Tydskrifte kondig die Koninkryk aan
1 As Jehovah se Getuies is ons welbekend vir ons ywerige verkondiging van God se Koninkryk. Die Wagtoring en Ontwaak! wat ons versprei, speel ’n belangrike rol daarin om miljoene mense te help om van God se voornemens te leer. Die boodskap wat hulle bevat, is voorwaar goeie nuus, want dit kondig God se hemelse Koninkryk aan as die enigste hoop vir die mensdom.
2 Die tydskrifte neem mense se ware behoeftes—emosioneel, sosiaal en geestelik—in oënskou. Met sedes en gesinswaardes wat oral om ons agteruitgaan, help Die Wagtoring en Ontwaak! mense om hulle lewensgehalte te verbeter deur vir hulle te wys hoe om Bybelbeginsels toe te pas. Ons sal die voorreg hê om gedurende April en Mei intekeninge op hierdie tydskrifte aan te bied. Waar dit ook al moontlik is, moet ons die Nuwe Wêreld-vertaling van die Christelike Griekse Geskrifte in Afrikaans, Zulu, Suid-Sotho, Xhosa en Tswana saam met die tydskrifte teen ’n bydrae van R6,00 aanbied.
3 Hulle vind werklik byval: Die Wagtoring en Ontwaak! is in feitlik al die tale van die wêreld se bevolkingsgroepe beskikbaar. Ons tydskrifte is dus welbekend. Hier is ’n paar redes waarom dit byval vind by mense:
◼ As tydskrifte van integriteit en waarheid toon hulle duidelik die verskil tussen goed en sleg.
◼ Hulle bied die hoop op ’n regverdige paradys in die toekoms, wat gegrond is op God se belofte om die aarde onder sy Koninkryksheerskappy te bring.
◼ ’n Wye verskeidenheid tydige onderwerpe word bespreek wat by mense van alle agtergronde en kulture byval vind.
◼ Die artikels is bondig, opvoedkundig, feitelik, vry van vooroordeel en beginsels word nie ingeboet nie.
◼ Die treffende prente wek onmiddellik belangstelling, en die duidelike skryfstyl maak die tydskrifte maklik om te lees.
4 Gee hulle wye verspreiding: Doeltreffende tydskrifverspreiding hang grootliks af van hoe deeglik ons ons aanbiedings voorberei, of ons tyd daarvoor opsy sit en hoe ons ons predikingsbedrywighede organiseer. Praktiese wenke word in Ons Koninkryksbediening vir September 1995 en Oktober 1996 gegee, wat ons gerus kan hersien en toepas.
5 Raak vertroud met die tydskrifte: Terwyl jy elke nommer lees, moet jy aan iemand dink wat dit sal waardeer om ’n eksemplaar te hê. Soek na spesifieke punte of tekste wat jy in jou aanbieding kan aanhaal. Dink aan ’n vraag wat jy kan vra om ’n gesprek aan te knoop en belangstelling in die onderwerp aan te wakker.
6 Pas die aanbieding by die persoon aan: Berei ’n eenvoudige, veelsydige aanbieding voor wat jy kan aanpas vir wanneer jy met ’n man, ’n vrou, ’n ouer persoon of ’n jeugdige praat, hetsy dit ’n kennis of ’n vreemdeling is.
7 Wees Wagtoring- en Ontwaak!-bewus: Aangesien die tydskrifte maklik in ’n tas, ’n handsak of ’n baadjiesak pas, kan ons eksemplare saam met ons dra wanneer ons reis of inkopies doen. Bied hulle aan wanneer jy met familie, bure, werksmaats, skoolmaats of onderwysers gesels. Sit elke week ’n dag opsy om tydskrifwerk te doen.
8 Toon waardering vir die tydskrifte: Hulle verloor nooit hulle waarde nie. Die verloop van tyd maak nie die boodskap wat hulle bevat minder belangrik nie. As ons natuurlik ’n spesiale poging aanwend om al die tydskrifte wat ons kry te versprei, sal ouer nommers nie op ons rak ophoop nie.
9 Straatgetuieniswerk is doeltreffend: Dit is een van die beste maniere om die tydskrifte vir baie mense aan te bied. Party verkondigers werk gereeld in besige arkades wanneer mense inkopies doen.
10 Sakegebied is produktief: Wanneer ons van winkel tot winkel werk, het ons nie juis ’n probleem met mense wat nie tuis is nie. Die meeste sakemense is beleef, en baie neem graag die tydskrifte. Vestig die aandag op artikels wat gepas is vir die spesifieke onderneming wat jy besoek.
11 Tydskrifroetes het potensiaal: Aangesien die tydskrifte halfmaandeliks uitgegee word, is dit net gepas om terug te gaan na mense wat hulle lees en die volgende nommers aan te bied. Ons moet gereeld herbesoeke doen, nie net om tydskrifte te versprei nie, maar ook om die persoon se belangstelling in die Bybel verder te ontwikkel. Tydskrifroetes bied ’n uitstekende geleentheid om Bybelstudies te begin.
12 Maak ten volle gebruik van April en Mei: Die Wagtoring en Ontwaak! het miljoene waarderende lesers se vertroue gewen. Hulle kondig die Koninkryk op so ’n doeltreffende wyse aan dat ons moet sorg dat ons hulle altyd byderhand het en hulle by elke geleentheid aanbied. Mag April en Mei uitsonderlike maande wees om intekeninge te verkry en tydskrifte te versprei!