Is armoede ’n teken van God se misnoeë?
GOD het vir die eertydse Israeliete gesê: “Niemand onder jou moet . . . arm word nie.” Dit was omdat hy in die Wet wat hy hulle gegee het, voorsiening gemaak het om vir die armes te sorg en selfs om skuld kwyt te skeld (Deuteronomium 15:1-4, 7-10). Daarom sou daar geen armes onder die Israeliete gewees het nie, want Jehovah het belowe om hulle te seën. Maar hierdie seën was afhanklik van gehoorsaamheid aan die Wet, wat die Israeliete versuim het om na te kom.
Dit het egter nie beteken dat mense wat min op materiële gebied gehad het, noodwendig deur God afgekeur is nie, net soos dié wat baie gehad het, nie noodwendig deur God geseën is nie. Baie van God se getroue knegte was materieel arm. Die profeet Amos was ’n nederige skaapboer en ’n seisoensarbeider (Amos 1:1; 7:14). In die dae die profeet Elia, toe Israel deur ’n hongersnood geteister is, moes Elia staatmaak op die gasvryheid van ’n arm weduwee, wie se skrapse voorraad meel en olie dwarsdeur die hongersnood op wonderdadige wyse nie opgeraak het nie. Nóg Elia nóg die weduwee het ryk geword; Jehovah het net in hulle basiese behoeftes voorsien.—1 Konings 17:8-16.
Onvoorsiene gebeurtenisse laat mense dalk in armoede verval. Ongelukke en siekte kan iemand tydelik of permanent verhinder om te werk. En die dood kan wese en weduwees agterlaat. Selfs sulke ongunstige omstandighede is nie ’n bewys van God se misnoeë nie. Die verslag van Naomi en Rut is ’n bemoedigende voorbeeld van Jehovah se liefdevolle besorgdheid teenoor die behoeftiges. Al het Naomi en Rut ná die dood van hulle mans behoeftig geraak, het Jehovah God hulle geseën en gesorg dat daar in hulle behoeftes voorsien word.—Rut 1:1-6; 2:2-12; 4:13-17.
Dit is duidelik dat armoede nie ’n bewys van God se misnoeë is nie. Dié wat getrou is aan Jehovah God, kan vertroue hê in koning Dawid se woorde: “Ek was eens ’n jong man, ook het ek oud geword, en tog het ek geen regverdige heeltemal verlate gesien of dat sy nageslag brood soek nie.”—Psalm 37:25.
[Prent op bladsy 8]
Al was Naomi en Rut arm en behoeftig, het God hulle geseën en liefdevol vir hulle gesorg