Tye het verander
1 Die Bybel deel ons mee dat ‘die toneel van hierdie wêreld aan die verander is’ (1 Kor. 7:31). Hoe waar is dit tog nie vandag nie! Selfs in ons leeftyd het ons drastiese veranderinge gesien in die denke en gedrag van mense op elke vlak van die samelewing. As ons mense met welslae met die Koninkryksboodskap wil bereik, moet ons benadering met die veranderende tye tred hou. Ons wil die goeie nuus op so ’n manier aanbied dat mense daarin belangstel en dat dit hulle hart bereik.
2 Jare gelede was die getuieniswerk in baie lande anders omdat mense meestal rustiger lewens gelei het, en hulle het veilig gevoel. Godsdiens was vir hulle iets heiligs. Die Bybel is hooggeag. In daardie dae het die getuieniswerk dikwels behels dat argumente oor leerstellings weerlê word. Vandag lewe mense in beroering. Godsdiens word bespot. Min mense het geloof in die Bybel. En die teorie van evolusie het baie se geloof in God vernietig.
3 Een reisende opsiener het gesê: “Daar is blykbaar nou soveel probleme en moeilikhede in mense se lewens dat ons hulle moet leer hoe om te lewe.” Wat vir mense van onmiddellike belang is, is natuurlik hulleself, hulle gesin en hulle bekommernisse. Dít is die dinge waaroor hulle die meeste praat wanneer hulle bymekaarkom. Ons moet dit in ons getuieniswerk in gedagte hou.
4 God se Koninkryk is die enigste vaste hoop vir die toekoms: Die meeste mense het min vertroue in menseregerings. Hulle meen dat daar in hulle leeftyd geen vooruitsig op ’n beter wêreld is nie. Valse godsdiens het hulle geen grondslag vir hoop gebied nie. Dit is waarom dit die mensdom se grootste behoefte is om die goeie nuus aangaande God se Koninkryk te hoor. Toon hoe dit uiteindelik die oplossings sal voorsien vir al die probleme waarmee die mensdom te kampe het.
5 Die Bybel is die enigste betroubare bron van leiding: Die mensemassa van vandag is mislei deur leiers wat op menslike wysheid en wêreldse filosofieë vertrou. Mense moet nog besef dat ‘dit die mens wat loop nie toekom om selfs sy voetstappe te rig nie’ (Jer. 10:23, NW). Die waardevolste les wat hulle kan leer, is dat hulle ‘met hulle hele hart op Jehovah moet vertrou en nie op hulle eie insig moet steun nie’ (Spr. 3:5). Hoewel die tye verander het, het die Bybel nie verander nie. Gevolglik moet ons in ons bediening altyd die aandag op God se Woord vestig en ander leer om die geïnspireerde, Goddelike raad daarin te waardeer (2 Tim. 3:16, 17). Om daardie doel te bereik, moet ons mense op die belangrikheid van die Bybel wys deur in ons aanbiedings daarna te verwys, dit te gebruik om hulle vrae te beantwoord en te toon hoe noodsaaklik dit is om dit te bestudeer en die praktiese wysheid daarvan toe te pas.
6 Selfs in vandag se veranderende tye bly ons doelwitte in die bediening dieselfde. Ons moet die goeie nuus van die Koninkryk verkondig, vertroue in God se Woord opbou en ander help om te besef dat hulle die Bybel saam met ons moet studeer. Wat ons sê, moet betrekking hê op die huidige behoeftes van diegene vir wie ons getuig. Sodoende sal ons deelgenote van die goeie nuus met ander kan word en dus die meeste mense wen.—1 Kor. 9:19, 23.