Neem toe in juiste kennis met “gretigheid van verstand”
AL Jehovah se knegte wil graag sy goedkeuring wegdra. Omdat dit die geval is, is ons gretig om die gehalte van ons geloof te verbeter en om heilige diens met ywer te verrig. Die apostel Paulus vestig egter ons aandag op ’n moontlike gevaar, een wat party Jode in sy dag beïnvloed het: “Hulle [het] ’n ywer vir God . . . ; maar nie ooreenkomstig juiste kennis nie” (Rom. 10:2). Dit is duidelik dat ons geloof en ons aanbidding van Jehovah nie bloot op emosie gegrond moet wees nie. Ons het juiste kennis van ons Skepper en sy wil nodig.
Elders in sy geskrifte het Paulus gedrag wat God se goedkeuring wegdra, verbind met ons gretige verkryging van kennis. Hy het gebid dat Christus se volgelinge “vervul mag word met die juiste kennis van [God se] wil sodat [hulle] kan wandel op ’n wyse wat Jehovah waardig is om hom ten volle te behaag terwyl [hulle] voortgaan om vrug te dra in elke goeie werk en toe te neem in die juiste kennis van God” (Kol. 1:9, 10). Waarom het ons so ’n groot behoefte aan “juiste kennis”? En waarom moet ons toeneem in hierdie kennis?
Die sleutel tot geloof
Juiste kennis van God en sy wil soos dit in die Bybel geopenbaar word, is die grondslag van ons geloof. Sonder hierdie betroubare kennis sal ons geloof in Jehovah soos ’n kaartehuis wees wat met ’n ligte briesie kan inmekaartuimel. Paulus spoor ons aan om heilige diens aan God te verrig met ons “denkvermoë” en om ons “verstand te hervorm” (Rom. 12:1, 2). Gereelde studie van die Bybel kan ons help om dit te doen.
Ewa, ’n gewone pionier in Pole, erken: “As ek God se Woord nie gereeld bestudeer het nie, sou ek opgehou het om toe te neem in die juiste kennis van Jehovah. Ek sou gou my Christelike identiteit begin verloor het, en my geloof in God sou verswak het—ek sou op geestelike bankrotskap afgestuur het.” Mag dit nooit met ons gebeur nie! Beskou die voorbeeld van ’n man wat toegeneem het in juiste kennis van Jehovah en gevolglik Sy goedkeuring geniet het.
“Hoe lief het ek u wet tog!”
Die digterlike lied wat as Psalm 119 in ons Bybel voorkom, dra die psalmis se gevoelens oor aangaande die wette, herinneringe, bevele, gebooie en regterlike beslissings van Jehovah. Die psalmis het geskryf: “Vir u insettinge sal ek ’n liefde toon. . . . Ek [is] lief vir u herinneringe.” Hy het ook geskryf: “Hoe lief het ek u wet tog! Die hele dag oordink ek dit.”—Ps. 119:16, 24, 47, 48, 77, 97.
Die woorde “liefde” en “oordink” dui op bepeinsing oor God se Woord, trouens, om behae te skep in sulke bepeinsing. Hierdie woorde beklemtoon hoe lief die psalmis daarvoor was om God se wet te bestudeer. Hierdie liefde het nie voortgespruit uit ’n blote opwelling van emosie in die psalmis se hart nie. Hy het eerder ’n opregte begeerte gehad om die wet te “oordink”, om insig in Jehovah se woorde te verkry. Ons kan uit sy gesindheid sien dat hy God en sy wil so akkuraat as moontlik wou leer ken.
Dit is duidelik dat die psalmis se liefde vir God se Woord uit die diepte van sy hart gekom het. Ons kan ons afvra: ‘Is dit waar van my? Skep ek behae daarin om elke dag ’n gedeelte van die Bybel te lees en te ontleed? Het ek ’n ywerige en biddende gesindheid wanneer ek God se Woord lees?’ Ons antwoorde op hierdie vrae sal waarskynlik toon in watter mate ons “[toeneem] in die juiste kennis van God”.
Ewa sê: “Ek probeer die gehalte van my persoonlike studie voortdurend verbeter. Sedert ons die ‘Sien die goeie land’-brosjure ontvang het, gebruik ek dit byna elke keer wanneer ek studeer. Ek probeer al hoe meer navorsing doen in Insight on the Scriptures en ander naslaanwerke wanneer dit nodig is.”
Beskou ook die voorbeelde van Wojciech en Małgorzata, wat baie gesinsverantwoordelikhede het. Hoe kry hulle dit reg om persoonlike Bybelstudie in hulle rooster in te pas? “Ons maak tyd om, wanneer ons ook al kan, God se Woord op ons eie te bestudeer. Dan vertel ons mekaar gedurende ons gesinstudie en in ons daaglikse gesprekke watter interessante en bemoedigende punte ons gevind het.” Diep persoonlike studie verskaf hulle groot vreugde en help hulle om ‘toe te neem in juiste kennis’.
Studeer met ’n ontvanklike verstand
As Christene glo ons dat dit God se wil is “dat alle soorte mense gered moet word en tot juiste kennis van die waarheid moet kom” (1 Tim. 2:3, 4). Hierdie feit beklemtoon die waarde daarvan om die Bybel te lees en daarna te streef om ‘die sin daarvan te begryp’ (Matt. 15:10). Iets wat hiermee kan help, is om met ’n ontvanklike verstand te studeer. Dit was die gesindheid wat die eertydse Bereane geopenbaar het toe Paulus die goeie nuus aan hulle verkondig het: “Hulle het die woord met die grootste gretigheid van verstand ontvang en die Skrif elke dag sorgvuldig ondersoek of hierdie dinge so was.”—Hand. 17:11.
Volg jy die Bereane se voorbeeld deur gretig van verstand te wees en te sorg dat jou aandag nie onnodig afgelei word terwyl jy die Bybel bestudeer nie? ’n Christen kan hom daarop toelê om soos die Bereane te wees, al het hy dit nie voorheen geniet om te studeer nie. Verder is party mense geneig om minder te lees en te studeer namate hulle ouer word, maar dit hoef nie met ’n Christen die geval te wees nie. Ongeag hoe oud jy is, dit is moontlik om te voorkom dat jou gedagtes afgelei word. En terwyl jy lees, kan jy gretig soek na inligting wat jy aan ander kan oordra. Kan jy byvoorbeeld ’n punt daarvan maak om vir jou huweliksmaat of vir ’n Christenvriend te vertel van dinge wat jy tydens jou studiesessies gelees of geleer het? Dít kan hierdie inligting op doeltreffende wyse in jou verstand en hart inprent terwyl dit ook ’n positiewe uitwerking op ander het.
Wat jou studiesessies betref, kan jy gerus die voorbeeld van Esra volg, die eertydse kneg van God wat “sy hart voorberei [het] om die wet van Jehovah te raadpleeg” (Esra 7:10). Hoe kan jy dit doen? Jy kan ’n atmosfeer skep wat bevorderlik is vir studie. Daarna moet jy gaan sit en tot Jehovah bid vir sy leiding en wysheid (Jak. 1:5). Vra jou af: ‘Wat verwag ek om gedurende hierdie studiesessie te leer?’ Terwyl jy lees, moet jy sleutelgedagtes probeer raaksien. Jy kan dit neerskryf of gedeeltes merk wat jy graag wil onthou. Dink na oor hoe jy die materiaal kan gebruik wanneer jy preek, besluite neem of mede-aanbidders aanmoedig. Teen die einde van jou studiesessie kan jy die materiaal wat jy gedek het, kortliks hersien. Dit sal jou in staat stel om te onthou wat jy geleer het.
Ewa beskryf haar benadering: “Wanneer ek die Bybel lees, gebruik ek die kruisverwysings, die Watch Tower Publications Index en die Watchtower Library op CD-ROM. Ek maak aantekeninge sodat ek dit in my bediening kan gebruik.”
Party geniet dit lank reeds om diep studie te doen en hulle in geestelike dinge te verdiep (Spr. 2:1-5). Maar hulle het baie verantwoordelikhede en vind dit moeilik om tyd vir persoonlike studie opsy te sit. Watter veranderinge kan jy in jou rooster maak as dit met jou die geval is?
Waar kan ek die tyd kry?
Jy sal waarskynlik saamstem dat dit makliker is om tyd te maak vir dinge wat jy geniet. Baie het gevind dat ’n realistiese doelwit, soos om die hele Bybel deur te lees, ’n mens kan help om jou in persoonlike studie te verdiep. Dit lyk dalk na ’n moeilike taak om lang geslagsregisters, uitvoerige beskrywings van die eertydse tempel of ingewikkelde profesieë wat skynbaar niks met die daaglikse lewe te doen het nie, te lees. Probeer praktiese stappe doen om jou doelwit te bereik. Voordat jy byvoorbeeld ’n gedeelte in die Bybel ondersoek wat moeilik lyk, kan jy eers die geskiedkundige agtergrond of praktiese toepassing daarvan lees. Sulke inligting kan gevind word in die boek “Die hele Skrif is deur God geïnspireer en is nuttig”, wat in byna 50 tale beskikbaar is.
Dit is stimulerend om jou verbeelding te gebruik terwyl jy die Bybel lees. Dit kan jou help om ’n prentjie van die karakters en die gebeure in jou gedagtes te vorm. As jy al net hierdie paar wenke toepas, sal dit jou studiesessies waarskynlik genotvoller en lonender maak. Jy sal gevolglik gretiger wees om tyd daarvoor te maak. Dit sal makliker wees om in die gewoonte te bly om die Bybel elke dag te lees.
Die bogenoemde wenke kan ons as individue help, maar wat kan ’n besige gesin doen? Kom gerus bymekaar vir ’n ontspanne bespreking van die voordele wat ’n gesinstudie kan inhou. So ’n bespreking kan praktiese idees oplewer, soos om elke dag of op sekere dae ’n paar minute vroeër op te staan om ’n gedeelte van die Bybel te bespreek. Of dalk sal julle bespreking aan die lig bring dat die gesinsrooster aangepas moet word. Party gesinne het dit byvoorbeeld prakties gevind om ná ’n gesinsmaaltyd die dagteks te bespreek of ’n gedeelte in die Bybel te lees. Voordat enigiemand die tafel begin afdek of êrens anders gaan, bestee die gesin 10 of 15 minute daaraan om die Skrif te bespreek of die Bybellees vir die week te doen. Aanvanklik lyk dit miskien ’n bietjie moeilik, maar dit kan gou deel van die gesin se normale roetine en baie aangenaam word.
Wojciech en Małgorzata verduidelik wat hulle gesin gehelp het: “In die verlede is ons tyd deur onbelangrike, onbenullige bedrywighede in beslag geneem. Ons het besluit om minder tyd daaraan te bestee om e-pos te stuur. Ons bestee ook minder tyd aan stokperdjies en het ’n spesifieke dag en tyd opsygesit vir diep studie.” Hierdie gesin is beslis nie spyt dat hulle hierdie aanpassings gemaak het nie, en jy sal moontlik vind dat dit ook met jou gesin die geval sal wees.
Dit is die moeite werd om toe te neem in juiste kennis!
Diep studie van God se Woord kan “vrug . . . dra in elke goeie werk” (Kol. 1:10). Wanneer dit in jou lewe die geval is, sal jou vooruitgang vir almal duidelik wees. Jy sal ’n geestelike persoon wees met ’n omvattende begrip van Bybelwaarhede. Jou besluite sal meer gebalanseerd wees en jy sal ander op ’n bekwamer manier kan help, sonder om na uiterstes te neig soos oningeligtes dikwels doen. Jy sal bowenal nader aan Jehovah kom. Jy sal ’n groter waardering vir sy eienskappe hê, en dit sal duidelik wees wanneer jy ander van hom vertel.—1 Tim. 4:15; Jak. 4:8.
Jy moet, ongeag jou ouderdom of ondervinding, alles in jou vermoë doen om voortdurend in God se Woord behae te skep en met ’n ontvanklike verstand ’n diep studie daarvan te maak. Jy kan vol vertroue wees dat Jehovah nie jou pogings sal vergeet nie (Heb. 6:10). Hy sal sy ryk seëninge op jou uitstort.
[Venster op bladsy 13]
WANNEER ONS ‘TOENEEM IN JUISTE KENNIS’ . . .
Versterk ons ons geloof in God en wandel ons op ’n wyse wat Jehovah waardig is.—Kol. 1:9, 10
Verkry ons insig, sodat ons onderskeidingsvermoë kan gebruik en verstandige besluite kan neem.—Ps. 119:99
Put ons groter genot daaruit om ander te help om nader aan Jehovah te kom.—Matt. 28:19, 20
[Prente op bladsy 14]
Dit kan moeilik wees om ’n plek te vind wat bevorderlik is vir studie, maar dit is voordelig
[Prent op bladsy 15]
Party gesinne lees ná ’n maaltyd ’n gedeelte in die Bybel