Persoonlike studie—’n saak van belang
1 Watter sake is vir ons van groot belang? Dit moet vir ons baie belangrik wees om ’n hegte verhouding met Jehovah op te bou en te handhaaf. Persoonlike studie speel ’n groot rol in die ontwikkeling van sulke innigheid. Vandag laat baie min van ons se omstandighede dit toe dat ons lang tye aan bepeinsing en persoonlike studie kan bestee. Maar as ons God se Woord nie gereeld lees nie, kan ons so swak word dat ons nie die krag het om die gees van die wêreld en sy vleeslike begeertes te weerstaan nie.
2 Ontwikkel ’n verlange na die Woord: Toe ons aanvanklik van God se voornemens geleer het, was ons waarskynlik gretig om meer kennis op te doen. Maar ons honger na geestelike voeding het dalk mettertyd verflou. Ons moet dalk ‘’n verlange ontwikkel’ na geestelike voedsel (1 Pet. 2:2, NW). Hoe kan ons so ’n verlange ontwikkel?
3 Die geur van ’n geliefkoosde kossoort sal ’n mens honger laat voel omdat dit aangename herinneringe opwek. Kort tye van persoonlike studie kan geestelik ’n soortgelyke uitwerking op ons hê. As ons ’n paar smaaklike geestelike happies geniet, kan dit ons aptyt vir dieper waarhede wek. Die bevrediging wat ’n mens daaruit put om te leer, kan ons aanspoor om dieper in Jehovah se Woord te delf.
4 Kry ’n roetine wat vir jou die beste is: Party sit ’n hele aand opsy om persoonlike studie te doen, terwyl ander dit verkies om meer dikwels vir korter tye te studeer. As jy vind dat jy in die vroeë oggendure beter kan konsentreer, besluit jy moontlik om voor ontbyt te studeer. As jy saans wakkerder is, sal jy moontlik besluit om te studeer voor jy gaan slaap. Wat ook al die geval is, dit is belangrik dat jy dit gereeld doen en by die roetine bly wat die beste in jou behoeftes voorsien.
5 Wanneer ons aangemoedig word om meer persoonlike studie te doen, sal ons dalk dadelik daarop wys dat ons reeds ’n vol rooster het. Maar ons almal moet eerlik wees oor hoe ons ons tyd bestee. Bestee ons elke dag baie ure daaraan om na televisieprogramme te kyk? Is ons bereid om van die dinge waarin ons persoonlik belangstel, op te offer? ’n Realistiese ondersoek van hoe ons ons tyd gebruik, sal waarskynlik toon dat daar daagliks tye is wat met groter nut vir persoonlike studie gebruik kan word.—Ef. 5:15, 16.
6 Die studie van God se Woord verdien ons onverdeelde aandag. As ons terselfdertyd iets anders probeer doen, sal dit die voordele verminder. As ons geneig is om te studeer terwyl ons eet, radio luister of televisie kyk, sal ons waarskynlik nie verdiep wees in wat ons probeer leer nie (1 Tim. 4:15, vgl. NW). Ons moet dus ontslae raak van dinge wat ons aandag kan aftrek.—Sien die Skoolhandleiding, bladsye 33-4.
7 Daaglikse studie en toepassing van Bybelraad is belangrik omdat dit die wyse is waarop ons leiding van Jehovah ontvang. Stel jou dit ten doel om die waarheid in die gedrukte stof in jou hart ingang te laat vind. Benut elke geleentheid, hoe kort dit ook al is, om te lees, hersiening te doen of geestelike dinge te bepeins.—Deut. 6:6-8; Kol. 1:9, 10.