Volmaakte lewe—Nie net ’n droom nie!

’n Volmaakte wêreld—wat beteken dit vir jou? Stel jou ’n mensegemeenskap voor waar daar geen misdaad, dwelmmisbruik, hongersnood, armoede of ongeregtigheid is nie. Almal is emosioneel en fisies blakend gesond. Daar is geen droefheid of ongelukkigheid nie, want selfs die dood is uit die weg geruim. Is dit realisties om na so ’n wêreld te smag?

HOEWEL die meeste mense nie die vordering van die wetenskap en tegnologie ignoreer nie, glo hulle nie werklik dat die mens deur sy intelligensie of geleerdheid ’n volmaakte wêreld tot stand sal bring waarin almal in vrede en geluk sal lewe nie. Aan die ander kant is dit ongetwyfeld ’n menslike neiging om dinge te wil verbeter en om foute reg te stel. Onrealistiese drome sal natuurlik nie die haweloses en die armes help nie, en dit sal ook nie die gestremdes en die siekes bevredig wat graag van hulle lyding verlig wil word nie. ’n Volmaakte wêreld sal eenvoudig nie deur die mens se skeppende denke tot stand kom nie. Ondanks die huidige ellende en verdrukking is daar egter grondige redes om te glo dat ’n wêreld wat jy volmaak sal noem werklik op hande is.

Wanneer jy aan volmaakte lewe dink, dink jy dalk aan die lewe van Jesus Christus. Jesus was nie die enigste volmaakte mens wat ooit op die aarde gelewe het nie. Adam en Eva, wat na God se beeld geskep is, het volmaakte lewe in ’n paradys geniet. Maar hulle het hierdie wonderlike toestand verloor as gevolg van hulle opstand teen hulle hemelse Vader (Genesis 3:1-6). Die Skepper het mense egter gemaak met ’n begeerte om vir ewig te lewe. Prediker 3:11 (NW) getuig hiervan: “Alles het [God] mooi gemaak op die tyd daarvoor. Selfs onbepaalde tyd het hy in hulle hart gesit, dat die mensdom nooit die werk wat die ware God gemaak het, van begin tot einde kan uitvind nie.”

Hoewel onvolmaaktheid en sonde tot ’n lewe van “nietigheid” en “slawerny van die verderflikheid” vir die mensdom gelei het, is die woorde van die apostel Paulus bemoedigend: “Die reikhalsende verwagting van die skepping wag op die openbaring van die seuns van God. Want die skepping is aan nietigheid onderwerp, nie uit eie wil nie, maar deur hom wat dit onderwerp het, op grond van hoop dat die skepping self ook van die slawerny van die verderflikheid vrygemaak sal word en die glorieryke vryheid van die kinders van God sal hê” (Romeine 8:19-21). Die Bybel toon duidelik dat God se voorsienings om mense tot ’n volmaakte lewe te herstel deur middel van Jesus Christus moontlik gemaak word.—Johannes 3:16; 17:3.

Buiten hierdie wonderlike hoop vir die toekoms het ons almal die potensiaal om geestelik vordering te maak, en ons vooruitgang kan nou reeds duidelik wees.

Probeer redelik wees

Jesus Christus het die kwessie van volmaaktheid as so belangrik beskou dat hy vir ’n groot gehoor gesê het: “Julle moet gevolglik volmaak wees, soos julle hemelse Vader volmaak is” (Matteus 5:48). Het Jesus werklik verwag dat ons in die huidige goddelose stelsel sonder foute moet wees? Nee. Ons moet beslis probeer om die eienskappe van vrygewigheid, goedhartigheid en liefde teenoor ons medemens aan te kweek, maar ons doen dikwels nie wat reg is nie. Selfs een van Jesus se apostels het geskryf: “As ons ons sondes bely, is hy getrou en regverdig om ons ons sondes te vergewe en ons van alle onregverdigheid te reinig. As ons die bewering maak: ‘Ons het nie gesondig nie’, maak ons hom tot leuenaar en is sy woord nie in ons nie.”—1 Johannes 1:9, 10.

Ons kan nietemin ons beskouing van onsself verbeter, asook die manier waarop ons ander behandel, deur uiterstes te vermy. Waar kan ’n mens ’n beter voorskrif vind om ’n gebalanseerde, redelike persoonlikheid te ontwikkel as in God se Woord, die Bybel? As ons eienskappe soos vreugde en matigheid aankweek, sal dit ons help om oor die weg te kom met ander by die werk, met ons huweliksmaat en met ons ouers of kinders. Die apostel Paulus het Christene aangespoor: “Verheug julle altyd in die Here. Weer eens sal ek sê: Verheug julle! Laat julle redelikheid aan alle mense bekend word.”—Filippense 4:4, 5.

Die voordele van redelikheid

As jy redelike verwagtinge koester en jouself nie met ’n perfeksionistiese benadering pynig of ontmoedig nie, sal dit tot voordeel van jouself en ander wees. Om jou ware potensiaal te ken, behels dat jy realisties sowel as redelik is oor wat jy wil doen. Onthou dat God ons geskep het om op die aarde te lewe en om bevrediging te put uit lonende werk wat onsself en ander tot voordeel strek.—Genesis 2:7-9.

Waarom bid jy nie tot Jehovah as jy te veel van jouself verwag nie? Dit sal vir jou groot verligting bring as jy God se guns verkry. Jehovah ken ons samestelling en onvolmaakte toestand, en daarom is hy nie onredelik of moeilik om te behaag nie. Die psalmis verseker ons: “Soos ’n vader hom ontferm oor die kinders, so ontferm die HERE Hom oor die wat Hom vrees. Want Hy, Hy weet watter maaksel ons is, gedagtig dat ons stof is” (Psalm 103:13, 14). Hoe dankbaar kan ons tog wees dat God op so ’n barmhartige wyse met mense handel! Hy ken ons beperkings, en tog kan ons net so kosbaar wees in sy oë soos geliefde kinders.

Pleks van perfeksionisme na te streef, hoeveel verstandiger is dit tog om geestelike onderskeidingsvermoë en ’n gebalanseerde beskouing aan te kweek! Daarbenewens kan ons seker wees dat niemand kan verhinder dat Jehovah sy voorneme vervul om die mensdom onder God se Koninkryk tot volmaaktheid te verhef nie. Maar wat beteken menslike volmaaktheid?

Volmaakte lewe is beter as perfeksionisme

Volmaaktheid beteken nie dat ’n mens ’n perfeksionis is nie. Diegene wat die voorreg het om in die Paradys op aarde onder God se Koninkryk te lewe, sal beslis nie veeleisende, eiegeregtige mense wees nie. Een van die vereistes om die groot verdrukking te oorleef, is om hartgrondige waardering vir die losprysofferande te toon, soos die internasionale groot skare wat volgens die apostel Johannes se beskrywing sê: “Redding is ons verskuldig aan ons God, wat op die troon sit, en aan die Lam” (Openbaring 7:9, 10, 14). Alle oorlewendes van die naderende groot verdrukking sal dankbaar wees dat Christus gewillig gesterf het vir hulle en vir almal wat geloof in hom beoefen. Sy liefdevolle offerande lê die grondslag vir blywende verligting van hulle onvolmaakthede en swakhede.—Johannes 3:16; Romeine 8:21, 22.

Hoe sal volmaakte lewe wees? Daar sal geen mededinging en selfsugtige ambisie wees nie, maar liefde en goedhartigheid onder mense sal die lewe die moeite werd maak en sal sorge en ’n lae selfbeeld uit die weg ruim. En tog sal volmaakte lewe nie vervelig of eentonig wees nie. God se Woord gee nie al die besonderhede aangaande die Paradys nie, maar dit beskryf wel die soort lewe wat ons kan verwag: “Hulle sal huise bou en bewoon, en wingerde plant en die vrug daarvan eet: hulle sal nie bou dat ’n ander dit bewoon nie; hulle sal nie plant dat ’n ander dit eet nie; want die dae van my volk sal wees soos die dae van die bome, en my uitverkorenes sal die werk van hulle hande self geniet. Hulle sal hul nie tevergeefs vermoei of baar vir skielike ondergang nie.”—Jesaja 65:21-23.

Pleks van te wonder oor watter soort vermaak, winkelsentrums, tegnologie of vervoer die Koninkryk sal voorsien, kan jy jou eerder voorstel hoe jy die vervulling van hierdie woorde gaan geniet: “Die wolf en die lam sal saam wei, en die leeu sal strooi eet soos ’n bees, en stof sal die voedsel van die slang wees; hulle sal geen kwaad doen of verderf aanrig op my hele heilige berg nie, sê die HERE” (Jesaja 65:25). Hoe anders sal volmaakte lewe tog wees as die lewe wat ons vandag het! As jy een van dié gaan wees wat waardig geag word om dan te lewe, sal jy tereg vertroue kan hê dat jou liefdevolle hemelse Vader in jou en jou gesin sal belangstel. “Verlustig jou in die HERE; dan sal Hy jou gee die begeertes van jou hart.”—Psalm 37:4.

Volmaakte lewe is nie net ’n droom nie. Jehovah se liefdevolle voorneme met die mens sal ten volle verwesenlik word. Jy en jou gesin kan onder diegene wees wat tot menslike volmaaktheid verhef sal word en vir ewig in God se nuwe wêreld sal lewe. Die Bybel voorspel: “Die regverdiges sal die aarde besit en vir ewig daarop woon.”—Psalm 37:29.

[Prent op bladsy 6]

Ons kan ons beskouing van onsself en ander verbeter deur nie perfeksionisties of veeleisend te wees nie

[Prent op bladsy 7]

Waarom sien jy jouself nie reeds in die Paradys waar jy vreedsame en regverdige toestande geniet nie?