Jehovah hou sy oë op ons tot ons voordeel
“Jehovah se oë deurloop die hele aarde om sy krag te toon ten behoewe van dié wie se hart volkome teenoor hom is.”—2 KRON. 16:9.
1. Waarom ondersoek Jehovah ons?
JEHOVAH is die volmaakte Vader. Hy ken ons so goed dat hy selfs bewus is van die “neiging van [ons] gedagtes” (1 Kron. 28:9). Maar hy ondersoek ons nie bloot om fout te vind nie (Ps. 11:4; 130:3). Hy wil ons eerder liefdevol beskerm teen enigiets wat ons verhouding met hom kan skaad of ons vooruitsig op die ewige lewe kan benadeel.—Ps. 25:8-10, 12, 13.
2. Ten behoewe van wie toon Jehovah sy krag?
2 Jehovah het weergalose krag en sien alles. Daarom kan hy sy lojales te hulp kom wanneer hulle hom aanroep, en hy kan hulle gedurende hulle beproewinge onderskraag. “Jehovah se oë deurloop die hele aarde om sy krag te toon ten behoewe van dié wie se hart volkome teenoor hom is”, sê 2 Kronieke 16:9. Let daarop dat Jehovah sy krag gebruik ten behoewe van dié wat hom met ’n volkome hart dien, ’n hart met ’n suiwer en opregte beweegrede. Hy toon glad nie sulke besorgdheid oor diegene wat bedrieglik of huigelagtig is nie.—Jos. 7:1, 20, 21, 25; Spr. 1:23-33.
Wandel met God
3, 4. Wat beteken dit om ‘met God te wandel’, en watter Bybelse voorbeelde werp lig op hierdie saak?
3 Vir baie mense is dit ondenkbaar dat die Skepper van ons uitgestrekte heelal mense toelaat om in geestelike sin met hom te wandel. Tog is dit presies wat Jehovah wil hê ons moet doen. In Bybeltye het Henog en Noag ‘met God gewandel’ (Gen. 5:24; 6:9). Moses “het standvastig gebly asof hy die Onsigbare sien” (Heb. 11:27). Koning Dawid het nederig aan sy hemelse Vader se sy gewandel. Hy het gesê: “Omdat [Jehovah] aan my regterhand is, sal ek nie wankel nie.”—Ps. 16:8.
4 Ons kan natuurlik nie letterlik Jehovah se hand vat en met hom wandel nie. Maar ons kan dit in figuurlike sin doen. Hoe? Die psalmis Asaf skryf: “Ek is voortdurend by u; u het my regterhand gevat. Met u raad sal u my lei” (Ps. 73:23, 24). Eenvoudig gestel, ons wandel met Jehovah wanneer ons noukeurig ag slaan op sy raad, wat ons hoofsaaklik deur middel van sy geskrewe Woord en “die getroue en verstandige slaaf” ontvang.—Matt. 24:45; 2 Tim. 3:16.
5. Hoe hou Jehovah ’n vaderlike oog op sy lojales, en hoe moet ons teenoor hom voel?
5 Omdat Jehovah diegene liefhet wat met hom wandel, hou hy sy vaderlike oog op hulle; hy sorg vir hulle en beskerm en onderrig hulle. “Ek sal jou insig gee en jou onderrig in die weg wat jy moet gaan”, sê God. “Ek sal raad gee met my oog op jou” (Ps. 32:8). Vra jou af: ‘Sien ek myself as iemand wat as ’t ware hand aan hand met Jehovah wandel, wat na sy wysheid luister en weet dat sy liefdevolle oog op my is? Beïnvloed die feit dat ek van sy teenwoordigheid bewus is, my gedagtes, woorde en dade? En sien ek Jehovah, wanneer ek oortree, nie as ’n God wat afsydig en hardvogtig is nie, maar as ’n liefdevolle, barmhartige Vader wat berouvolles wil help om weer in sy guns te kom?’—Ps. 51:17.
6. Watter voordeel het Jehovah bo ’n menseouer?
6 Soms kom Jehovah ons te hulp nog voordat ons ’n verkeerde weg inslaan. Byvoorbeeld, hy sien dalk dat ons hart, wat verraderlik kan wees, ongepaste dinge begin begeer (Jer. 17:9). In so ’n situasie kan hy selfs gouer as menseouers optree omdat sy “stralende oë” die vermoë het om tot diep binne ons te kyk, om ons diepste gedagtes te ondersoek (Ps. 11:4; 139:4; Jer. 17:10). Beskou God se reaksie op ’n situasie wat ontstaan het in die lewe van Barug, die profeet Jeremia se persoonlike sekretaris en hegte vriend.
’n Ware vader vir Barug
7, 8. (a) Wie was Barug, en watter ongesonde begeertes het moontlik in sy hart begin ontwikkel? (b) Hoe het Jehovah sy vaderlike besorgdheid oor Barug getoon?
7 Barug was ’n professionele skrywer wat getrou saam met Jeremia gedien het in ’n toewysing wat later moeilik geword het—om Jehovah se oordele aan Juda bekend te maak (Jer. 1:18, 19). Op een stadium het Barug, wat moontlik aan ’n vooraanstaande familie behoort het, “groot dinge” vir hom begin soek. Miskien het hy persoonlike ambisies of ’n begeerte na materiële voorspoed begin koester. Hoe dit ook al sy, Jehovah het hierdie gevaarlike denke in Barug se hart sien ontwikkel. Jehovah het onmiddellik aandag gegee aan die saak en het deur middel van Jeremia vir Barug gesê: “Jy het gesê: ‘Wee my tog, want Jehovah het droefheid by my pyn gevoeg! Ek het moeg geword weens my gesug, en ek het geen rusplek gevind nie.’” Toe het God gesê: “Jy hou aan om vir jou groot dinge te soek. Moet dit nie aanhou soek nie.”—Jer. 45:1-5.
8 Hoewel hy ferm was met Barug, het Jehovah nie met woede gereageer nie, maar met opregte vaderlike besorgdheid. Blykbaar het God gesien dat die man se begeertes nie ’n goddelose of bedrieglike hart weerspieël het nie. Jehovah het ook geweet dat dit die laaste dae van Jerusalem en Juda was, en hy wou nie hê dat Barug gedurende hierdie kritieke tyd struikel nie. Om sy kneg tot sy sinne te bring, het God hom dus daaraan herinner dat Hy “rampspoed oor alle vlees [bring]” en bygevoeg dat Barug sy lewe sou behou as hy wys optree (Jer. 45:5). God het in werklikheid gesê: ‘Barug, wees realisties. Hou in gedagte wat binnekort met die sondige Juda en Jerusalem gaan gebeur. Bly getrou en lewe! Ek sal jou beskerm.’ Jehovah het klaarblyklik Barug se hart bereik, want hy het gunstig gereageer en die vernietiging van Jerusalem, wat 17 jaar later plaasgevind het, oorleef.
9. Hoe sal jy die vrae in die paragraaf beantwoord?
9 Let op die volgende vrae en tekste terwyl jy nadink oor die verslag omtrent Barug: Wat openbaar die manier waarop God met Barug gehandel het, oor Jehovah en sy gevoelens teenoor sy knegte? (Lees Hebreërs 12:9.) Wat kan ons, met die oog op die kritieke tye waarin ons lewe, leer uit God se raad aan Barug en uit Barug se reaksie? (Lees Lukas 21:34-36.) Hoe kan Christen- ouer manne, in navolging van Jeremia, Jehovah se besorgdheid oor Sy knegte weerspieël?—Lees Galasiërs 6:1.
Die Vader se liefde word in die Seun weerspieël
10. Hoe is Jesus toegerus om sy posisie as Hoof van die Christengemeente te behartig?
10 Gedurende die voor-Christelike era is Jehovah se liefde vir sy volk geopenbaar deur middel van sy profete en ander getroue knegte. In ons tyd word dit bowenal gesien in die Hoof van die Christengemeente, Jesus Christus (Ef. 1:22, 23). In die boek Openbaring word Jesus dus uitgebeeld as ’n lam met “sewe oë, en dié oë beteken die sewe geeste van God wat in die hele aarde uitgestuur is” (Op. 5:6). Ja, Jesus het volmaakte onderskeidingsvermoë, aangesien die volheid van God se heilige gees aan hom geskenk is. Ook hy sien wat ons innerlik is, en niks ontgaan sy aandag nie.
11. Watter rol speel Christus, en hoe weerspieël sy gesindheid teenoor ons sy Vader se gesindheid?
11 Maar soos Jehovah, is Jesus ook nie ’n hemelse polisieman nie. Hy ondersoek ons deur liefdevolle oë. Een van Jesus se titels, “Ewige Vader”, herinner ons aan die rol wat hy daarin sal speel om die ewige lewe te gee aan almal wat geloof in hom beoefen (Jes. 9:6). As Hoof van die Christengemeente kan Christus ook gewillige, geestelik volwasse Christene, veral ouer manne, beweeg om vertroosting of raad te gee aan diegene wat dit nodig het.—1 Tess. 5:14; 2 Tim. 4:1, 2.
12. (a) Wat openbaar die briewe aan die sewe gemeentes in Klein-Asië oor Jesus? (b) Hoe weerspieël ouer manne Christus se gesindheid teenoor God se kudde?
12 Christus se intense belangstelling in die kudde blyk uit die briewe aan die ouer manne van die sewe gemeentes in Klein-Asië (Op. 2:1–3:22). Daarin het Jesus getoon dat hy bewus was van wat in elke gemeente gebeur het en ook dat hy diep besorg was oor sy volgelinge. Dit is ook vandag die geval—net in groter mate—aangesien die visioen van Openbaring gedurende “die dag van die Here” vervul word (Op. 1:10).a Christus se liefde word dikwels deur middel van die ouer manne betoon, wat as geestelike herders van die gemeente dien. Hy kan hierdie “gawes in die vorm van mense” beweeg om vertroosting, aanmoediging of raad te gee wanneer nodig. (Ef. 4:8; Hand. 20:28; lees Jesaja 32:1, 2.) Beskou jy hulle pogings as ’n blyk van Christus se belangstelling in jou as persoon?
Hulp op die regte tyd
13-15. Hoe kan God ons gebede verhoor? Gee voorbeelde.
13 Het jy al ooit vurig om hulp gebid en ’n antwoord ontvang in die vorm van ’n aanmoedigende besoek van ’n geestelik volwasse Christen? (Jak. 5:14-16). Of dalk het die hulp gekom in die vorm van ’n toespraak by ’n Christelike vergadering of inligting in een van ons publikasies. Jehovah verhoor gebede dikwels op hierdie maniere. Byvoorbeeld, nadat ’n ouer man ’n toespraak gehou het, het ’n suster wat in die weke voor die toespraak ’n verskriklike onreg aangedoen is, na hom toe gekom. Sy het nie gekla oor haar probleem nie, maar het eerder opregte waardering uitgespreek vir spesifieke skriftuurlike gedagtes wat in die toespraak genoem is. Dit was op haar situasie van toepassing en het haar grootliks vertroos. Hoe bly was sy tog dat sy daardie vergadering bygewoon het!
14 Wat hulp deur middel van gebed betref, is daar die voorbeeld van drie gevangenes wat Bybelwaarheid in die tronk geleer het en ongedoopte verkondigers geword het. As gevolg van ’n gewelddadige voorval het al die gevangenes in die tronk ’n aantal voorregte verloor. Dit het tot ’n protes gelei. Die gevangenes het besluit dat hulle die volgende oggend ná ontbyt uit protes sou weier om hulle borde terug te gee. Die drie ongedoopte verkondigers het hulle nou in ’n penarie bevind. As hulle aan die opstand deelneem, sou hulle Jehovah se raad in Romeine 13:1 verontagsaam. As hulle nie daaraan deelneem nie, kon hulle die weerwraak van woedende gevangenes verwag.
15 Die drie mans kon nie met mekaar kommunikeer nie en het vir wysheid gebid. Die volgende oggend het al drie uitgevind dat hulle op presies dieselfde oplossing besluit het—hulle sou eenvoudig nie ontbyt eet nie. Toe die wagte later die borde kom haal, het die mans nie borde gehad om terug te gee nie. Hoe bly was hulle tog dat die “Hoorder van die gebed” naby was!—Ps. 65:2.
Gaan die toekoms met vertroue tegemoet
16. Hoe lewer die predikingswerk bewys van Jehovah se besorgdheid oor skaapgeaardes?
16 Die wêreldwye predikingswerk is nog ’n bewys van Jehovah se besorgdheid oor opregtes van hart, waar hulle ook al woon (Gen. 18:25). Jehovah kan sy knegte, dikwels deur middel van engele, na skaapgeaardes lei—selfs as hulle in gebiede woon wat nog nie met die goeie nuus bereik is nie (Op. 14:6, 7). God het Filippus, ’n evangeliedienaar van die eerste eeu, byvoorbeeld deur middel van ’n engel gerig om ’n Etiopiese amptenaar tegemoet te gaan en die Skrif aan hom te verduidelik. Die gevolg? Die man het die goeie nuus aangeneem en ’n gedoopte volgeling van Jesus geword.b—Joh. 10:14; Hand. 8:26-39.
17. Waarom moet ons ons nie uitermate kwel oor die toekoms nie?
17 Terwyl die teenswoordige stelsel van dinge sy einde nader, sal die voorspelde “weë van benoudheid” voortduur (Matt. 24:8). Byvoorbeeld, voedselpryse kan die hoogte inskiet weens ’n toenemende aanvraag, uiterste weerstoestande of ekonomiese onbestendigheid. Dit kan moeiliker word om werk te vind, en daar sal dalk meer druk op werknemers uitgeoefen word om langer ure te werk. Wat ook al gebeur, almal wat geestelike belange eerste stel en hulle ‘oog eenvoudig’ hou, hoef hulle nie uitermate te kwel nie. Hulle weet dat God hulle liefhet en vir hulle sal sorg (Matt. 6:22-34). Dink byvoorbeeld aan hoe Jehovah vir Jeremia gesorg het tydens Jerusalem se veelbewoë einde in 607 v.G.J.
18. Hoe het Jehovah gedurende die beleëring van Jerusalem sy liefde vir Jeremia bewys?
18 Naby die einde van die Babiloniese beleëring van Jerusalem is Jeremia gevange gehou in die Voorhof van die Lyfwag. Waar sou hy kos kry? As hy vry was, kon hy kos gaan soek het. Maar nou was hy heeltemal afhanklik van diegene om hom, en die meeste van hulle het hom gehaat! Jeremia het egter nie op mense vertrou nie, maar op God, wat belowe het om vir hom te sorg. Het Jehovah sy woord gestand gedoen? Inderdaad! Hy het toegesien dat Jeremia daagliks “’n ronde brood [ontvang het], totdat al die brood in die stad op was” (Jer. 37:21). Jeremia, sowel as Barug, Ebed-Meleg en ander, het daardie tydperk van hongersnood, siekte en dood oorleef.—Jer. 38:2; 39:15-18.
19. Wat moet ons vasbeslote wees om te doen terwyl ons die toekoms tegemoetgaan?
19 Ja, “die oë van Jehovah is op die regverdiges, en sy ore is tot hulle smeking” (1 Pet. 3:12). Is jy bly oor jou hemelse Vader se waaksaamheid? Voel jy veilig en geborge in die wete dat sy oë op jou rus tot jou voordeel? Wees dan vasbeslote om met God te bly wandel—ongeag wat die toekoms inhou. Ons kan seker wees dat Jehovah altyd ’n wakende, vaderlike oog op al sy lojales sal hou.—Ps. 32:8; lees Jesaja 41:13.
[Voetnote]
a Al is die briewe hoofsaaklik op Christus se gesalfde volgelinge van toepassing, is dit in beginsel op al God se knegte van toepassing.
b Nog ’n voorbeeld van goddelike leiding kan in Handelinge 16:6-10 gevind word. Daar lees ons dat Paulus en sy metgeselle “deur die heilige gees verbied is” om in Asië en Bitinië te preek. Hulle is eerder geroep om in Masedonië te werk, waar talle sagmoediges gunstig op hulle evangelisasiewerk gereageer het.
Kan jy verduidelik?
• Hoe kan ons toon dat ons ‘met God wandel’?
• Hoe het Jehovah sy liefde vir Barug getoon?
• Hoe weerspieël Jesus, as Hoof van die Christengemeente, sy Vader se eienskappe?
• Op watter maniere kan ons toon dat ons gedurende hierdie kritieke tye op God vertrou?
[Prente op bladsy 9]
Soos Jeremia in die geval van Barug, weerspieël Christen- ouer manne vandag Jehovah se besorgdheid
[Prent op bladsy 10]
Hoe kan Jehovah hulp op die regte tyd voorsien?