Jongeres het ’n goeie voorbeeld nodig
1 Ons is verheug om ’n toenemende aantal jongmense in ons midde te hê wat ‘Jehovah se naam loof’ (Ps. 148:12, 13). Baie van hulle is nog redelik jonk. Hulle vooruitgang word hoofsaaklik deur die opleiding en voorbeeld van hulle ouers en ander ouer persone in die gemeente bepaal. Iets wat egter nie oor die hoof gesien moet word nie, is die invloed wat ander jongmense, veral ouer tienderjariges en jong volwassenes, uitoefen. As jy in hierdie ouderdomsgroep val, kan jy by hierdie inligting baat vind.
2 Jongmense wat nog nie hulle tienerjare bereik het nie, is geneig om ouer tienderjariges na te boots. Hulle wil van nature soos hulle maats wees wat hulle bewonder. Hulle is geneig om ander jongmense te bewonder wat ietwat ouer is en wat lyk of hulle goed ingelig en meer volwasse is. Gevolglik boots hulle dalk jou spraak en gedrag na, sowel as jou waardering vir geestelike waardes en jou deelname aan gemeentelike bedrywighede.
3 As ouer tienderjarige het jy ’n voorreg sowel as ’n belangrike verantwoordelikheid. Op hierdie oomblik oefen jou voorbeeld waarskynlik ’n invloed op jou jonger vriende uit. Vra jou af: ‘Watter soort invloed oefen ek op jongeres uit? Is ek ernstig, vermy ek dwaashede en verkeerde “begeerlikhede van die jonkheid”? Is ek gehoorsaam aan en eerbiedig teenoor my ouers, die ouere manne en ander ouer persone?’ (2 Tim. 2:22; Kol. 3:20). Wat jy sê en doen, speel dalk ’n belangrike rol in die geestelike vooruitgang van ander jongeres wat op jou doen en late ag slaan.
4 Die verkondiging van die Koninkryksboodskap is die gemeente se vernaamste werk. Jou gewillige en gereelde deelname kan jou metgeselle aanmoedig om ’n groter deelname daaraan te hê. As jy die pionierdiens kan betree, sal jou vriende op soortgelyke wyse aangemoedig word. As jy by die vergaderinge kommentaar lewer en jou hulp aanbied om nodige takies by die Koninkryksaal te verrig, kan jy ook ’n goeie voorbeeld stel.
5 Al was Timotheüs nie meer in sy tienerjare toe Paulus die volgende raad aan hom gegee het nie, kan julle tieners dit toepas: “Wees ’n voorbeeld vir die gelowiges in woord, in wandel, in liefde, in gees, in geloof, in reinheid” (1 Tim. 4:12). Jou geesdriftige en heelhartige deelname aan Jehovah se diens kan jou vriende en jonger waarnemers op ’n positiewe manier motiveer en hulle help om tot geestelike volwassenheid te vorder (Ef. 4:13). Tieners in gesinne wat so pas begin studeer het, word dalk na die waarheid aangetrek deur wat hulle in jou sien.
6 Iets wat van selfs groter belang is, is die feit dat jou ywer om godvrugtige eienskappe aan die dag te lê Jehovah en sy organisasie in ’n goeie lig stel (Spr. 27:11). Opregte waarnemers sal hulle verwonder oor die treffende kontras tussen jou en die jongmense van die wêreld. Jy het dus ’n unieke geleentheid om jongeres te help terwyl jy ’n waardevolle bydrae tot Jehovah se lof lewer.—Ps. 71:17.