Geniet Koninkryksbelange die voorkeur in jou lewe?
1 Jesus was bereid om sy lewe ter wille van God se Koninkryk op te offer. Tydens sy verhoor voor Pilatus het hy standvastig gebly (Joh. 18:37). Selfs toe hy sterwend aan die folterpaal gehang het, het hy God se Koninkryk voorgehou as die mens se enigste hoop en aan die kwaaddoener gesê: “Jy [sal] saam met My in die Paradys wees.”—Luk. 23:43.
2 Ons kan verstaan waarom die Koninkryk vir Jesus so belangrik was. Hy is van die hemel af gestuur “om vir die waarheid te getuig” dat God se Koninkryk in geregtigheid gaan heers en dit moontlik sal maak dat Sy wil op die aarde soos in die hemel geskied. Wat kan groter vreugde verskaf as om Jehovah se wil te volbring om die aarde in die Paradys te omskep wat dit oorspronklik veronderstel was om te wees? En watter wonderlike vooruitsig het Jesus gestel —dat alle getroue en gehoorsame mense op die hele aarde verenig sal wees in rein aanbidding!
BEREKEN DIE KOSTE
3 Dit is selde maklik om Jesus se voorbeeld na te volg en Koninkryksbelange eerste te stel. Elke Christen moet prioriteite in sy lewe stel. Jesus het verduidelik dat hy “gekom [het] om vuur op die aarde te werp” en dat daar verdeeldheid in gesinne oor die Koninkryksgeskil sou wees.—Luk. 12:49-53.
4 Navolging van Jesus as ’n voorstander van God se Koninkryk beteken dat jy ’n “folterpaal” en alles wat dit behels, moet dra. As ’n persoon ‘die koste bereken’, beteken dit dat hy bereid moet wees om van sy materiële besittings ‘af te sien’ as dit in die pad staan van sy diens aan God (Luk. 14:27, 28, 33, vgl. NW). Jesus het almal terselfdertyd aangespoor om sy volgelinge te wees en die goeie nuus met ander te deel. Die verkryging van die ewige lewe onder Koninkryksheerskappy is enige prys werd.—Matt. 13:44-46.
MOENIE JULLE KWEL NIE
5 Ons kan onsself gerus afvra of Koninkryksbelange die voorkeur in ons lewe geniet. Jesus het verduidelik: “Niemand kan twee here dien nie; . . . Julie kan nie God en Mammon dien nie!... Moenie julle kwel oor jul lewe—wat julle sal eet en wat julle sal drink nie; of oor jul liggaam—wat julle sal aantrek nie” (Matt. 6:24, 25). Het ons genoeg geloof in Jesus se raad om die Koninkryk eerste te stel en te vertrou dat al hierdie ander dinge bygevoeg sal word? Of, ‘kwel ons ons oor ons lewe’?
6 Bly jy dikwels van gemeentelike vergaderinge of velddiensbedrywighede weg weens sekulêre werk omdat jy dit as vanselfsprekend aanvaar dat jy aan jou werkgewer se eise moet
voldoen? Party broers het betrekkings met hoer salarisse van die hand gewys omdat die werkrooster met teokratiese bedrywighede sou bots. Baie het gevind dat werkgewers toegewings sal maak vir werknemers wat betroubare, gewillige werkers is (Kol. 3:23, 24). Die gemeente word versterk wanneer ouere manne, bedieningsknegte en pioniers ’n goeie voorbeeld in hierdie opsig stel.
BEPLAN NOU
7 Party jongmense het verlede jaar hulle skoolloopbaan voltooi. Beplan julle ’n teokratiese toekoms? Party beplan dalk om ’n rukkie te werk en dan die pionierdiens te betree. Waarom die geleentheid uitstel om ’n volle aandeel in Koninkryksdiens te hê net sodat jy materiële dinge kan versamel? Waarom nie die belangrikste dinge eerste najaag nie? Waarom nie eers die pionierdiens betree as die Koninkryk die belangrikste ding in jou lewe is nie? Wanneer ’n sekulêre werk die voorkeur geniet, bestaan daar die gevaar dat jou hart beswaar kan word deur sorge wat jou van die pionierdiens weghou.—Matt. 6:26; Luk. 21:34.
8 Die wêreld het die gewoonte om baie te vereis van mense wat bereid is om hulself daarvoor af te sloof. As ’n mens voor die verlokkinge van materiële voordele swig, het dit groot skuld tot gevolg, waarvoor jy ’n al hoe groter inkomste nodig het. Hoeveel beter is dit tog om op Jehovah te vertrou aangesien hy ons behoeftes ken en belowe het om daarin te voorsien. As ons altyd Koninkryksbelange eerste stel, sal ons lewe ’n ware doel hê, versterk deur die vooruitsig op eindelose toekomstige seëninge.—Matt. 6:32; 1 Tim. 6:18, 19.