Jehovah se gees is met ons
1 As Jehovah se Getuies het ons ’n ontsaglike werkstoewysing. Jesus het gesê: “Die goeie nuus [moet] eers in al die nasies verkondig word” (Mark. 13:10). Uit ’n menslike standpunt beskou, sou dit onmoontlik gelyk het, maar dit is nie. Ons word deur die grootste krag in die heelal ondersteun—God se gees.—Matt. 19:26.
2 Eerste-eeuse bewyse: Jesus het Jesaja se profesie op homself toegepas en gesê: ‘Jehovah se gees is op my om goeie nuus bekend te maak’ (Luk. 4:17, 18). Voordat hy na die hemel opgevaar het, het hy vir sy apostels gesê dat ook hulle deur die heilige gees krag sal ontvang om “tot in die mees afgeleë deel van die aarde” te getuig. Daarna is Filippus deur heilige gees gerig om vir ’n Etiopiese hofdienaar te getuig, die gees het Petrus na ’n Romeinse hoofman oor honderd gestuur en dit het Paulus en Barnabas uitgestuur om vir die heidense nasies te getuig. Wie sou kon dink dat mense uit sulke agtergronde gunstig op die waarheid sou reageer? Maar hulle hét.—Hand. 1:8; 8:29-38; 10:19, 20, 44-48; 13:2-4, 46-48.
3 Hedendaagse bewyse: Die boek Openbaring vestig die aandag op die heilige gees se betrokkenheid by vandag se predikingswerk deur te sê: “Die gees en die bruid hou aan om te sê: ‘Kom!’ . . . Laat enigeen wat wil die water van die lewe neem, verniet” (Op. 22:17). Die gees het Christus se bruidsklas en hulle metgeselle, die “ander skape”, gemotiveer om die goeie nuus aan alle mense te verkondig (Joh. 10:16). Ons moet ons predikingswerk met vrymoedigheid doen, nooit aarsel om alle soorte mense te nader nie en altyd vol vertroue wees dat God se gees ons sal help. Die 1998 Yearbook voorsien oortuigende bewys dat God se gees steeds met sy knegte is. Kyk na die reaksie! Gedurende die afgelope twee diensjare is daar elke dag gemiddeld meer as 1 000 mense gedoop.
4 Ons kan gerus wees dat God se gees met ons sal bly terwyl ons die Koninkryksboodskap verkondig tot die mate wat Jehovah dit gedoen wil hê. Hierdie kennis moet ons aanmoedig en motiveer om aan te hou om onsself in die allerbelangrikste Koninkrykswerk kragtig in te span.—1 Tim. 4:10.