Bou ’n intieme verhouding met Jehovah op
1. Wat het een suster oor haar geestelike roetine besef?
1 “Die afgelope 20 jaar of wat in die waarheid het ek werktuiglik vergaderinge bygewoon en aan die veldbediening deelgeneem”, het een Christensuster erken. Sy sê verder: “Ek het tot die gevolgtrekking gekom dat hierdie dinge, hoewel dit belangrik is, nie genoeg is om my te onderskraag wanneer dinge moeilik raak nie. . . . Ek besef nou dat ek my denke moet verander en met ’n betekenisvolle studieprogram moet begin sodat ek Jehovah werklik kan leer ken en liefkry en kan waardeer wat sy Seun vir ons gedoen het.”
2. Waarom is dit belangrik om ’n intieme verhouding met Jehovah op te bou?
2 Dit verg inspanning om ’n hegte persoonlike verhouding met Jehovah op te bou. Meer is nodig as om net ’n roetine van Christelike bedrywighede te volg. As ons nie gereeld met Jehovah kommunikeer nie, kan hy mettertyd vir ons word soos iemand met wie ons vroeër intiem bevriend was, maar kontak verloor het (Op. 2:4). Kom ons kyk hoe persoonlike Bybelstudie en gebed ons kan help om ’n intieme verhouding met Jehovah op te bou.—Ps. 25:14.
3. Watter benadering tot persoonlike studie sal ons help om nader aan God te kom?
3 Gebed en bepeinsing is noodsaaklik: Persoonlike studie wat die hart voed, vereis meer as om net sleutelpunte in die studiemateriaal te onderstreep en teksverwysings na te slaan. Dit behels dat ons nadink oor wat die inligting omtrent Jehovah se weë, standaarde en persoonlikheid openbaar (Eks. 33:13). Wanneer ons ’n begrip van geestelike dinge verkry, raak dit ons emosies en word ons beweeg om oor ons eie lewe na te dink (Ps. 119:35, 111). Persoonlike studie moet gedoen word met die doel om nader aan Jehovah te kom (Jak. 4:8). Ernstige studie vereis tyd sowel as die regte omgewing, en om gereeld te studeer, verg dissipline (Dan. 6:10). Sit jy elke dag tyd opsy om oor Jehovah se wonderlike eienskappe te peins, al lei jy ’n besige lewe?—Ps. 119:147, 148; 143:5.
4. Hoe help gebed tydens persoonlike studie ons om ’n intieme verhouding met Jehovah op te bou?
4 Hartgrondige gebed is ’n noodsaaklike deel van betekenisvolle persoonlike studie. As ons wil hê dat Bybelwaarhede ons hart moet raak en ons moet beweeg om “heilige diens aan God [te] verrig met godvrugtige vrees en ontsag”, het ons God se heilige gees nodig (Heb. 12:28). Daarom moet ons elke studieperiode begin deur Jehovah om sy gees te smeek (Matt. 5:3, voetnoot in NW). Wanneer ons oor die Skrif peins en die studiehulpe gebruik wat deur Jehovah se organisasie voorsien word, maak ons ons hart oop vir Jehovah (Ps. 62:8). Hierdie soort studie is ’n daad van aanbidding waardeur ons ons toegewydheid aan Jehovah toon en ons verhouding met hom versterk.—Jud. 20, 21.
5. Waarom is dit belangrik dat ons elke dag oor God se Woord peins?
5 Soos met alle verhoudings moet ons verhouding met Jehovah voortdurend gevoed word sodat dit deur ons lewe heen kan bly groei. Mag ons dus elke dag die tyd uitkoop om nader aan God te kom, in die wete dat hy, op sy beurt, nader aan ons sal kom.—Ps. 1:2, 3; Ef. 5:15, 16.