Geskiedenis, nie mites nie — Wagtoring

Geskiedenis, nie mites nie

“Ek [het] alles van die begin af noukeurig nagespeur.”—LUKAS 1:3.

HOE IS DIE BYBEL ANDERS? Legendes en mites is vergesogte verhale wat nie spesifieke plekke, datums en name van geskiedkundige figure aangee nie. In teenstelling hiermee bevat die Bybel tallose geskiedkundige besonderhede wat lesers verseker dat die “woorde [daarin] die hoogste waarheid” is.—Psalm 119:160, The Psalms for Today, deur R.K. Harrison.

’N VOORBEELD: Die Bybel sê dat “Nebukadnesar, die koning van Babilon, . . . [die Judese koning] Jojagin in ballingskap weggevoer [het] na Babilon”. Later het “Ewil-Merodag, die koning van Babilon, in die jaar toe hy koning geword het, die hoof van Jojagin, die koning van Juda, uit die huis van bewaring verhef”. Verder is “’n toegewese deel van die koning af . . . voortdurend aan hom [Jojagin] gegee, daagliks as sy deel, al die dae van sy lewe”.—2 Konings 24:11, 15; 25:27-30.

WAT ARGEOLOË ONTDEK HET: In die ruïnes van eertydse Babilon het argeoloë administratiewe dokumente gevind wat uit die bewindstydperk van Nebukadnesar II dateer. Dit bevat lyste van rantsoene wat voorsien is aan gevangenes en ander wat van die koningshuis afhanklik was. Die lyste sluit “Jaukin [Jojagin]”, wat die “koning van die land van Jahud (Juda)” was, en sy huisgesin in. Wat van Nebukadnesar se opvolger, Ewil-Merodag? ’n Inskripsie op ’n vaas wat naby die stad Susa gevind is, sê: “Paleis van Amil-Marduk [Ewil-Merodag], koning van Babilon, seun van Nebukadnesar, koning van Babilon.”

WAT DINK JY? Is enige ander eertydse godsdiensgeskrif so spesifiek en akkuraat wanneer dit geskiedkundige besonderhede meld? Of is die Bybel uniek?

[Lokteks op bladsy 5]

“Die chronologiese en geografiese verklarings is akkurater en betroubaarder as dié wat in enige ander ou dokument gevind word.”—A SCIENTIFIC INVESTIGATION OF THE OLD TESTAMENT, DEUR ROBERT D. WILSON

[Prent op bladsy 5]

Babiloniese dokument wat melding maak van koning Jojagin van Juda

[Foto-erkenning op bladsy 5]