Kan jy godsdiens vertrou wanneer dit kom by geld?

Estelle,a ’n ma van sewe kinders, het gereeld kerk toe gegaan. “Ek het vir my predikant gesê dat ek meer omtrent die Bybel wil leer”, sê sy. Maar hy het nooit aangebied om haar te leer nie. Sy het uiteindelik opgehou om kerk toe te gaan. Sy sê verder: “Die kerkraad het vir my geskryf en gesê dat ek geld moet stuur, al kan ek nie daar wees nie. Ek het gedink: ‘Dit maak nie vir hulle saak of ek daar is of nie; hulle wil net my geld hê.’”

Angelina, wat altyd godsdienstig was, het gesê: “In my kerk het hulle die kollektebord drie keer gedurende elke diens omgestuur, en daar is van ons verwag om elke keer te gee. Hulle het altyd geld gevra. Ek het gedink: ‘Hulle het nie God se gees nie.’”

Gebruik die godsdienste in jou omgewing direkte of indirekte druk om geld te kry? Is dit in ooreenstemming met die Bybel?

WAT LEER DIE BYBEL?

Jesus, die stigter van die Christelike geloof, het gesê: “Julle het verniet ontvang, verniet moet julle gee” (Matteus 10:8). Die boodskap van die Bybel is kosbaar en moet beskikbaar wees vir almal wat dit wil hê.

Hoe het die vroeë Christene gemeentelike uitgawes gedek?

Elkeen het bygedra “net soos hy hom in sy hart voorgeneem het, nie teësinnig of onder dwang nie, want God het ’n blymoedige gewer lief” (2 Korintiërs 9:7). Die apostel Paulus het gesê: “Dit was deur nag en dag te werk, om nie een van julle ’n duur las op te lê nie, dat ons die goeie nuus . . . verkondig het” (1 Tessalonisense 2:9). Paulus het as ’n tentmaker gewerk om hom in sy bediening te onderhou.—Handelinge 18:2, 3.

WAT VAN JEHOVAH SE GETUIES?

Jehovah se Getuies vergader gewoonlik in beskeie geboue wat Koninkryksale genoem word. Hoe word uitgawes gedek? Hulle stuur nooit kollekteborde om nie, en hulle stuur ook nie koeverte uit om bydraes te vra nie. Enigiemand wat die geestelike program waardeer, kan eerder onopsigtelik ’n bydrae in ’n bydraebussie in die Koninkryksaal gooi.

Dit kos natuurlik geld om hierdie tydskrif te druk en te versend. Maar jy sal nooit handelsadvertensies of versoeke om geld daarvoor sien nie. Die klem word op die verspreiding van Bybelwaarheid gelê.

Wat dink jy: Is die gesindheid agter hierdie reëlings in ooreenstemming met Jesus se woorde en die voorbeeld van die vroeë Christene?