Verheerlik Jehovah deur voortreflike werke
1 Hoe bly is ’n mens tog om skuiling te vind wanneer jy deur ’n hewige storm oorval word! As dit binne warm en veilig is en die mense van die huis gasvry is, wil jy graag daar vertoef. Die Koninkrykspredikingswerk rig mense na so ’n skuiling teen Satan se stelsel. Kan ons daaglikse gedrag ander help om aangetrek te word deur hierdie veilige toevlug? Ja, want Jesus het gesê dat mense ‘ons voortreflike werke sal sien en heerlikheid sal gee aan ons Vader wat in die hemele is’.—Matt. 5:16.
2 Hoe kan ons ons gedra sodat ons werke ander na Jehovah en sy organisasie sal aantrek? Ons moet toelaat dat Jesus se woorde in Lukas 6:31 en 10:27 ons lewe elke dag vorm. Dit sal ons beweeg om liefdevolle besorgdheid teenoor ons medemens te toon en ons van hierdie koue en gevoellose wêreld onderskei.
3 ’n Suster wat op ’n veerboot op see was, het ’n jong vrou gesien wat so seesiek was dat sy nie na haar klein kindjie kon omsien nie. Die suster het aangebied om na die kind te kyk. Toe die vrou gevra het hoe sy haar dankbaarheid kon betoon, het die suster gesê: ‘Luister asseblief na Jehovah se Getuies wanneer hulle weer aan jou deur klop.’ Die vrou het dit gedoen, en nou is sy en haar man Getuies. Voortreflike werke het die verskil gemaak aan hulle reaksie op die Koninkryksboodskap.
4 Dit behels ons hele lewe: Ons gedrag in ons buurt, by die werk of by die skool en gedurende tye van ontspanning laat ander ’n opinie van ons en van ons godsdiens vorm. Daarom kan ons ons gerus afvra: ‘Hoe beskou waarnemers my en my gesin? Dink die bure dat ons huis en erf skoon en netjies is? Dink ons werk- en skoolmaats dat ons stiptelik en ywerig is? Sal ander ons voorkoms as beskeie en waardig beskou?’ Ons voortreflike werke kan die aanbidding van Jehovah vir ander aantrekliker maak.
5 Petrus het gewaarsku dat Christene bespot sou word (1 Pet. 4:4). Ons moet seker maak dat ons gedrag nie die oorsaak van negatiewe praatjies is nie (1 Pet. 2:12). As ons daaglikse werke die God verheerlik wat ons aanbid, sal ons soos lampe wees wat helder skyn om ander te rig na die veilige skuiling wat Jehovah voorsien.—Matt. 5:14-16.