Hierdie plekke van aanbidding is nie weelderig of spoggerig nie. Die ontwerp van die Koninkryksale is eerder eenvoudig, wat dit moontlik maak om hulle vinnig en goedkoop te bou. Plaaslike boumateriale en -metodes word gebruik wanneer dit ook al prakties is. Op hierdie manier kan ’n nuwe saal in net ses weke gebou word!
Van 2007 af het al die gemeentes in Belize nuwe Koninkryksale—altesaam 17. In Mexiko is meer as 1 400 sale sedert 1999 gebou!
Hoewel heelwat goeie werk gedoen is, is daar nog steeds baie om te doen (Matteus 9:37). Die aantal Getuies in Mexiko het nou tot meer as 600 000 vermeerder—almal van hulle kom drie keer per week bymekaar om uit God se Woord onderrig te word. Daarom is daar nog byna 2 000 nuwe sale nodig. As hierdie vrywillige bouwerk bloot van mensepogings afgehang het, sou dit onmoontlik gewees het om hierdie doelwit te bereik. Maar soos die resultate toon, “is alles moontlik” met Jehovah God se ondersteuning.—Matteus 19:26.
[Venster/Prent op bladsy 22]
“Wat hulle sê, dít doen hulle”
Die plaaslike gemeente van Jehovah se Getuies is nie die enigstes wie se lewens geraak word deur die Koninkryksaalbouwerk nie. Byvoorbeeld, terwyl ’n Koninkryksaal in Belize gebou is, het ’n man wie se vrou aan die Pinksterkerk behoort, vir haar gesê dat hy die “dienste” van Jehovah se Getuies wil bywoon wanneer hulle hulle “kerk” klaar gebou het. Wat het tot hierdie begeerte aanleiding gegee? “Ek kan sien dat God met hulle is”, het hy gesê. “Hulle baklei nie wanneer hulle saam werk nie. En wat hulle sê, dít doen hulle.”
[Prent]
Koninkryksaal in Orange Walk, Belize
[Venster/Prente op bladsy 23]
’n Wêreldwye poging
Koninkryksaalbougroepe is in 120 lande georganiseer. Hieronder word net ’n paar van die lande aangegee waar vrywilligers hulle vreugdevol in hierdie werk inspan:
Angola, Bolivia, Dominikaanse Republiek, Etiopië, Fidji, Ghana, Hongkong, Indië, Jamaika, Kazakstan, Kroasië, Liberië, Moldowa, Nigerië, die Oekraïne, Papoea-Nieu-Guinee, Rwanda, Toewaloe, Venezuela, Zambië.
[Prente]
Koninkryksaal in Tlaxcala, Mexiko
Lede van ’n Koninkryksaalbougroep in Mexiko
[Prent op bladsy 23]
Koninkryksaal in Acapulco, Mexiko