Die nuwe kringbyeenkomsprogram

“Onderhou God se gebooie en lewe” is die tema van die tweedaagse kringbyeenkomsprogram wat in September begin (Spr. 4:4). Dit sal beklemtoon waarom dit nie swaar is om God se gebooie te gehoorsaam nie. Daarbenewens sal dit toon hoe ons verkwikking en ware geluk asook hoop vir die toekoms kan vind deur God se wil te doen.—Matt. 11:28-30; Joh. 13:17.

Diegene wat in gehoorsaamheid aan Christus se opdrag by die byeenkoms gedoop wil word, moet die presiderende opsiener daarvan verwittig, en hy sal dan die nodige reëlings tref.—Matt. 28:19, 20.

’n Simposium sal praktiese maniere uiteensit waarop ons liefde vir God en vir ons broers kan toon (Joh. 13:34, 35; 1 Joh. 5:3). Treffende raad uit Psalms 19 en 119 sal deel van die program uitmaak. Hoewel die geïnspireerde raad in hierdie Psalms duisende jare gelede geskryf is, sal ons sien hoe dit ons vandag persoonlik tot voordeel strek.

Die openbare toespraak wat deur die streekopsiener gehou sal word, het die titel “Vrees God en onderhou sy gebooie” (Pred. 12:13, NW). Die kringopsiener se laaste toespraak sal toon hoe jongmense nóú die lewe ten beste kan benut en waarom hulle vertroue in ’n ewige toekoms kan hê. Die streekopsiener sluit die program af deur die talle voordele op te som wat daaruit voortspruit om “die koninklike wet” van liefde na te leef (Jak. 2:8). Dit is inderdaad ’n byeenkomsprogram wat almal sal wil bywoon!