Behou “suiwerheid van hart” in hierdie kritieke tye
“NIEMAND kan ontken dat kuisheid vandag ’n probleem in die Kerk is nie.” Die Katolieke joernalis Vittorio Messori het hierdie opmerking gemaak oor die seksskandale waarby die Kerk in Italië onlangs betrokke was. “En dit kan nie opgelos word deur die kerklike selibaat af te skaf nie, omdat homoseksuele by 80 persent van die gevalle betrokke was—gevalle van seksueel afwykende gedrag deur priesters wat mans en seuns misbruik.”—La Stampa.
Wydverspreide goddeloosheid is ongetwyfeld ’n teken van hierdie “laaste dae” van die teenswoordige stelsel van dinge (2 Tim. 3:1-5). Soos nuusberigte toon, het die gevolglike sedelike verval ’n negatiewe invloed, nie net op mense oor die algemeen nie, maar ook op diegene wat beweer dat hulle mense van God is. Hulle verdorwe en onrein hart beweeg hulle om verderflike dade te pleeg (Ef. 2:2). Jesus het tereg gewaarsku: “Uit die hart kom daar . . . goddelose redenasies, moorde, egbreuk, hoererye, diefstalle, valse getuienisse, lasteringe” (Matt. 15:19). Maar Jehovah God wil hê dat sy knegte “suiwerheid van hart” moet liefhê (Spr. 22:11). Hoe kan ’n Christen dus in hierdie kritieke tye ’n rein hart behou?
Wat beteken dit om “suiwer van hart” te wees?
In die Bybel word “hart” dikwels in simboliese sin gebruik. Volgens een naslaanwerk dui die Bybelterm vir hart op die “diepste wese van die mens” en “is dit in die besonder die deel van die mens wat vir God van belang is, waarin die godsdienslewe gewortel is, wat sedelike gedrag bepaal”. Die hart verteenwoordig wat ons werklik innerlik is. Soos die bogenoemde naslaanwerk beklemtoon, is dít wat Jehovah ondersoek en waaraan hy waarde heg in sy knegte.—1 Pet. 3:4.
In die Bybel kan “suiwer” en “skoon” dui op dinge wat in fisiese sin rein is. Maar die terme word ook toegepas op wat in sedelike en godsdienstige sin onbesmet is—onvervals, onbesoedel of onverdorwe. In die Bergpredikasie het Jesus gesê: “Gelukkig is dié wat suiwer van hart is.” Hy het na dié verwys wat van binne as ’t ware rein is (Matt. 5:8). Hulle emosies, begeertes en beweegredes is suiwer. Hulle het Jehovah met hulle hele hart lief, opreg, sonder huigelary, beweeg deur liefde en dankbaarheid (Luk. 10:27). Jy wil in hierdie sin rein wees, nie waar nie?
Die uitdaging—Om “suiwer van hart” te bly
’n Kneg van Jehovah moet nie net “onskuldig van hande” wees nie, maar ook “rein van hart” (Ps. 24:3, 4). Maar vandag word dit vir God se knegte al hoe moeiliker om “rein van hart” te bly. Satan en die wêreld onder sy beheer sowel as ons onvolmaakte vlees oefen groot druk op ons uit om ons vervreemd van Jehovah te laat raak. Om hierdie druk te weerstaan, is dit van die allergrootste belang dat ons “suiwerheid van hart” liefhet en dit stewig vashou. Dit sal ons beskerm en ons help om vriende van God te bly. Hoe kan ons ’n suiwer hart behou?
In Hebreërs 3:12 vind ons die waarskuwing: “Pas op, broers, dat daar nooit in enigeen van julle ’n goddelose hart met ’n gebrek aan geloof ontwikkel deurdat hy hom van die lewende God terugtrek nie.” Ons kan nie “suiwer van hart” bly as ons ’n hart ontwikkel wat “’n gebrek aan geloof” het nie. Watter idees het Satan die Duiwel versprei om geloof in God te ondermyn? Dit is onder andere die evolusieteorie, sedelike en godsdiensrelativisme en twyfelgedagtes oor die goddelike inspirasie van die Heilige Skrif. Ons moenie toelaat dat ons deur sulke dodelike ideologieë beïnvloed word nie (Kol. 2:8). Daaglikse Bybellees en diep bepeinsing is belangrike verweermiddele teen hierdie aanvalle. Juiste kennis van God se Woord sal ons liefde vir Jehovah en ons waardering vir sy handelinge versterk. Sulke liefde en waardering is onontbeerlik as ons valse redenasies wil verwerp en ons geloof in Jehovah sterk wil hou sodat ons ’n suiwer hart kan behou.—1 Tim. 1:3-5.
Wanneer ons voor vleeslike begeertes te staan kom
Nog ’n soort aanval waarvoor ons te staan kan kom terwyl ons probeer om “suiwerheid van hart” te behou, behels vleeslike en materialistiese begeertes (1 Joh. 2:15, 16). Die liefde vir geld of die begeerte om rykdom te vergaar en materiële dinge te besit, kan die hart verderf en veroorsaak dat ’n Christen dinge doen wat in stryd met God se wil is. ’n Paar het oneerlik geword by die werk, ander verkul of geld of goed gesteel wat nie aan hulle behoort nie.—1 Tim. 6:9, 10.
As ons daarenteen ’n gesonde vrees aankweek om Jehovah te mishaag, geregtigheid liefhet en vasbeslote is om ’n goeie gewete te behou, toon ons dat ons “suiwerheid van hart” liefhet. Hierdie liefde beweeg ons om voort te gaan om “ons in alles eerlik [te] gedra” (Heb. 13:18). Wanneer ons onberispelik optree, kan ons eerlikheid tot ’n goeie getuienis lei. Emilio, ’n Italiaanse Getuie wat voertuie van ’n openbare vervoermaatskappy bestuur, het ’n beursie opgetel waarin daar 470 euro (R5 100) was. Tot sy werksmaats se verbasing het hy die beursie vir sy opsiener gegee, wat dit later vir die persoon wat dit verloor het, gegee het. Party van Emilio se werksmaats was so beïndruk deur sy optrede dat hulle in die Bybel begin belangstel het en dit begin studeer het. Gevolglik het sewe mense uit twee gesinne die waarheid aangeneem. Ja, eerlike gedrag uit ’n suiwer hart kan ander werklik beweeg om God te loof.—Tit. 2:10.
Iets anders wat ’n negatiewe invloed op die suiwerheid van ’n Christen se hart kan hê, is ’n verwronge, onsedelike beskouing van seks. Die feit dat voorhuwelikse, buite-egtelike en homoseksuele verhoudings deur baie as normaal beskou word, kan ’n Christen se hart verderf. ’n Persoon wat voor geslagsonsedelikheid swig, kan huigelagtig ’n dubbele lewe lei deur die sonde weg te steek. Dit sal beslis nie “suiwerheid van hart” weerspieël nie.
Gabriele is gedoop toe hy 15 jaar oud was en het dadelik begin pionier. Maar later het hy tyd saam met onheilsame vriende in nagklubs begin deurbring (Ps. 26:4). Dit was die begin van ’n onsedelike en huigelagtige lewenswyse, en hy moes uit die Christengemeente gesit word. Hierdie dissipline van Jehovah het hom diep laat nadink. Gabriele sê: “Ek het al die dinge begin doen wat ek voorheen nooit ernstig opgeneem het nie. Ek het die Bybel elke dag gelees in ’n poging om te hoor wat Jehovah werklik sê, en ek het teokratiese publikasies noukeurig bestudeer. Ek het gesien hoe lonend en bevredigend persoonlike studie kan wees en hoeveel krag ’n mens uit Bybellees en vurige gebed kan put.” Dit het Gabriele gehelp om sy onsedelike gedrag die rug toe te keer en sy verhouding met Jehovah te herstel.
Gabriele dien nou weer as ’n pionier, saam met sy vrou. Wat met hom gebeur het, bevestig hoe ’n studie van die Bybel en publikasies van “die getroue en verstandige slaaf” ’n persoon kan help om ’n suiwer hart te hê en onsedelikheid te verwerp.—Matt. 24:45; Ps. 143:10.
“Suiwerheid van hart” tydens beproewinge
Druk van teenstanders, ekonomiese ontbering en ernstige siekte het al ’n swaar las op party van God se knegte geplaas. Soms is hulle hart ook negatief beïnvloed. Selfs koning Dawid het so ’n ondervinding deurgemaak: “My gees versmag in my; in my binneste is my hart lam” (Ps. 143:4). Wat het hom in staat gestel om deur sulke tye te kom? Dawid het gedink aan God se handelinge met Sy knegte asook hoe hy self verlos is. Hy het gepeins oor wat Jehovah ter wille van Sy groot naam gedoen het. Dawid het bly nadink oor God se werke (Ps. 143:5). As ons eweneens peins oor ons Skepper en alles wat hy al vir ons gedoen het en nog steeds doen, sal dit ons help selfs wanneer ons beproewinge verduur.
Wanneer ons veronreg is, of dink dat ons veronreg is, kan ons verbitterd word. As ons gedurig tob oor die voorval, kan dit daartoe lei dat ons negatief oor ons broers voel. Ons onttrek ons dalk, sonder ons af en toon dalk min belangstelling in ander. Maar sou so ’n reaksie in ooreenstemming wees met ons begeerte om “suiwerheid van hart” te hê? Dit is duidelik dat ons handelinge en interaksie met ons Christenbroers verband hou met ons doelwit om so ’n hartstoestand te hê.
In ’n wêreld wat al hoe meer verdorwe raak en sedelik versleg, staan ons as ware Christene uit omdat ons “suiwerheid van hart” liefhet. Ons lewe word positief beïnvloed terwyl ons die innerlike vrede geniet wat daaruit spruit as ons God se wil doen. Bowenal geniet ons ’n hegte vriendskap met ons Skepper, Jehovah God, wat diegene liefhet wat “rein van hart” is (Ps. 73:1). Ja, ons kan onder dié wees wat, soos Jesus belowe het, gelukkig sal wees omdat hulle ‘God sal sien’ wanneer Hy optree ten behoewe van dié wat “suiwerheid van hart” liefhet.—Matt. 5:8.