Vrees Jehovah die hele dag
1 “Die vrees van die HERE is die beginsel van die wysheid” (Ps. 111:10). Dit spoor ons aan om goeie werke te doen en help ons om af te wyk van die kwaad (Spr. 16:6). Hierdie vrees is ’n diepe ontsag vir ons Skepper, wat ons beweeg om gedrag wat hom mishaag sowel as ongehoorsaamheid te vermy. Dit is iets wat ons moet aankweek en die hele dag moet openbaar.—Spr. 8:13.
2 Die gees van Satan se wêreld oefen elke dag geweldige druk op ons uit om ons na sy bose weë te skik (Ef. 6:11, 12). Ons onvolmaakte vlees is sondig en neig van nature om te doen wat sleg is (Gal. 5:17). As ons Jehovah se gebooie wil gehoorsaam, gelukkig wil wees en die lewe wil verkry, moet ons hom die hele dag vrees.—Deut. 10:12, 13.
3 In Hebreërs 10:24, 25 word ons aangespoor om saam te vergader sodat ons mekaar kan aanmoedig, en “des te meer” gedurende hierdie tyd waarin ons lewe. Gereelde vergaderingbywoning is noodsaaklik as ons hierdie laaste dae wil oorleef. Die vrees wat ons het om God te mishaag, beweeg ons om vergaderinge by te woon en groot waarde daaraan te heg. Diegene wat God vrees, beskou hulle deelname aan Christelike vergaderinge as ’n heilige voorreg.
4 Nog ’n manier waarop ons ons vrees vir God openbaar, is om die opdrag te gehoorsaam om die goeie nuus van die Koninkryk te verkondig (Matt. 28:19, 20; Hand. 10:42). Een van die vernaamste redes waarom ons die predikingswerk doen, is om ander te help om die vrees van Jehovah aan te kweek en hulle aan sy wil te onderwerp. Ons bereik hierdie doelwit deur herbesoeke te doen, tuisbybelstudies te probeer begin en dan aan ander al die gebooie van God te leer. Sodoende toon ons ons vrees vir Jehovah en ons liefde vir ons naaste.—Matt. 22:37-39.
5 Diegene wat God nie vrees nie, bou nie waardering op vir geestelike dinge nie en gee toe aan die wêreld se dodelike lug, of geestesgesindheid (Ef. 2:2). Mag ons vasbeslote wees om “heilige diens aan God [te] verrig met godvrugtige vrees en ontsag” (Heb. 12:28). Dan sal ons die seëninge ontvang van diegene wat Jehovah die hele dag vrees.