Wees ’n gelukkige dader
1 Jesus het gesê dat die oorgrote meerderheid van mense gedurende sy teenwoordigheid, net soos in Noag se dag, ‘geen ag sal slaan nie’ (Matt. 24:37-39). Ons kan dus verwag dat baie mense nie na die goeie nuus van die Koninkryk sal luister nie. Wat kan ons help om ’n vreugdevolle gees te behou terwyl ons ons bediening uitvoer?—Ps. 100:2.
2 Eerstens moet ons onthou dat ons boodskap sowel as ons opdrag om te preek van God af kom. Enige gebrek aan belangstelling wat ons in die bediening teëkom, ondanks ons beste pogings, is in werklikheid ’n verwerping van Jehovah. As ons onthou dat ons getrouheid in die predikingswerk sy goedkeuring wegdra, sal dit ons help om ons vreugde en innerlike geluk as daders van God se woord te behou.—Jak. 1:25.
3 Tweedens is daar nog steeds mense wat Jehovah se middel tot redding sal aanvaar. Hoewel die meerderheid dalk onverskillig is, is daar nog steeds skaapgeaardes wat selfs nou, diep in die tyd van die einde, ingesamel moet word. Ons moet volhard in die predikingswerk en in elke “stad of dorpie . . . ingaan” om te “ondersoek wie daarin verdienstelik is”.—Matt. 10:11-13.
4 Behou ’n positiewe gesindheid: Die betreurenswaardige reputasie van valse godsdiens het sommige mense ontnugter. Ander is deur hierdie stelsel van dinge “gestroop en rondgegooi” (Matt. 9:36). Baie word dalk oorweldig deur die feit dat hulle nie werk, gesondheidsorg en sekuriteit het nie. As ons dit verstaan, sal dit ons help om in ons werk te volhard. Probeer om gesprekke aan te knoop oor kwessies wat die mense in ons gebied die meeste bekommer. Help hulle om te sien dat God se Koninkryk die enigste oplossing is. Gebruik die Skrif en spesifieke punte in die publikasies om hulle harte met die goeie nuus te bereik.—Heb. 4:12.
5 Gelukkige daders van God se woord moet altyd onthou: “Die vreugde van Jehovah is [ons] vesting” (Neh. 8:10, NW). Daar is geen rede waarom ons ons vreugde moet verloor nie. “As die huis verdienstelik is, laat die vrede wat julle dit toewens daaroor kom; maar as dit nie verdienstelik is nie, laat julle vrede na julle toe terugkeer” (Matt. 10:13). Jehovah hernieu ons vreugde en krag terwyl ons geduldig in sy heilige diens volhard, en hy seën ons getrouheid.