Hulle kan sien dat ons anders is
1 Verlede jaar het meer as 300 000 nuwelinge by ons geledere aangesluit deur hulle te laat doop. Wat het hierdie mense in Jehovah se Getuies gesien wat daartoe gelei het dat hulle ’n deel van God se organisasie wou wees? Waarom staan ons uit as anders in vergelyking met al die ander godsdienste? Hier is ’n paar ooglopende verskille:
—Ons volg eerder die Bybel as om persoonlike menings te volg: Ons aanbid Jehovah God “met gees en waarheid”, net soos Jesus Christus gesê het ons moet doen. Dit beteken dat ons godsdiensleuens verwerp en God se geskrewe Woord in ons lewe toepas.—Joh. 4:23, 24; 2 Tim. 3:15-17.
—Ons gaan na mense toe en wag nie dat hulle na ons toe moet kom nie: Ons het Christus se opdrag aanvaar om die predikings- en onderrigtingswerk te doen, en ons volg sy voorbeeld na om opregtes van hart te soek. Ons gaan soek hulle by hulle huis, op straat of waar hulle ook al te vinde is.—Matt. 9:35; 10:11; 28:19, 20; Hand. 10:42.
—Ons bied gratis Bybelonderrig aan almal: Ons gebruik gewillig ons middele en energie om elke jaar meer as ’n miljard uur aan die diens van God te wy. Ons is nie partydig nie, maar studeer die Bybel met alle soorte mense.—Matt. 10:8; Hand. 10:34, 35; Op. 22:17.
—Ons is goed opgelei om mense geestelik te help: Deur middel van ons persoonlike Bybelstudie en die onderrigting wat by gemeentelike vergaderinge, kring- en streekbyeenkomste voorsien word, ontvang ons ’n voortgesette teokratiese opvoeding van onskatbare waarde wat ons in staat stel om ander geestelik te verlig.—Jes. 54:13; 2 Tim. 2:15; 1 Pet. 3:15.
—Ons neem die waarheid ernstig op en pas dit in ons daaglikse lewe toe: Weens ons liefde vir God bring ons veranderinge aan om ons lewe in ooreenstemming met sy wil te bring. Ons Christelike nuwe persoonlikheid trek ander na die waarheid toe.—Kol. 3:9, 10; Jak. 1:22, 25; 1 Joh. 5:3.
—Ons streef daarna om in vrede met ander te lewe en te werk: As ons godvrugtige eienskappe aankweek, help dit ons om op ons dade en ons spraak te let. Ons ‘soek vrede en streef dit na’ met alle mense.—1 Pet. 3:10, 11; Ef. 4:1-3.
2 Die voorbeelde van ’n Christelike lewenswyse wat mense in Jehovah se organisasie sien, motiveer baie om die waarheid aan te neem. Mag ons persoonlike voorbeeld dieselfde uitwerking op diegene hê wat ons ken en wat ons dophou.