Satan se manier van regeer sal beslis misluk
“Dit sal glad nie goed afloop met die goddelose nie.”—PRED. 8:13.
1. Waarom is die komende oordeel oor die goddeloses vertroostende nuus?
VROEËR of later sal die goddeloses moet rekenskap gee vir wat hulle gedoen het (Spr. 5:22; Pred. 8:12, 13). Dit is vertroostende nuus, veral vir dié wat regverdigheid liefhet en wat deur die toedoen van die goddeloses onreg gely het en sleg behandel is. Die vernaamste onder die goddeloses wat tot verantwoording geroep gaan word, is die vader van goddeloosheid, Satan die Duiwel.—Joh. 8:44.
2. Waarom was tyd nodig om die geskil te besleg wat in Eden ontstaan het?
2 In Eden het Satan, verteer deur gevoelens van verwaandheid, mense oorgehaal om Jehovah se manier van regeer te verwerp. Gevolglik het ons eerste ouers by Satan aangesluit deur Jehovah se regmatige gesag te bevraagteken en het hulle in Sy oë sondaars geword (Rom. 5:12-14). Jehovah het natuurlik geweet wat die gevolg van hulle oneerbiedige en opstandige weg sou wees. Maar daardie onvermydelike afloop moes vir alle intelligente skepsele duidelik word. Daarom was tyd nodig om die geskil te besleg en oortuigende bewys te lewer dat die opstandelinge heeltemal verkeerd was.
3. Wat is ons standpunt ten opsigte van menseregerings?
3 Omdat mense Jehovah se toesig verwerp het, moes hulle hulle eie regeringsvorme instel. Die apostel Paulus het aan medegelowiges in Rome geskryf en na sulke menseregerings verwys as “die hoër owerhede”. In Paulus se dag was die hoër owerheid hoofsaaklik die Romeinse regering onder keiser Nero, wat van 54-68 HJ regeer het. Paulus het gesê dat sulke hoër owerhede “deur God in hulle relatiewe posisies geplaas [is]”. (Lees Romeine 13:1, 2.) Beteken dit dat Paulus menseheerskappy bo God se manier van regeer aanbeveel het? Hoegenaamd nie. Hy het eerder eenvoudig gesê dat Christene “die reëling van God” moet respekteer en sulke heersers moet aanvaar solank Jehovah menseheerskappy toelaat om te bestaan.
’n Weg wat tot rampspoed lei
4. Verduidelik waarom menseheerskappy ongetwyfeld sal misluk.
4 Menseheerskappy onder Satan se invloed sal nogtans beslis misluk. Waarom? Om maar een ding te noem, dit is nie gebaseer op goddelike wysheid nie. Slegs Jehovah besit volmaakte wysheid. Hy is dus die enigste betroubare gids wat kan aandui wat nodig is vir suksesvolle heerskappy (Jer. 8:9; Rom. 16:27). Anders as mense, wat dikwels uit hulle foute leer, weet Jehovah altyd wat die beste manier is om op te tree. Enige regeringsvorm wat nie sy riglyne volg nie, sal ongetwyfeld minderwaardig wees. Om dié rede alleen—om nie eers te praat van die goddelose beweegredes daaragter nie—was Satan se alternatiewe regeringsvorm, deur middel van menseheerskappy, van die begin af tot mislukking gedoem.
5, 6. Wat het klaarblyklik veroorsaak dat Satan in opstand teen Jehovah gekom het?
5 ’n Verstandige persoon begin gewoonlik nie met iets wat hy weet gaan misluk nie. As hy hardkoppig daarmee voortgaan, sal hy noodgedwonge sy fout moet erken. Die geskiedenis het al baie keer bewys dat dit tevergeefs is om die almagtige Skepper teë te staan. (Lees Spreuke 21:30.) Maar omdat Satan verblind is deur verwaandheid en trots, het hy sy rug op Jehovah gekeer. Sodoende het die Duiwel doelbewus ’n weg ingeslaan wat net tot rampspoed kon lei.
6 Satan se vermetele gesindheid is later weerspieël deur ’n Babiloniese heerser wat soos volg gespog het: “Na die hemel sal ek opklim. Bo die sterre van God sal ek my troon verhef, en ek sal op die berg van samekoms gaan sit, in die mees afgeleë dele van die noorde. Ek sal bo die hoogtes van die wolke opklim; ek sal my soos die Allerhoogste maak” (Jes. 14:13-15). Daardie heerser se dwase onderneming het misluk, en die Babiloniese dinastie het tot ’n roemlose einde gekom. Satan en sy wêreld sal eweneens binnekort ’n algehele nederlaag ly.
Waarom toegelaat?
7, 8. Watter voordele het die feit dat Jehovah goddeloosheid ’n tyd lank toegelaat het, ingehou?
7 Party wonder miskien waarom Jehovah nie verhoed het dat mense hulle by Satan skaar en ’n alternatiewe plan vir heerskappy volg wat ongetwyfeld sou misluk nie. As God die Almagtige kon hy dit sekerlik gedoen het (Eks. 6:3). Maar hy het nie. In sy wysheid het hy geweet dat dit op die lange duur die beste sou wees as hy tydelik nie in die mensdom se opstand ingryp nie. Uiteindelik sou Jehovah geregverdig word as ’n regverdige en liefdevolle Heerser, en getroue mense sou by God se besluit baat vind.
8 Hoeveel ellende kon dit die mensegesin tog gespaar het as mense Satan se aanbod verwerp het en geweier het om onafhanklikheid van God se heerskappy te probeer verkry! Nogtans het Jehovah se besluit om mense toe te laat om ’n tyd lank oor hulleself te regeer, voordele ingehou. Dit het by regskapenes deeglik tuisgebring dat dit verstandig is om na God te luister en op hom te vertrou. Deur die eeue heen het mense met verskillende soorte regerings geëksperimenteer, maar nie een was ideaal nie. Hierdie wete versterk aanbidders van God in hulle oortuiging dat Jehovah se manier van regeer inderdaad die beste is. Toegegee, die feit dat Jehovah Satan se goddelose heerskappy toegelaat het, het lyding meegebring vir die mensdom, insluitende dié wat God getrou aanbid. Nogtans het die tydelike toelating van goddeloosheid voordele ingehou vir hierdie getroue aanbidders.
’n Opstand wat daartoe gelei het dat Jehovah verheerlik word
9, 10. Verduidelik hoe Satan se heerskappy daartoe gelei het dat Jehovah verheerlik word.
9 Die feit dat mense toegelaat is om deur Satan beïnvloed te word en oor hulleself te regeer, het geensins Jehovah se manier van regeer onder verdenking gebring nie. Inteendeel! Die geskiedenis bewys dat Jeremia se geïnspireerde woorde oor mense se onvermoë om oor hulleself te regeer, waar is. (Lees Jeremia 10:23.) Daarbenewens het Satan se opstand Jehovah ’n geleentheid gegee om Sy voortreflike eienskappe op ’n opvallender wyse te openbaar. Hoe so?
10 Teen die agtergrond van Satan se rampspoedige heerskappy word Jehovah se volmaakte eienskappe selfs duideliker gesien as wat dalk andersins die geval sou gewees het. Sodoende is hy verheerlik in die oë van dié wat hom liefhet. Ja, dit klink dalk na ’n paradoks, maar Satan se manier van regeer het God in werklikheid verheerlik. Dit het die voortreflike manier beklemtoon waarop Jehovah hierdie aanval op sy soewereiniteit hanteer het. Om hierdie waarheid toe te lig, kom ons bespreek kortliks ’n paar van Jehovah se eienskappe en sien hoe Satan se goddelose heerskappy Jehovah beweeg het om hierdie eienskappe op bykomende maniere te openbaar.
11. Hoe is Jehovah se liefde geopenbaar?
11 Liefde. Die Skrif sê vir ons: “God is liefde” (1 Joh. 4:8). Die skepping van mense was allereers ’n blyk van God se liefde. Verder getuig die vreesinboesemende en wonderlike manier waarop ons gemaak is, van God se liefde. Jehovah het die mens ook op liefdevolle wyse voorsien van ’n pragtige tuiste wat alles bevat wat hulle nodig het om gelukkig te wees (Gen. 1:29-31; 2:8, 9; Ps. 139:14-16). Maar toe goddeloosheid in die mensegesin ingebring is, het Jehovah sy liefde op nuwe maniere getoon. Hoe? Die apostel Johannes haal Jesus se woorde soos volg aan: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Joh. 3:16). Is daar ’n merkwaardiger manier waarop God sy liefde vir die mensdom kon toon as deur sy enigverwekte Seun na die aarde te stuur om sondaars los te koop? (Joh. 15:13). Hierdie groot blyk van liefde het ook vir mense as ’n voorbeeld gedien en hulle die geleentheid gegee om God se selfopofferende liefde in hulle daaglikse lewe te weerspieël, soos Jesus gedoen het.—Joh. 17:25, 26.
12. In watter opsig word Jehovah se krag getoon?
12 Krag. Slegs “God, die Almagtige,” het die krag om lewe te skep (Op. 11:17; Ps. 36:9). By geboorte is ’n mens as ’t ware soos ’n leë bladsy. By die dood het hy daardie leë bladsy gevul met ’n leeftyd van besluite, dade en ondervindinge wat sy individualiteit en persoonlikheid gevorm het. Hierdie inligting kan in Jehovah se geheue bewaar word. Op die bestemde tyd kan Jehovah dié persoon weer lewend maak en sy unieke lewenspatroon ten volle herstel (Joh. 5:28, 29). Hoewel die dood nie deel van God se oorspronklike voorneme vir die mens was nie, het dit Jehovah dus die geleentheid gegee om te toon dat sy krag selfs verder reik as die graf. Jehovah is inderdaad “God, die Almagtige”.
13. Hoe was Jesus se offerande ’n bewys van Jehovah se volmaakte geregtigheid?
13 Geregtigheid. Jehovah lieg nie; hy tree ook nie onregverdig op nie (Deut. 32:4; Tit. 1:2). Hy hou altyd by die hoogste standaarde van waarheid en geregtigheid, selfs wanneer dit wil voorkom of dit tot sy nadeel is (Rom. 8:32). Hoe pynlik moes dit tog vir Jehovah gewees het om te sien hoe sy geliefde Seun aan ’n folterpaal sterf asof Jesus ’n ontroue lasteraar was! Tog was Jehovah, weens sy liefde vir onvolmaakte mense, bereid om toe te laat dat hierdie pynlike gebeurtenis plaasvind om sy eie volmaakte standaard van geregtigheid te handhaaf. (Lees Romeine 5:18-21.) ’n Wêreld vol ongeregtigheid het Jehovah die geleentheid gegee om te bewys dat hy die toonbeeld van geregtigheid is.
14, 15. Wat is ’n paar maniere waarop Jehovah se voortreflike wysheid en geduld geopenbaar is?
14 Wysheid. Onmiddellik nadat Adam en Eva gesondig het, het Jehovah die manier geopenbaar waarop hy al die slegte gevolge van hulle opstand ongedaan sal maak (Gen. 3:15). Hierdie onmiddellike optrede, sowel as die feit dat hy besonderhede oor sy voorneme stelselmatig aan sy knegte geopenbaar het, het Jehovah se wysheid sterk na vore laat kom (Rom. 11:33). Niks kan God se vermoë om sake suksesvol te hanteer, belemmer nie. In ’n wêreld wat gekenmerk word deur onsedelikheid, oorlog, onredelikheid, ongehoorsaamheid, wreedheid, partydigheid en huigelary, het Jehovah oorvloedige geleentheid gehad om vir sy skepsele te toon wat ware wysheid is. Die dissipel Jakobus het gesê: “Die wysheid van bo is allereers kuis, dan vredeliewend, redelik, bereid om te gehoorsaam, vol barmhartigheid en goeie vrugte, maak nie partydige onderskeid nie, is nie huigelagtig nie.”—Jak. 3:17.
15 Geduld en lankmoedigheid. Jehovah se geduld en lankmoedigheid sou nouliks so duidelik na vore gekom het as menslike onvolmaaktheid, sonde en tekortkominge nie bestaan het nie. Jehovah se bereidwilligheid om dit duisende jare lank te doen, bewys dat hy hierdie wonderlike eienskappe tot die volmaakte graad besit, en daarvoor moet ons uiters dankbaar wees. Die apostel Petrus het tereg gesê dat ons “die geduld van ons Here as redding” moet beskou.—2 Pet. 3:9, 15.
16. Waarom is Jehovah se bereidwilligheid om te vergewe ’n rede tot groot vreugde?
16 Bereidwilligheid om te vergewe. Ons is almal sondaars, en ons almal struikel dikwels (Jak. 3:2; 1 Joh. 1:8, 9). Hoe dankbaar moet ons tog wees dat Jehovah bereid is om “ryklik” te vergewe! (Jes. 55:7). Dink ook hieraan: Omdat ons as onvolmaakte sondaars gebore word, is ons in ’n posisie om diepe vreugde te ervaar wanneer God ons oortredings vergewe (Ps. 51:5, 9, 17). Wanneer ons hierdie hartverblydende eienskap van Jehovah persoonlik ondervind, versterk dit ons liefde vir hom en spoor dit ons aan om sy voorbeeld te volg in ons handelinge met ander.—Lees Kolossense 3:13.
Waarom die wêreld siek is
17, 18. In watter opsigte het Satan se manier van regeer misluk?
17 Satan se hele wêreldstelsel—’n produk van sy manier van regeer—het deur die eeue heen herhaaldelik en konsekwent misluk. In 1991 het die koerant The European gesê: “Is die wêreld siek? Ja, inderdaad, maar nie weens [’n] daad van God nie—die wêreld se siekte is deur sy eie mense veroorsaak.” Hoe waar is dit tog! Ons eerste ouers is deur Satan beïnvloed en het menseheerskappy bo Jehovah se heerskappy gekies. Sodoende het hulle ’n manier van regeer aan die gang gesit wat beslis sou misluk. Die pyn en ellende wat mense regoor die wêreld ondervind, is tekens dat menseheerskappy deur ’n verskriklike siekte geteister word.
18 Satan se manier van regeer maak op selfsug staat. Maar selfsug kan nooit liefde, wat die grondslag is vir Jehovah se manier van regeer, oorwin nie. Satan se manier van regeer het dit nie reggekry om stabiliteit, geluk of veiligheid teweeg te bring nie. Jehovah se manier van regeer is geregverdig! Het ons hedendaagse bewyse hiervan? Ja, soos ons in die volgende artikel sal sien.
Wat het ons oor heerskappy geleer uit . . .
[Prente op bladsy 25]
Satan se heerskappy het die mensdom nog nooit tot voordeel gestrek nie
[Erkennings]
U.S. Army photo
WHO photo by P. Almasy
[Prent op bladsy 26]
Jehovah se krag reik selfs verder as die graf
[Prent op bladsy 27]
Jehovah se liefde en geregtigheid is geopenbaar deur die offerande van sy Seun