Hoe om jou studie van die Bybel prakties te maak en dit meer te geniet

Josua lees die Wet; die mure van Jerigo val en Ragab se huis bly staan; Josua hou sy hande op na die hemel terwyl hy bid

JOSUA staan voor ’n groot uitdaging. Hy moet die nasie Israel in die Beloofde Land inlei, en dit gaan nie maklik wees nie. Maar Jehovah verseker hom dat hy suksesvol sal wees en moedig hom aan deur te sê: ‘Wees moedig en sterk. Gehoorsaam my Wet. Lees dit dag en nag, sodat jy alles kan doen wat daarin geskrywe staan. Dan sal jy suksesvol wees en verstandig optree.’ — Jos. 1:7, 8.

Ons kom dalk ook voor groot uitdagings te staan in hierdie “kritieke tye . . . wat moeilik is om deur te kom” (2 Tim. 3:1). Ons kan ook suksesvol wees deur die raad te volg wat Jehovah vir Josua gegee het. Ons kan die Bybel gereeld lees en die beginsels daarin toepas wanneer ons probleme ondervind.

Baie van ons sal dalk erken dat ons nie goeie studente is nie en dat ons dit nie geniet om te studeer nie. Maar dit is baie belangrik dat ons die Bybel studeer. In die venster “Probeer die volgende” sal jy goeie wenke kry wat jou sal help om jou studie van die Bybel prakties te maak en dit meer te geniet.

Die psalmis het gesing: “Die bevele van Jehovah is reg; hulle maak die hart bly” (Ps. 19:8). Jy kan dit ook baie geniet om God se Woord te studeer. Terwyl jy dit doen, sal jy kosbare geestelike waarhede ontdek.

Al hoef jy nie soos Josua ’n hele nasie te lei nie, het jy ook probleme wat jy moet oorkom. Daarom moet jy, soos Josua, God se Woord studeer en toepas wat daarin geskryf is. Wanneer jy dit doen, sal jy ook suksesvol wees en verstandig optree.

PROBEER DIE VOLGENDE

Bid voor jy studeer. Die almagtige God het sy gedagtes vir jou in die Bybel laat neerskryf. Daarom moet jy God vra om jou te help wanneer jy die Bybel lees sodat jy die dinge wat jy lees, kan verstaan, dit kan onthou en dit in jou lewe kan toepas. — Esra 7:10.
Vra jouself vrae terwyl jy die Bybel of Bybellektuur lees: ‘Wat leer hierdie gedeelte my oor Jehovah? Hoe hou dit verband met die hoofboodskap van die Bybel? Hoe kan ek hierdie gedagtes gebruik om ander te help?’
Dink na oor wat jy studeer. Stop ’n bietjie, en dink na oor wat jy gelees het. Vra jou af: ‘Hoe laat hierdie gedeelte my voel? Hoekom laat dit my so voel? Hoe hou dit verband met dinge wat in die verlede met my gebeur het, my situasie op die oomblik of dinge wat dalk in die toekoms met my sal gebeur? Hoe kan ek hierdie Bybelbeginsels en raad in my lewe toepas?’ (Job 23:5; Ps. 49:3). Kyk of jy kan verduidelik hoekom Jehovah sy knegte teen sekere dinge waarsku of wat die gevolge sou wees as hulle dinge op ’n ander manier sou doen. — Deut. 32:28, 29.
Gebruik jou verbeelding wanneer jy lees. Byvoorbeeld, kan jy jou voorstel hoe Josef moes gevoel het toe sy broers hom aan die Ismaeliete verkoop het? (Gen. 37:18-28). Wat kan jy sien, hoor en ruik? Dink aan elke karakter, en sit jouself in hulle skoene. Hoe voel hulle, en wat dink hulle? Wanneer jy jou verbeelding gebruik, sal jy voel asof jy daar saam met hulle is, en jy sal meer uit jou studie van die Bybel kry.
Gebruik die studiehulpe wat ons het om jou navorsing interessanter te maak. Maak seker dat jy weet watter hulpe aanlyn en ook in gedrukte vorm in jou taal beskikbaar is. Moenie skaam wees om ander te vra om jou te help en jou te leer hoe om hierdie hulpe goed te gebruik nie. Byvoorbeeld, die Watch Tower Publications Index of die Navorsingsgids vir Jehovah se Getuies sal jou help om inligting oor baie onderwerpe te kry en verskillende Bybelverse beter te verstaan. Gebruik die boekie ’n Studiegids vir God se Woord om interessante inligting oor geografie, chronologie, gewigte en mates, en nog baie ander dinge te kry.
Maak ’n opsomming van die hoofpunte sodat jy die dinge wat jy studeer het, makliker kan onthou. Dit sal ook help as jy vir ander mense vertel wat jy geleer het. Is daar dalk iets wat jy in jou bediening kan gebruik? Wanneer jy hierdie dinge doen, sal jy nie net onthou wat jy geleer het nie, maar jy sal dit ook kan gebruik om ander mense te help.