Vyf-en-sestig-duisend!

Dit is die getal verkondigers wat ons graag vir Augustus 1998 wil sien rapporteer in Suid-Afrika. In die buurlande sal ons graag wil sien dat 1 200 verkondigers in Botswana, 2 400 in Lesotho, 1 000 in Namibië, 165 in St. Helena en 2 000 in Swaziland rapporteer. Het ons die potensiaal om hierdie doelwitte te bereik? Ja, ons het! Volgens ons huidige berekening van gemeentes in Suid-Afrika is daar altesaam 68 451 verkondigers. Maar die hoogtepunt vir Suid-Afrika is in Januarie 1998 bereik, toe 64 514 gerapporteer het. Hoe kan ons daardie rekordgetal oortref? Dit kan gedoen word as elke verkondiger in die gemeente definitiewe reëlings tref om gedurende Augustus aan die bediening deel te neem en dit stiptelik te rapporteer. Aangesien die eerste twee dae van die maand ’n Saterdag en ’n Sondag is en baie gemeentes dan hulle ontoegekendegebied-kampanje sal begin, kan julle gerus reëlings tref om al van daardie naweek af aan die velddiens deel te neem. As julle ’n kringbyeenkoms of spesiale byeenkomsdag gaan bywoon, kan julle daardie naweek dalk informele getuieniswerk doen en dan die volgende naweek saam met die gemeente velddiens doen. Deur vroeg in die maand te begin, sal ons nie versuim om gedurende Augustus tyd aan die getuieniswerk te bestee nie. Die sekretaris en boekstudiehouers moet seker maak dat die Augustus-rapport nie net die rapporte vir Augustus insluit nie, maar ook laat rapporte vir vorige maande. Met verenigde pogings behoort ons ’n nuwe verkondigerhoogtepunt te sien wat die 65 000-kerf vir die eerste keer in Suid-Afrika oorskry, asook nuwe hoogtepunte in die buurlande. Wat ’n lofuitroep tot Jehovah sal dit tog nie wees nie!—Ps. 47:2.