Ons behoort aan Jehovah
“Gelukkig is die nasie wie se God Jehovah is, die volk wat hy as sy erfdeel uitgekies het.” — PS. 33:12.
1. Hoekom het Jehovah die reg om te sê dat alles aan hom behoort? (Sien prent aan begin van artikel.)
ALLES behoort aan Jehovah! “Die hemel, ja, die hemel der hemele, die aarde en alles wat daarin is”, behoort aan hom (Deut. 10:14; Op. 4:11). Daarom behoort alle mense aan Jehovah omdat hy hulle geskep het (Ps. 100:3). Maar regdeur die mensegeskiedenis het God spesifieke groepe mense gekies om op ’n spesiale manier aan hom te behoort.
2. Wie word in die Bybel geïdentifiseer as mense wat op ’n spesiale manier aan Jehovah behoort?
2 Byvoorbeeld, in Psalm 135 word getroue aanbidders van Jehovah in eertydse Israel “sy spesiale eiendom” genoem (Ps. 135:4). Die boek Hosea het ook voorspel dat party nie-Israeliete Jehovah se volk sou word (Hos. 2:23). Hosea se profesie is vervul toe Jehovah ook nie-Jode begin kies het om saam met Christus te regeer (Hand. 10:45; Rom. 9:23-26). Hierdie “heilige nasie” is op ’n unieke manier Jehovah se ‘spesiale besitting’. Die lede daarvan is met heilige gees gesalf en is gekies om in die hemel te lewe (1 Pet. 2:9, 10). Maar wat van al die getroue Christene in ons dag wat die hoop het om op die aarde te lewe? Jehovah noem hulle ook sy “volk” en sy “uitverkorenes”. — Jes. 65:22.
3. (a) Wie geniet vandag ’n spesiale verhouding met Jehovah? (b) Wat sal ons in hierdie artikel bespreek?
3 Vandag dien die “klein kuddetjie”, wat ’n hemelse hoop het, en die “ander skape”, wat ’n aardse hoop het, Jehovah saam as “een kudde” (Luk. 12:32; Joh. 10:16). Ons wil graag vir Jehovah wys hoe baie ons dit waardeer om ’n spesiale verhouding met hom te hê. In hierdie artikel gaan ons na verskillende maniere kyk waarop ons vir Jehovah kan wys dat ons dankbaar is vir hierdie unieke voorreg wat hy ons gee.
ONS WY ONS LEWE AAN JEHOVAH TOE
4. Wat is een manier waarop ons vir Jehovah kan wys dat ons dankbaar is dat ons sy vriend kan wees, en hoe het Jesus iets soortgelyks gedoen?
4 Ons wys vir Jehovah dat ons dankbaar is deur onsself heelhartig aan hom toe te wy. Wanneer ’n persoon hom laat doop, wys hy vir almal dat hy aan Jehovah behoort en dat hy hom gewillig aan Jehovah onderwerp (Heb. 12:9). Jesus het iets soortgelyks gedoen toe hy hom laat doop het. Dit was asof hy vir Jehovah gesê het: “Ek het daarin behae geskep, o my God, om u wil te doen” (Ps. 40:7, 8). Al was Jesus van sy geboorte af deel van ’n nasie wat aan God toegewy was, het hy homself aangebied om Jehovah se wil te doen.
5, 6. (a) Hoe het Jehovah gereageer toe Jesus gedoop is? (b) Gebruik ’n voorbeeld om te wys hoekom Jehovah ons toewyding waardeer, al behoort alles reeds aan hom.
5 Hoe het Jehovah gereageer toe Jesus gedoop is? Die Bybelverslag sê: “Nadat Jesus gedoop is, het hy onmiddellik uit die water opgekom; en kyk! die hemele is geopen, en hy het gesien hoe God se gees soos ’n duif neerdaal en op hom kom. Kyk! Ook was daar ’n stem uit die hemele wat gesê het: ‘Dit is my Seun, die geliefde, wat ek goedgekeur het’” (Matt. 3:16, 17). Al het Jesus reeds aan sy hemelse Vader behoort, was Jehovah baie bly om te sien dat sy Seun gewillig is om net Sy wil te doen. Jehovah aanvaar ook graag ons toewyding, en hy sal ons daarvoor seën. — Ps. 149:4.
6 Dink byvoorbeeld aan ’n man wat ’n tuin vol pragtige blomme het. Eendag pluk sy dogtertjie een van die blomme en gee dit vir hom as ’n presentjie. Maar behoort die blom nie alreeds aan die man nie? Hoe kan sy vir hom iets gee wat reeds syne is? ’n Liefdevolle pa sou nie eers aan sulke vrae dink nie. Hy sou eerder baie bly wees, want hy weet dat sy dogtertjie dit vir hom gee omdat sy vir hom lief is. Daardie blom sou seker vir hom baie meer beteken as al die ander blomme in sy tuin. Net so is Jehovah ook baie bly wanneer ons gewillig is om ons lewe aan hom toe te wy. — Eks. 34:14.
7. Hoe het Maleagi beklemtoon hoe Jehovah voel teenoor diegene wat hom gewillig dien?
7 Lees Maleagi 3:16. As jy jou nog nie toegewy en laat doop het nie, sal dit goed wees om te dink aan hoe belangrik dit is om hierdie stap te doen. Van die oomblik toe jou lewe begin het, het jy, net soos alle ander mense, aan Jehovah behoort. Maar dink net hoe bly dit Jehovah sou maak as jy jou aan hom toewy en sy wil doen omdat jy erken dat hy die Heerser oor alles is (Spr. 23:15). Jehovah weet wie hom gewillig dien, en hy skryf hulle name in sy “gedenkboek”.
8, 9. Wat vereis Jehovah van diegene wie se naam in sy “gedenkboek” geskryf is?
8 Daar is sekere dinge wat ons moet doen as ons wil hê dat ons naam in Jehovah se “gedenkboek” moet bly. Maleagi het gesê dat ons ‘Jehovah moet vrees en aan sy naam moet dink’. As enigiemand of enigiets vir ons belangriker word as Jehovah, sal ons naam uit Jehovah se figuurlike boek van die lewe verwyder word. — Eks. 32:33; Ps. 69:28.
9 Daarom is daar baie meer betrokke by ons toewyding aan Jehovah as om net te belowe dat ons sy wil sal doen en ons in water te laat doop. Hierdie dinge word een keer gedoen en word gou deel van die verlede. Om Jehovah se kant te kies en deel van sy volk te wees vereis dat ons hom altyd gehoorsaam — nou en vir die res van ons lewe. — 1 Pet. 4:1, 2.
ONS VERWERP WÊRELDSE BEGEERTES
10. Watter duidelike verskil moet daar wees tussen diegene wat Jehovah dien en diegene wat hom nie dien nie?
10 In die vorige artikel het ons gekyk na die Bybelverslae oor Kain, Salomo en die Israeliete. Hulle het almal gesê dat hulle Jehovah aanbid, maar hulle was nie uitsluitlik aan hom toegewy nie. Hierdie voorbeelde help ons om te sien hoe belangrik dit is dat diegene wat werklik aan Jehovah behoort, lief moet wees vir wat goed is en moet haat wat sleg is (Rom. 12:9). Daarom het Jehovah, nadat Maleagi verwys het na die “gedenkboek”, gepraat van ‘die onderskeid tussen ’n regverdige en ’n goddelose, tussen iemand wat God dien en iemand wat hom nie dien nie’. — Mal. 3:18.
11. Hoekom moet ander mense duidelik kan sien dat ons uitsluitlik aan Jehovah toegewy is?
11 Daar is nog ’n manier waarop ons vir Jehovah kan wys dat ons dankbaar is dat hy ons as sy volk gekies het. Ons geestelike vooruitgang moet “vir almal duidelik . . . wees” (1 Tim. 4:15; Matt. 5:16). Vra jou af: ‘Is dit vir ander mense duidelik dat ek in elke aspek van my lewe aan Jehovah getrou is? Soek ek na geleenthede om vir ander te sê dat ek een van Jehovah se Getuies is?’ Dit sal Jehovah se hart baie seermaak as ons, nadat hy ons as sy volk gekies het, nie vir ander mense wil sê dat ons aan hom behoort nie. — Ps. 119:46; lees Markus 8:38.
Is dit duidelik uit die manier waarop jy lewe dat jy een van Jehovah se Getuies is? (Sien paragraaf 12, 13)
12, 13. Hoekom is dit soms moeilik om party mense as Jehovah se Getuies te identifiseer?
12 Dit is baie jammer dat party persone “die gees van die wêreld” navolg en dit vir ander mense moeilik maak om agter te kom of ‘hulle God dien en of hulle hom nie dien nie’ (1 Kor. 2:12). “Die gees van die wêreld” maak dat mense op die ‘begeertes van die vlees’ fokus (Ef. 2:3). Byvoorbeeld, hoewel daar al baie raad oor die onderwerp gegee is, kies party nog steeds om soos die wêreld te lyk en aan te trek. Hulle dra klere wat te styf sit, te kort is of te veel wys, selfs wanneer hulle Christelike vergaderinge bywoon. Of hulle het ’n buitengewone haarstyl (1 Tim. 2:9, 10). Die gevolg is dat wanneer hulle tussen ander mense is, dit moeilik is om te sien wie aan Jehovah behoort en wie “’n vriend van die wêreld” is. — Jak. 4:4.
13 Party Getuies doen ook ander dinge wat wys dat hulle wêreldse gedrag nie heeltemal verwerp nie. By partytjies dans en gedra hulle hulle op ’n manier wat nie vir Christene aanvaarbaar is nie. En die kommentare en foto’s van hulleself wat hulle op sosiale media plaas, is nie wat ’n mens van ’n geestelike persoon sou verwag nie. Dalk is hulle nie in die Christengemeente gedissiplineer vir ’n ernstige sonde nie, maar hulle kan ’n negatiewe invloed op ander hê wat hulle bes doen om anders as die wêreld te wees. — Lees 1 Petrus 2:11, 12.
Moenie toelaat dat jy beïnvloed word deur diegene wat nie heeltemal aan Jehovah se kant is nie
14. Wat moet ons doen as ons ons spesiale vriendskap met Jehovah wil beskerm?
14 Die wêreld moedig mense aan om te fokus op “die begeerte van die vlees en die begeerte van die oë en die spoggerige vertoon van ’n mens se lewensmiddele” (1 Joh. 2:16). Maar omdat ons aan Jehovah behoort, word ons gewaarsku om “goddeloosheid en wêreldse begeertes te verwerp en om met gesonde verstand en regverdigheid en godvrugtige toegewydheid te midde van hierdie teenswoordige stelsel van dinge te lewe” (Tit. 2:12). Die manier waarop ons praat, ons eet- en drinkgewoontes, hoe ons lyk en aantrek en ons werksgewoontes — alles wat ons doen — moet dit vir almal duidelik maak dat ons uitsluitlik aan Jehovah toegewy is. — Lees 1 Korintiërs 10:31, 32.
ONS HET “INTENSE LIEFDE VIR MEKAAR”
15. Hoekom moet ons ons broers en susters met vriendelikheid en liefde behandel?
15 Ons wys dat ons Jehovah se spesiale vriendskap waardeer deur die manier waarop ons ons broers en susters behandel. Hulle behoort ook aan Jehovah. As ons dit heeltyd in gedagte hou, sal ons ons broers en susters altyd met vriendelikheid en liefde behandel (1 Tess. 5:15). Jesus het vir sy volgelinge gesê: “Hieraan sal almal weet dat julle my dissipels is, as julle liefde onder mekaar het.” — Joh. 13:35.
16. Watter voorbeeld in die Wet van Moses wys vir ons hoe Jehovah oor sy volk voel?
16 Kom ons kyk na die volgende voorbeeld om te sien hoe ons mekaar in die gemeente moet behandel. Die voorwerpe in Jehovah se tempel was uitsluitlik toegewy, of opsygesit, om in rein aanbidding gebruik te word. Die Wet van Moses het duidelike instruksies gegee oor hoe hierdie voorwerpe hanteer moes word, en enigeen wat dit nie gevolg het nie, sou doodgemaak word (Num. 1:50, 51). As Jehovah lewelose voorwerpe wat in sy tempel gebruik is, so beskerm het, sal hy beslis sy toegewyde, lojale aanbidders beskerm wat hy as sy volk uitgekies het! Toe Jehovah eenkeer met sy volk gepraat het, het hy gesê: “Wie aan julle raak, raak aan my oogappel.” — Sag. 2:8.
17. Waaraan skenk Jehovah aandag en waarna luister hy?
17 Dit is interessant dat Maleagi Jehovah uitbeeld as iemand wat ‘aandag skenk en luister’. Hy sien hoe Sy volk mekaar behandel en hoor hoe hulle met mekaar praat (Mal. 3:16). Jehovah ken beslis “dié wat aan hom behoort” (2 Tim. 2:19). Hy weet van elke ding wat ons doen en sê (Heb. 4:13). Jehovah ‘skenk aandag en luister’ wanneer ons nie vriendelik is met ons broers en susters nie. Maar ons kan daarvan seker wees dat Jehovah dit ook raaksien wanneer ons gasvry, vrygewig en vriendelik teenoor ons broers en susters is en hulle vergewe. — Heb. 13:16; 1 Pet. 4:8, 9.
“JEHOVAH SAL SY VOLK NIE VERSTOOT NIE”
18. Hoe kan ons wys dat ons die voorreg waardeer om Jehovah se volk te wees?
18 Ons wil graag vir Jehovah wys dat ons die voorreg waardeer om sy volk te wees. Ons erken dat ons aan hom behoort deur ons vrywillig aan hom toe te wy. Dit is die beste besluit wat enigiemand kan neem. Al lewe ons “te midde van ’n verdorwe en verdraaide geslag”, wil ons hê mense moet sien dat ons “onberispelik en onskuldig” is en dat ons “as ligte in die wêreld skyn” (Fil. 2:15). Ons weier om enigiets te doen wat Jehovah haat (Jak. 4:7). Ons is ook lief vir ons broers en susters en ons respekteer hulle, want hulle behoort ook aan Jehovah. — Rom. 12:10.
19. Hoe beloon Jehovah diegene wat aan hom behoort?
19 Die Bybel belowe: “Jehovah sal sy volk nie verstoot nie” (Ps. 94:14). Dit is ’n waarborg dat Jehovah ons nooit sal verlaat nie, maak nie saak wat met ons gebeur nie. Selfs die dood kan ons nie skei van Jehovah se liefde vir ons nie (Rom. 8:38, 39). “As ons lewe, lewe ons vir Jehovah, en ook as ons sterf, sterf ons vir Jehovah. Of ons dan lewe en of ons sterf, ons behoort aan Jehovah” (Rom. 14:8). Ons sien baie uit na die dag wanneer Jehovah al sy lojale vriende wat gesterf het, weer sal laat lewe (Matt. 22:32). En ons geniet nou al baie seëninge. Dit is net soos die Bybel sê: “Gelukkig is die nasie wie se God Jehovah is, die volk wat hy as sy erfdeel uitgekies het.” — Ps. 33:12.