Waarom vier party mense nie Kersfees nie?

Regoor die wêreld vier byna tweemiljard mense Kersfees elke jaar op 25 Desember, terwyl ten minste 200 miljoen Jesus se verjaarsdag op 7 Januarie vier. Maar daar is ook miljoene wat verkies om glad nie Kersfees te vier nie. Waarom nie?

Een rede is moontlik dat hulle aan ’n godsdiens behoort wat nie deel van die Christendom is nie. Hulle is dalk Jode, Hindoes of Sjintoïste, om maar ’n paar te noem. Ander, soos ateïste, agnostici, vrydenkers of sekulêre humaniste, beskou die Kersverhaal as ’n mite.

Maar verbasend genoeg verwerp ’n groot aantal mense wat in Jesus glo, die Kerstradisies. Waarom? Hulle gee ten minste vier redes.

Eerstens, hulle glo nie dat Jesus in Desember of in Januarie gebore is nie. Die Bybel meld nie ’n spesifieke datum nie. Dit sê eenvoudig: “Daar was ook in daardie selfde landstreek herders wat in die oop veld gebly en in die nag oor hulle kuddes wag gehou het. En skielik het Jehovah se engel by hulle gestaan, en . . . die engel het vir hulle gesê: ‘. . . Daar is vandag vir julle . . . ’n Redder gebore, wat Christus die Here is.’”—Lukas 2:8-11.

Die feite dui daarop dat Jesus omstreeks die begin van Oktober gebore is toe herders en hulle kuddes nog die nagte in die veld deurgebring het. Die landstreek om Betlehem ondervind gedurende Desember en Januarie sy koudste weer. Die kuddes word dus snags na ’n beskutte plek geneem sodat hulle warm kan bly.

’n Tweede rede: Die enigste gebeurtenis wat Jesus sy volgelinge spesifiek beveel het om te onderhou, is sy dood, nie sy geboorte nie, en dit moes as ’n eenvoudige gemeenskaplike maaltyd gehou word (Lukas 22:19, 20). Let ook daarop dat die Evangelies van Markus en Johannes niks oor Jesus se geboorte sê nie.

’n Derde rede: Daar is geen geskiedkundige bewyse dat die vroeë Christene Christus se geboorte gevier het nie. Maar hulle het wel sy dood herdenk (1 Korintiërs 11:23-26). Dit was eers meer as 300 jaar ná Jesus se geboorte dat die Christendom Kersfees amptelik op 25 Desember begin vier het. Interessant genoeg, in die middel van die 17de eeu het ’n parlementswet Kersvieringe in Engeland verbied. In die Verenigde State het die Algemene Hof van Massachusetts dit ook gedoen. Waarom? Die boek The Battle for Christmas sê: “Daar is geen Bybelse of geskiedkundige rede om te sê dat Jesus op 25 Desember gebore is nie.” Dit voeg by dat Kersfees vir die Puriteine “niks anders as ’n heidense fees met ’n Christelike voorkoms was nie”.

Dit bring ons by die vierde rede: Die afstootlike oorsprong van die viering self. Die oorsprong van Kersfees kan teruggespoor word tot heidense Rome met sy mengelmoes van feeste ter ere van die landbougod Saturnus en die songod Sol Invictus, of Mitra. Die antropoloë Christian Rätsch en Claudia Müller-Ebeling, medeskrywers van die boek Pagan Christmas, sê: “Soos baie voor-Christelike gebruike en opvattings, is die ou fees wat die jaarlikse terugkeer van die son herdenk het, opnuut toegewy aan die geboorte van Christus.”

Kan jy in die lig van die voorafgaande sien waarom ware Christene nie Kersfees vier nie?