Bied die Goeie Nuus aan—Met behulp van Jehovah se gees
1 Ons het Jehovah se leiding en seën nodig om suksesvol in die Koninkryksbediening te wees. Dit is noodsaaklik dat ons bid om die heilige gees se hulp met ons werk, aangesien Jesus sy dissipels verseker het dat God die heilige gees sou gee aan diegene wat daarvoor vra.—Luk. 11:13.
2 Wanneer ons getuieniswerk onder sekere soorte mense doen, meen ons dalk dat dit nodig is om besonder goed voorberei te wees. (Vergelyk 1 Korinthiërs 2:1-5.) Maar God se gees sal ons help as ons daarvoor vra, en ons sal die waarheid akkuraat en duidelik kan oordra.
3 Die heilige gees sal ons die nodige vrymoedigheid gee om die waarheid aan “alle mense” te verkondig (1 Tim. 2:3, 4; 1 Thess. 2:2). Vrymoedigheid beteken natuurlik nie dat ’n Christen ’n aanmatigende of uitdagende houding sal hê nie.
KWEEK DIE VRUGTE VAN DIE GEES AAN
4 Die apostel Petrus sê dat wanneer ons spreek ons “sagmoedigheid en vrees [innige eerbied, NW]” moet betoon (1 Pet. 3:15). Sagmoedigheid is ’n vrug van die gees en is veral belangrik wanneer ons onredelike persone teëkom. Ander vrugte van die gees sal ons ook help om moeilike situasies te hanteer (Gal. 5:22). Dit is nie nodig om dit as ’n persoonlike belediging te beskou wanneer party mense ons wegwys nie. Besef eerder dat hulle moontlik nie die waarde van die boodskap wat ons bring, verstaan nie. Hierdie gesindheid sal ons help om sagmoedig en eerbiedig te wees. Indien dit gepas is, kan ons ’n vriendelike gedagte meld wanneer ons vertrek. Dit kan ’n nuttige uitwerking hê op persone wat ons nie goedgesind is nie.—Spr. 15:1.
5 Ons word deur ander dopgehou, hetsy ons in die bediening van huis tot huis werk of straatwerk doen. Ons gesprekke en gedrag moet altyd aangenaam en onberispelik wees. Nie almal waardeer ons werk nie. Talle sal nie luister nie. Moenie mismoedig word nie. Onthou dat ons na regskapenes soek (Matt. 10:12-14). Ons gedrag in die velddiens moet God eer deurdat ons die vrugte van sy gees openbaar. Goeie gedrag en bedagsaamheid teenoor ander kan sommige se harte versag.—2 Kor. 6:3.
6 As die persoon met wie ons praat werklik besig is, kan ons moontlik net ’n paar kort gedagtes meld. Maar ons bedagsaamheid kan heel moontlik meebring dat hulle vriendeliker is wanneer ’n Getuie die volgende keer daar aandoen. God se gees sal ons help om opregte liefde te betoon en lankmoedig en vriendelik te wees. Ons verheug ons daarin dat God vanweë sy genade mense dikwels talle geleenthede bied om te luister, met die gevolg dat sommige uiteindelik wel glo.—1 Kor. 13:4.
7 Namate ons toelaat dat God se gees ons pogings rig, sal ons die Koninkryksboodskap op ’n manier aanbied wat by redelike en godvresende mense ingang vind. Maak dit jou doelwit om “die leer van God, ons Verlosser, in alles [te] versier”.—Tit. 2:10.