Bou hegte gesinsbetrekkinge
1 Aangesien so baie dinge ouers se tyd in beslag neem, is dit ’n uitdaging om ’n gesin op te bou wat standvastig is in ware aanbidding. Christengesinne het ’n hegte band nodig wat hulle gedurende die huidige moeilike tye ondersteun (Pred. 4:9-12; 2 Tim. 3:1-5). Namate ’n gesin se geestelikheid groei, word hulle meer eensgesind en sal hulle versterk word om die aanvalle van Satan en sy stelsel te weerstaan.
HOE OM GEESTELIKE EIENSKAPPE TE BOU
2 Gemeentevergaderinge en ’n gesinsbybelstudie is noodsaaklikhede in die gesin se weeklikse rooster (Deut. 6:6, 7; Hebr. 10:23-25; wAF86 11/1 bl. 23-5). Maar meer is nodig. Daar is steeds ’n leemte as dit die enigste geestelike opleiding is wat kinders kry.
3 ’n Heilsame gesinsverwantskap ontwikkel wanneer ouers opregte belangstelling in die geestelike welsyn van die kinders toon. In Israel was ouers verantwoordelik vir die opvoeding en opleiding van hul kinders en het hulle hul deur woord en voorbeeld onderrig. Die Israelitiese opvoedingsprogram het praktiese opleiding ingesluit vir die volwasse lewe, onderrig in basiese vaardighede soos lees en skryf en instruksie om geestelike eienskappe te ontwikkel. By die opvoeding van kinders is klem gelê op die vrees van Jehovah, die Wet, respek vir ouers en ouer mense en die belangrikheid van gehoorsaamheid.
4 Streef daarna om elke dag kwaliteitstyd saam met jou gesin te bestee. Geestelike sake kan in informele omstandighede bespreek word, soos tydens maaltye. Een ouer het verstandig gesê: “Ouers sal tyd saam met hulle kinders bestee—òf om geestelike eienskappe te ontwikkel, òf om hulle te help om uit een probleem na die ander te kom.” Hoeveel beter is dit om die nodige geestelike eienskappe in kinders te bou sodat hulle die wêreld se slaggate kan vermy!—1 Kor. 3:10-15.
HOE OM VELDDIENSBEDRYWIGHEID TE GENIET
5 Vreugde is ’n emosie wat gewek word deur die verkryging of verwagting van die goeie. Wanneer ’n persoon vir velddiens voorberei is, kan hy tereg goeie resultate verwag. Voorbereiding is dus die sleutel tot vreugdevolle velddiens. As ’n gesin gereeld oefen wat om te sê voordat hulle in velddiens uitgaan, bou dit vertroue. (Vergelyk Titus 3:1b.) Elkeen kan ’n doelwit in gedagte hou. Jong kinders of diegene wat net begin velddiens doen, kan gehelp word om ’n eenvoudige aanbieding te oefen.
6 As ouers saam met hul kinders aan die Christenbediening deelneem, kan hulle hul kinders help om die persoonlike belangstelling in mense aan te kweek wat Jehovah en Jesus openbaar. Die bediening help ons ook om ’n intieme verhouding met Jehovah op te bou (wAF82 1/15 bl. 14-20). Party gesinne bestee die hele dag saam deur heilsame ontspanning na velddiens te beplan. Sodoende is daar tyd vir gesprekke in ’n ontspanne atmosfeer en word ouers en kinders hegter saamgesnoer.
7 Wees vasbeslote om die nodige kommunikasievaardighede aan te kweek om ’n hegte verhouding met jou kinders te behou. Moenie dat enigiets jou verhinder om die nodige tyd in te ruim om jou gesin geestelik te versterk nie. Bid vir en saam met jou kinders, aangesien jy weet dat Jehovah jou bouwerk met sukses kan bekroon.—Ps. 127:1; Spr. 24:3.