Vrae van lesers
Jesus het vir sy toehoorders gesê: “Julle moet . . . volmaak wees, soos julle hemelse Vader volmaak is.” Hoe kan mense vandag “volmaak” wees?—Matt. 5:48.
Die sleutel tot die antwoord op hierdie vraag is om te verstaan hoe die woorde “volmaak” en “volmaaktheid” in die Bybel gebruik word. Nie alles wat die Skrif as “volmaak” beskryf, is noodwendig in absolute sin volmaak nie. Jehovah is natuurlik in absolute sin volmaak. Mense of dinge kan net in betreklike sin volmaak wees. Die Hebreeuse en Griekse Bybelwoorde wat met “volmaak” vertaal word, beteken dikwels “volkome”, “volwasse” of “onberispelik” volgens die standaarde wat deur ’n owerheid vasgestel is. In alledaagse spraak word die woord gewoonlik in betreklike sin gebruik. ’n Voorbeeld is wanneer iemand sê: “Hy is sy pa se volmaakte ewebeeld.”
Toe Adam en Eva geskep is, was hulle sedelik, geestelik en fisies volmaak. Hulle was volmaak volgens die standaard wat hulle Skepper vasgestel het. Omdat hulle ongehoorsaam was, het hulle nie aan hierdie standaard voldoen nie, en gevolglik het hulle volmaaktheid vir hulle en hulle nakomelinge verloor. Dit is dus Adam wat sonde, onvolmaaktheid en die dood aan die mensdom oorgedra het.—Rom. 5:12.
Maar soos Jesus in die Bergpredikasie duidelik getoon het, kan selfs onvolmaakte mense in betreklike sin volmaak wees. In daardie toespraak het hy standaarde vir volmaakte, of volkome, liefde gestel. Dit is die soort liefde wat God aan die mensdom betoon het. Jesus het gesê: “Hou aan om julle vyande lief te hê en om te bid vir dié wat julle vervolg; sodat julle kan toon dat julle kinders is van julle Vader wat in die hemele is, aangesien hy sy son laat opgaan oor goddeloses en goeies en dit laat reën op regverdiges en onregverdiges” (Matt. 5:44, 45). Deur in hierdie mate liefde te betoon, sou Jesus se dissipels God se volmaakte voorbeeld navolg.
Jehovah se Getuies oor die hele wêreld streef vandag daarna om hierdie hoë standaard van liefde vir ander te handhaaf. Hulle wil graag mense van alle agtergronde, rasse en godsdienste help om tot juiste kennis van Bybelwaarheid te kom. Die Getuies hou tans meer as 7 000 000 Bybelstudies met belangstellendes in 236 lande.
“As julle dié liefhet wat julle liefhet, watter beloning het julle?” het Jesus gevra. “Doen die belastinggaarders nie ook dieselfde nie? En as julle net julle broers groet, wat doen julle wat buitengewoon is? Doen die mense van die nasies nie ook dieselfde nie?” (Matt. 5:46, 47). Ware Christene is nie partydig teenoor mense van ’n sekere opvoedkundige of etniese agtergrond nie; hulle betoon ook nie liefde net aan diegene wat weer liefde aan húlle kan betoon nie. Hulle help eerder die armes en die siekes, die jonges en die oues. Christene kan Jehovah se liefde op hierdie maniere navolg en dus in betreklike sin volmaak wees.
Sal ons ooit die volmaaktheid kan geniet wat Adam verloor het? Ja, gedurende Christus se Duisendjarige Heerskappy, wanneer ‘die Seun van God die werke van die Duiwel verbreek’, sal die gehoorsame mensdom deur geloof in Jesus se losprysoffer algehele volmaaktheid bereik.—1 Joh. 3:8.