Sien is glo
“’n Agnostikus is iemand wat dink dat dit onmoontlik is om die waarheid te weet omtrent sake soos God en ’n toekomstige lewe waarmee die Christelike godsdiens en ander godsdienste hulle besighou. Of as dit nie vir altyd onmoontlik is nie, dat dit ten minste nou onmoontlik is.”—DIE FILOSOOF BERTRAND RUSSELL, 1953.
DIE man wat die woord “agnostikus” uitgedink het, was ’n dierkundige met die naam Thomas Huxley. Huxley, wat in 1825 gebore is, was ’n tydgenoot van Charles Darwin en ’n voorstander van die evolusieleer. In 1863 het Huxley geskryf dat hy geen bewyse kon sien van ’n God wat “vir ons lief is en vir ons sorg soos die Christelike godsdiens beweer” nie.
Baie mense is dit vandag eens met die menings van hierdie invloedryke manne en sê dat hulle net sal glo in wat hulle kan sien. Om geloof te stel in iemand of iets waarvan daar geen bewyse is nie, is niks anders nie as goedgelowigheid, sê hulle miskien.
Vereis die Bybel dat ons blindelings in God moet glo? Glad nie. Inteendeel, die Bybel toon dat dit naïef—selfs dwaas—is om geloof te stel in bewerings wat nie deur bewyse gestaaf word nie. “Iemand wat onervare is, glo elke woord”, sê die Bybel, “maar die skerpsinnige gee ag op sy voetstappe.”—Spreuke 14:15.
Wat dan van geloof in God? Is daar werklik enige bewyse dat God bestaan, wat nog te sê dat hy vir ons lief is en vir ons sorg?
God se eienskappe geopenbaar
Terwyl die Bybelskrywer Paulus met ’n groep Ateense intellektuele gepraat het, het hy verklaar dat God “die wêreld en alles daarin gemaak het”. Paulus het vir sy skeptiese gehoor gesê dat God belangstel in die mens en dat hy in werklikheid “nie ver van elkeen van ons af is nie”.—Handelinge 17:24-27.
Waarom was Paulus daarvan oortuig dat God bestaan en in Sy menseskepping belangstel? Paulus het een rede genoem toe hy aan mede-Christene in die stad Rome geskryf het. Hy het van God gesê: “Sy onsigbare eienskappe word van die wêreld se skepping af duidelik gesien, omdat hulle waargeneem word in die dinge wat gemaak is.”—Romeine 1:20.
Op die volgende bladsye word drie eienskappe van God bespreek wat duidelik gesien kan word in die dinge wat hy geskep het. Terwyl jy hierdie voorbeelde ondersoek, kan jy jou afvra: ‘Watter uitwerking het kennis van hierdie eienskappe van God op my?’
[Lokteks op bladsy 3]
Die Bybel vereis nie dat ons blindelings in God moet glo nie