Wees ‘intensief besig’ met jou bediening
1 Ons dink moontlik dat die apostel Paulus min geleentheid gehad het om te getuig wanneer ons lees dat hy in Korinte tente gemaak het. Handelinge 18:5 sê egter: “Paulus [het] hom intensief met die woord begin besig hou en aan die Jode getuig om te bewys dat Jesus die Christus is.” Waarom was Paulus so besig met die predikingswerk? Hoewel baie in Korinte reeds gelowiges geword het, het die Here bevestig dat daar nog baie meer dissipels in daardie stad gemaak moes word (Hand. 18:8-11). Het ons soortgelyke rede om intensief met ons bediening besig te wees? Ja. Baie mense kan nog gevind en die waarheid geleer word.
2 Bestee gedurende April meer tyd in die diens: Dit is waarskynlik jou doelwit om elke maand met die verkondiging van die goeie nuus besig te bly. Maar sekere maande bied meer geleenthede om ‘intensief besig’ te wees met hierdie werk. Dit sluit April in, die hoogtepunt van die Gedenkmaalseisoen. Het jou omstandighede jou in staat gestel om aan die hulppionierdiens deel te neem of meer in die bediening te doen? Baie verkondigers wat dit doen, word ryklik geseën (2 Kor. 9:6). As jy doen wat jy kan, moet jy onthou dat jou heelhartige diens Jehovah behaag (Luk. 21:2-4). Wat jou omstandighede ook al is, maak dit jou doelwit om gedurende April ‘intensief besig’ te wees met jou bediening. En moenie vergeet om aan die einde van die maand jou velddiensrapport vir jou boekstudiehouer te gee nie, sodat jou harde werk saam met die res van Jehovah se volk gereken kan word.
3 Besoek nuwelinge wat die Gedenkmaal bygewoon het: Verlede jaar was die Gedenkmaalbywoning in Suid-Afrika en die buurlande onder ons takkantoor 187 588. Ons weet nog nie wat die totale bywoning vir hierdie jaar is nie. Maar die verslae dui daarop dat daar ’n wonderlike potensiaal vir ’n groter “oes” is (Matt. 9:37, 38). Reël dus so gou as moontlik om belangstellendes wat die Gedenkmaal bygewoon het, te besoek om hulle geestelik te help. As hierdie besoeke uitgestel word, kan dit “die bose” ’n geleentheid bied ‘om wat in hulle hart gesaai is, weg te ruk’ (Matt. 13:19). As jy hulle gou besoek, toon dit dat jy inderdaad ‘intensief besig’ is met jou bediening.
4 Hou aan om die onbedrywiges by te staan: Sedert Februarie is ’n spesiale poging aangewend om onbedrywiges te help. As daar sommige is wat nog nie ’n herdersbesoek ontvang het nie, moet die ouer manne reël om hulle lank voor die einde van April te besoek. Die ouer manne moet probeer vasstel wat die onderliggende oorsaak van die persoon se probleem is en wat die beste manier sal wees om hom te help om weer bedrywig in Jehovah se diens te word. Hierdie liefdevolle hulp toon dat die ouer manne hulle verantwoordelikheid as herders van “die kudde van God” ernstig opneem (1 Pet. 5:2; Hand. 20:28). Die Wagtoring van 15 September 1993, bladsye 22-3, gee uitstekende wenke wat die ouer manne kan gebruik wanneer hulle enige van die vyf tipiese probleme teëkom waarmee onbedrywiges moontlik te kampe het. Dit sal ideaal wees as sommige nog gedurende April weer aan die veldbediening kan begin deelneem.
5 Help meer om ongedoopte verkondigers te word: Het jou kinders as nuwe verkondigers van die goeie nuus gekwalifiseer? Wat van ander met wie jy die Bybel studeer? Sal April nie ’n wonderlike tyd vir hulle wees om aan die predikingswerk te begin deelneem as hulle deur die ouer manne goedgekeur is nie? As iemand vooruitgang gemaak het en die Vereis-brosjure en die Kennis-boek bestudeer het, kan die Bybelstudie in ’n tweede boek voortgesit word—in die God se Woord-boek, die Ware vrede-boek of die Verenig in aanbidding-boek. Jou doel is om die student te help om groter insig in die waarheid te kry, as ’n ongedoopte verkondiger te kwalifiseer en ’n toegewyde en gedoopte Getuie van Jehovah te word.—Ef. 3:17-19; 1 Tim. 1:12; 1 Pet. 3:21.
6 Jou gereelde en opregte belangstelling in jou Bybelstudente kan hulle help om uiteindelik die waarheid hulle eie te maak. Een Getuie het ’n bejaarde egpaar ontmoet wat heelhartig tot ’n Bybelstudie ingestem het. Maar die egpaar het die studie drie weke na mekaar uitgestel. Uiteindelik is die studie begin. Toe het die egpaar die studie byna elke tweede week gekanselleer. Die vrou het uiteindelik tot doop gevorder. “Nadat sy gedoop is”, vertel die broer, “was haar oë vol trane van blydskap, wat my en my vrou ook van blydskap laat huil het.” Ja, om ‘intensief besig’ te wees met die goeie nuus, bring groot vreugde mee!
7 Bybelprofesieë en wêreldgebeure dui daarop dat ons diep in die tyd van die einde lewe. Dit is nou die tyd dat God se hele volk ‘intensief besig’ moet wees om die goeie nuus aan ander bekend te maak. Die apostel Paulus verseker ons dat sulke arbeid ‘in verband met die Here beslis nie tevergeefs is nie’.—1 Kor. 15:58.