Goedhartigheid — ’n Eienskap wat deur woorde en dade gewys word

WANNEER ander goedhartig teenoor ons is, laat dit ons regtig goed voel. En ons waardeer dit, want dit wys dat hulle vir ons omgee. Aangesien ons daarvan hou as ander goedhartig teenoor ons is, hoe kan ons hierdie pragtige eienskap aankweek?

’n Goedhartige persoon gee regtig vir ander om en wys dit deur wat hy doen en sê. Hy is nie net vriendelik nie, maar hy behandel ander op ’n liefdevolle manier omdat hy lief is vir hulle en verstaan hoe hulle voel. Maar nog belangriker, goedhartigheid is deel van die vrug van God se heilige gees (Gal. 5:22, 23). Ons moet goedhartigheid aankweek. Om ons te help om dit te doen gaan ons kyk na die voorbeeld wat Jehovah en sy Seun gestel het en hoe ons dit kan navolg.

JEHOVAH IS GOEDHARTIG TEENOOR ALMAL

Jehovah is goedhartig en bedagsaam teenoor almal, selfs teenoor die “ondankbares en goddeloses” (Luk. 6:35). Byvoorbeeld, Jehovah laat ‘sy son opgaan oor goddeloses en goeies en laat dit reën op regverdiges en onregverdiges’ (Matt. 5:45). En selfs diegene wat Jehovah nie as hulle Skepper aanvaar nie, vind nog steeds baat by sy liefdevolle voorsienings wat hulle help om aan die lewe te bly en is tot ’n mate gelukkig.

’n Uitstekende voorbeeld van goedhartigheid kan gesien word in wat Jehovah vir Adam en Eva gedoen het. Kort nadat Adam en Eva gesondig het, het hulle “vyeblare aanmekaargewerk en vir hulle lendebedekkings gemaak”. Maar Jehovah het geweet dat hulle die regte soort klere nodig sou hê om buite Eden te bly, waar die grond vervloek is met “dorings en dissels”. Daarom was Jehovah goedhartig en het hy vir hulle “lang kledingstukke van vel gemaak”. — Gen. 3:7, 17, 18, 21.

Alhoewel Jehovah goedhartig is teenoor die “goddeloses en goeies”, wil hy veral teenoor sy getroue knegte goedhartig wees. Byvoorbeeld, gedurende die dae van die profeet Sagaria was ’n engel ontsteld toe hy sien dat die volk opgehou het om die tempel in Jerusalem te herbou. Jehovah het na die engel geluister en het hom met “goeie woorde” en “vertroostende woorde” geantwoord (Sag. 1:12, 13). Jehovah het die profeet Elia op dieselfde manier behandel. Die profeet het op een stadium so depressief gevoel dat hy Jehovah gevra het om hom dood te maak. Jehovah het Elia se gevoelens in ag geneem en het ’n engel gestuur om hom te versterk. God het ook die profeet verseker dat hy nie alleen is nie. Nadat Jehovah Elia vertroos en gehelp het, kon Elia met sy toewysing voortgaan (1 Kon. 19:1-18). Wie onder God se knegte is die beste voorbeeld van iemand wat Sy goedhartigheid navolg?

JESUS — ’N UITSTEKENDE VOORBEELD VAN GOEDHARTIGHEID

Gedurende Jesus se bediening op die aarde het mense hom geken as iemand wat goedhartig en bedagsaam is. Hy het mense nooit wreed behandel of hulle forseer om dinge te doen nie. Hy het empatie met hulle gehad en gesê: “Kom na my toe, almal wat swoeg en swaar belaai is, en ek sal julle verkwik. . . . My juk is sag en my vrag is lig” (Matt. 11:28-30). Omdat hy goedhartig was teenoor mense, het hulle hom gevolg waar hy ook al gegaan het. Jesus was “ontroer deur innige jammerte vir hulle”, en daarom het hy hulle gevoed, die siekes genees en hulle “baie dinge” omtrent sy Vader geleer. — Mark. 6:34; Matt. 14:14; 15:32-38.

Nog ’n bewys dat Jesus goedhartig is, is dat hy mense op ’n manier behandel het wat toon dat hy hulle gevoelens verstaan en in ag geneem het. Hy was goedhartig teenoor almal wat na hom toe gekom het, al was dit nie altyd vir hom gerieflik nie (Luk. 9:10, 11). Byvoorbeeld, ’n vrou wat aan bloedvloeiing gely het, het aan Jesus se bokleed geraak met die hoop dat sy genees sou word. Maar volgens die Wet van Moses was sy onrein en mag sy dit nie gedoen het nie (Lev. 15:25-28). Maar Jesus het nie vir haar kwaad geword nie. Hy kon sien dat sy bang was en het meegevoel met haar gehad omdat sy 12 jaar lank gely het. Hy het vir haar gesê: “Dogter, jou geloof het jou gesond gemaak. Gaan in vrede, en wees van jou ernstige siekte genees” (Mark. 5:25-34). Wat ’n wonderlike daad van goedhartigheid!

GOEDHARTIGHEID VEREIS POSITIEWE OPTREDE

Ons kan uit die voorbeelde wat vroeër genoem is, sien dat ware goedhartigheid vereis dat ons goeie dinge vir ander doen. In Jesus se illustrasie oor die goedhartige Samaritaan het hy gewys dat optrede belangrik is. Al het die Jode en Samaritane nie van mekaar gehou nie, het die Samaritaanse man in die illustrasie jammer gevoel vir die Joodse man wat beroof, geslaan en halfdood op die pad agtergelaat is. Goedhartigheid het die Samaritaan beweeg om iets te doen. Hy het die man se wonde gedokter en hom na ’n herberg geneem. Die Samaritaan het toe die eienaar van die herberg betaal om vir die beseerde man te sorg. Hy het selfs aangebied om vir enige ekstra koste te betaal. — Luk. 10:29-37.

Goedhartigheid word baie keer deur dade getoon, maar dit kan ook getoon word deur liefdevolle en aanmoedigende woorde. Daarom sê die Bybel dat “angstige besorgdheid in die hart van ’n man . . . dit laat neerbuig, maar die goeie woord maak dit bly” (Spr. 12:25). Goedhartigheid en goedheid sal ons beweeg om aanmoedigende woorde te gebruik wat ander beter sal laat voel.a Ons liefdevolle woorde sal wys dat ons vir hulle omgee en sal hulle help om te volhard ten spyte van hulle probleme. — Spr. 16:24.

HOE OM GOEDHARTIG TE WORD

Alle mense kan die eienskap van goedhartigheid aankweek omdat ons almal “na God se beeld” geskep is (Gen. 1:27). Byvoorbeeld, toe die apostel Paulus onder die toesig van Julius, ’n Romeinse leëroffisier, op pad was na Rome, was Julius goedhartig teenoor die apostel en het hy “hom toegelaat om na sy vriende toe te gaan en hulle versorging te geniet” in die stad Sidon (Hand. 27:3). Later het die inwoners van Malta “buitengewone mensliewendheid”, of goedhartigheid, aan Paulus en ander betoon nadat hulle skip gestrand het. Die mense van die eiland het selfs vir hulle ’n vuur gemaak omdat dit koud was (Hand. 28:1, 2). Alhoewel die mense van die eiland iets goeds gedoen het, behels goedhartigheid meer as om net elke nou en dan goeie dinge vir ander te doen.

Om werklik God se goedkeuring te hê, moet goedhartigheid ’n permanente deel van ons persoonlikheid en lewe wees. Daarom sê Jehovah vir ons om ons te “beklee” met goedhartigheid (Kol. 3:12). Maar dit is nie altyd vir ons maklik om hierdie goddelike eienskap aan te kweek nie. Hoekom nie? Ons huiwer dalk om goedhartig teenoor ander te wees omdat ons skaam is, min selfvertroue het, teenstand ondervind of omdat ons nog soms selfsugtig is. Maar ons kan hierdie struikelblokke oorkom deur vir heilige gees te vra en deur Jehovah se voorbeeld van goedhartigheid na te volg. — 1 Kor. 2:12.

Is daar gebiede in ons lewe waar ons meer goedhartig kan wees? Elkeen moet hom afvra: ‘Luister ek met empatie? Is ek bewus van ander se behoeftes? Wanneer laas was ek goedhartig teenoor iemand wat nie ’n familielid of ’n goeie vriend is nie?’ Stel dan doelwitte, soos om die mense rondom jou beter te leer ken, veral diegene in die Christengemeente. Op hierdie manier kan jy meer leer oor hulle omstandighede en behoeftes. Dan moet jy probeer om goedhartig teenoor hulle te wees en hulle behandel soos jy graag behandel wil word as jy in hulle situasie was (Matt. 7:12). Laastens, Jehovah sal jou pogings om goedhartigheid aan te kweek seën as jy hom vra om jou te help. — Luk. 11:13.

GOEDHARTIGHEID TREK ANDER NA ONS TOE AAN

Toe die apostel Paulus ’n lys van dinge noem wat hom ’n goeie bedienaar gemaak het, het hy “goedhartigheid” ingesluit (2 Kor. 6:3-6). Paulus het persoonlike belangstelling in mense getoon deur hulle op ’n liefdevolle manier te behandel, en dit het hulle tot hom aangetrek (Hand. 28:30, 31). Net so kan ons mense na die waarheid trek deur goedhartig te wees. Wanneer ons teenoor almal goedhartig is, insluitende diegene wat ons teëstaan, kan ons hulle harte versag en hulle vyandigheid laat wegsmelt (Rom. 12:20). En later sal hulle dalk selfs na die boodskap in die Bybel wil luister.

In die Paradys sal diegene wat opgewek word baie bly wees om ware goedhartigheid te ondervind, vir party sal dit dalk die eerste keer wees. Uit dankbaarheid, sal hulle gemotiveerd wees om goedhartig teenoor ander te wees. Enigiemand wat dan weier om goedhartig te wees en ander te help sal nie toegelaat word om onder God se Koninkryk te lewe nie. Maar diegene wat deur God goedgekeur is om vir ewig te lewe sal mekaar op ’n liefdevolle en goedhartige manier behandel (Ps. 37:9-11). Dan sal die wêreld beslis ’n plek wees waar daar vrede is en almal veilig voel! Maar voor daardie wonderlike tyd kom, watter voordele hou dit vir ons nou in as ons goedhartig is?

DIE VOORDELE VAN GOEDHARTIGHEID

Die Bybel sê: “n Man van liefderyke goedhartigheid doen goed aan sy eie siel” (Spr. 11:17). ’n Goedhartige persoon trek mense na hom toe aan, en hulle is gewoonlik ook goedhartig teenoor hom. Jesus het gesê: “Met die maat waarmee julle uitmeet, sal hulle weer vir julle uitmeet” (Luk. 6:38). Daarom is dit maklik vir ’n goedhartige persoon om goeie vriende te maak en te behou.

Die apostel Paulus het die gemeente in Efese aangespoor om ‘goedhartig teenoor mekaar te word’, tere medelye te hê en mekaar vryelik te vergewe (Ef. 4:32). ’n Gemeente vind baie daarby baat wanneer die broers en susters empatie het, goedhartig is en ander probeer help. Sulke persone sal nooit krities wees of onvriendelike en sarkastiese dinge sê wat ander seermaak nie. In plaas daarvan om slegte dinge van ander te sê, probeer hulle eerder om hulle tong te gebruik om ander te help (Spr. 12:18). As gevolg daarvan floreer die gemeente geestelik.

Goedhartigheid is beslis ’n eienskap wat deur woorde en dade gewys word. Wanneer ons goedhartig is, volg ons ons God, Jehovah, se liefdevolle en vrygewige persoonlikheid na (Ef. 5:1). Ons versterk ook ons gemeentes en trek ander na rein aanbidding. Mag ons altyd bekend staan as mense wat goedhartig is!