Is daar werklik enige sin in die lewe?

“IS DAAR enige sin in die lewe?” Tallose mense het al hierdie vraag gevra. Ongelukkig kan baie mense, ongeag hulle uitkyk op die lewe, hulle nie bevry van wat die Oostenrykse neuroloog Viktor E. Frankl beskryf het as ’n “gevoel van sinloosheid en leegheid” in hulle lewe nie.

Waarom voel soveel mense so? Om maar een ding te noem, miljoene mense regoor die wêreld lewe onder uiters ellendige, hartverskeurende toestande. Elke dag staar armoede, siekte, sinlose geweld en onderdrukking hulle in die gesig. Hulle is werklik “sat van ontsteltenis”, soos Job van die ou tyd van menselyding gesê het (Job 14:1). Hulle hoofdoel is eenvoudig om van dag tot dag aan die lewe te bly.

Miljoene ander geniet ’n mate van materiële welvaart. Dit lyk of hulle alles het wat nodig is om ware bevrediging in die lewe te vind. Maar vir baie is dit nie die geval nie. Waarom nie? Want keer op keer verpletter “moeite en skadelike dinge”—onverwagse finansiële terugslae of bittere tragedies, soos die dood van ’n kind—hulle gekoesterde verwagtinge en drome.—Psalm 90:10.

Daar is nog ’n faktor wat hierdie algemene gevoel van “sinloosheid en leegheid” versterk. Wat is dit? Die feit dat die lewe uiters kortstondig is. Vir baie maak dit eenvoudig nie sin dat die mens, wat met soveel potensiaal geseën is, se lewe so kort is nie. Hulle kan die wrede werklikheid waarvoor ons almal te staan kom, nie verstaan nie: Al spring ons die ergste tragedies vry wat mense oorkom, beroof die dood ons vroeër of later van alles.—Prediker 3:19, 20.

Sal dit altyd lyk of die lewe sinloos is?

Koning Salomo van eertydse Israel het die situasie baie goed opgesom. Hy het gesien hoe mense in sy dag hard werk en hulle talente en vermoëns gebruik om te plant, die grond te bewerk, te bou en vir hulle gesinne te sorg, net soos ons dit vandag ook doen. Hy het in werklikheid gevra: ‘Van watter nut is dit alles op die ou end?’ Hy het tot die slotsom gekom dat alles wat mense doen, “leeg en ’n gejaag na die wind” is.—Prediker 2:17, The New English Bible.

Maar het koning Salomo geglo dat alles wat die mens doen, altyd “leeg en ’n gejaag na die wind” sou wees? Nee. Hy het bloot ’n realistiese beskouing uitgespreek van hoe die lewe in hierdie onvolmaakte wêreld verloop. Maar die geïnspireerde Woord van God kan jou die vertroue gee dat dinge nie altyd so sal wees nie!

Hoe kan jy daarvan seker wees? Lees asseblief die volgende twee artikels. Dit kan jou help om te verstaan waarom die lewe so sinloos lyk, hoe hierdie situasie reggestel sal word en hoe jy jou lewe nou reeds werklik sinvol kan maak.