Help mense om hulle van die duisternis tot die lig te keer
1 Geestelike duisternis oordek die aarde (Jes. 60:2). Sedert die mens se sondeval het Satan, “die god van hierdie wêreld”, mense in geestelike duisternis gehou, en dit het tot sedelike verval gelei.—2 Kor. 4:4.
2 Kry ons, soos Jesus, mense jammer noudat ons deur die waarheid verlig is? (Matt. 9:36). As dit die geval is, sal ons besef hoe belangrik die opdrag is wat hy die apostel Paulus gegee het, naamlik om ‘mense se oë te open, dat hulle hul van die duisternis tot die lig kan bekeer en van die mag van Satan tot God’.—Hand. 26:16-18.
VERLIG HARTE EN VERSTANDE
3 Wat kan ons doen om Satan se slagoffers te help, aangesien hy hulle verstand verblind en hulle hart ongevoelig maak? Ons moet hulle hart en verstand met God se Woord bereik. Paulus het gebid dat die Efesiërs se oë van hulle hart verlig moet word (Ef. 1:17, 18, NW). Niks is kragtiger as God se Woord om die hart te bereik nie (Hebr. 4:12). Hierdie wete moet ons beweeg om die Bybel goed te leer gebruik wanneer ons met ander mense praat.
4 Jou antwoorde op die volgende vrae kan jou help om bekwamer te word in die bediening. Berei jy goed voor vir die velddiens? Hou jy oefensessies om jou vertroud te maak met die inleidings wat die huisbewoners se belangstelling wek? Maak jy daarvan werk om die huidige Onderwerp vir gesprekke te leer en probeer jy dit gebruik? Streef jy daarna om oortuigend uit die Skrif te redeneer by die deure?—Hand. 17:2.
DIE WAGTORING ’N HULPMIDDEL
5 Die Wagtoring het miljoene gehelp om hulle van die duisternis tot die lig te keer. Dit toon hoe ons die Bybel se sedelike beginsels kan toepas, sy profesieë vir ons dag kan verstaan en tussen ware en valse godsdiens kan onderskei sodat ons die weg kan bewandel wat Jehovah se goedkeuring wegdra.
6 Wat het Bybelwaarheid wat in Die Wagtoring verdedig word, vermag? Alle soorte mense word tot redding gehelp deur juiste kennis van God en sy Seun (Joh. 17:3; 1 Tim. 2:4). Een leser het geskryf: ‘Hoe waardeer ek tog Die Wagtoring! Die artikels behoort almal te help om duidelik te sien in watter tye en seisoene ons lewe. Baie dankie vir die ontsaglike hoeveelheid navorsing, studie en werk wat gedoen word ter voorbereiding van Die Wagtoring, wat inderdaad geestelike voedsel is.’
GEBRUIK ONDERSKEIDINGSVERMOË
7 Gedurende hierdie tweede maand van die Wagtoring-intekeningkampanje moet ons geleenthede soek om mense te help sodat hulle hulle van die duisternis tot die lig kan keer. Bybelbesprekings met mense wat ons van huis tot huis ontmoet, help ons om dit te doen. Wanneer ons mense vind wat opreg in die Koninkryksboodskap belangstel, kan ons hulle daarop wys hoe nuttig dit is om Die Wagtoring gereeld te lees. As die huisbewoner die tydskrif ken en dit waardeer, kan jy hom vra of hy graag daarop wil inteken. Waar ’n jaarintekening van die hand gewys word, kan jy ’n halfjaarlikse intekening aanbied. Hou aan om alle intekenaars te besoek met die doel om ’n vrugbare tuisbybelstudie te begin.
8 Wanneer ons van huis tot huis gaan, aan die straatgetuieniswerk deelneem of informeel aan werkmaats, skoolmaats en familielede getuig, verkondig ons die waarheid wat mense vrymaak (Joh. 8:32). Die Wagtoring is ’n spesiale instrument wat hulle kan help om vryheid te verkry en hulle hoop op die ewige lewe te verwesenlik deur hulle van die duisternis tot die lig te keer.